15.32C Vancouver 15.32C VancouverAug 9, 2021 9:09 AM -
ਆਲ ਇੰਡੀਆ ਮਜਲਿਸ-ਏ- ਇੱਤੇਹਾਦੁਲ ਮੁਸਲੀਮੀਨ ਦੇ ਮੁਖੀ ਅਸਦਉਦਦੀਨ ਨੇ ਅੱਜ ਸੋਮਵਾਰ ਨੂੰ ਲੋਕ ਸਭਾ ਵਿੱਚ, ਦਿੱਲੀ ਦੇ ਦਵਾਰਕਾ ਵਿੱਚ ਹੱਜ ਭਵਨ ਦੀ ਉਸਾਰੀ ਦਾ ਵਿਰੋਧ ਕਰਨ ਲਈ ਕੀਤੀ ਗਈ ਮਹਾਂਪੰਚਾਇਤ ਦੇ ਮੁੱਦੇ 'ਤੇ ਐਵਾਨ ਦੀ ਕਾਰਵਾਈ ਰੋਕਣ ਦਾ ਨੋਟਿਸ ਦਿੱਤਾ।
ਉਨ੍ਹਾਂ ਅੱਗੇ ਕਿਹਾ ਕਿ ਮਹਾਂਪੰਚਾਇਤ ਵਿੱਚ ਮੁਸਲਮਾਨ ਨਾਗਰਿਕਾਂ ਖ਼ਿਲਾਫ਼ ਭਾਸ਼ਣ ਦਿੱਤੇ ਗਏ ਅਤੇ ਨਾਅਰੇ ਲਾਏ ਗਏ, ਇਸ ਲਈ ਐਵਾਨ ਦੀ ਕਾਰਵਾਈ ਰੋਕ ਕੇ ਇਸ ਮੁੱਦੇ 'ਤੇ ਚਰਚਾ ਕਰਨੀ ਬਹੁਤ ਅਹਿਮ ਹੈ, ਕਿਉਂਕਿ ਦਿੱਲੀ ਵਿੱਚ ਇੱਕ ਸਾਲ ਪਹਿਲਾਂ ਹੀ ਸੰਪਰਦਾਇਕ ਦੰਗੇ ਹੋਏ ਹਨ।
"ਮੈਂ ਇੱਥੇ ਐਵਾਨ ਦੀ ਕਾਰਵਾਈ ਨੂੰ ਹੇਠ ਲਿਖੇ ਮਕਸਦ ਨਾਲ ਰੋਕਣ ਦਾ ਨੋਟਿਸ ਦੇਣ ਦੀ ਆਪਣੀ ਇੱਛਾ ਜ਼ਾਹਿਰ ਕਰਦਾ ਹਾਂ, ਜੋ ਕਿ ਬਹੁਤ ਹੀ ਜ਼ਰੂਰੀ ਮੁੱਦੇ 'ਤੇ ਚਰਚਾ ਕਰਨ ਲਈ ਹੈ:- 6 ਅਗਸਤ, 2021 ਨੂੰ ਦਿੱਲੀ ਦੇ ਦਵਾਰਕਾ ਵਿੱਚ, ਹੱਜ ਭਵਨ ਉਸਾਰਨ ਦੇ ਖ਼ਿਲਾਫ਼ 'ਮਹਾਂਪੰਚਾਇਤ' ਸੱਦੀ ਗਈ। ਜਿਸ ਦੌਰਾਨ ਮੁਲਜ਼ਮਾਂ ਨਾਗਰਿਕਾਂ ਖ਼ਿਲ਼ਾਫ਼ ਭਾਸ਼ਣ ਦਿੱਤੇ ਗਏ ਅਤੇ ਨਾਅਰੇ ਲਾਏ ਗਏ। ਐਤਵਾਰ ਨੂੰ ਜੰਤਰ ਮੰਤਰ ਵਿਖੇ ਮੁਲਸਮਾਨ ਨਾਗਰਿਕਾਂ ਖ਼ਿਲਾਫ਼ ਕਤਲੇਆਮ ਦੇ ਨਾਅਰੇ ਲਾਏ ਗਏ। ਹਲੇ ਤੱਕ ਇਕੱਠ ਕਰਨ ਵਾਲੇ ਪ੍ਰਬੰਧਕਾਂ/ਭਾਗ ਲੈਣ ਵਾਲਿਆਂ ਖ਼ਿਲਾਫ਼ ਕੋਈ ਕਾਰਵਾਈ ਨਹੀਂ ਕੀਤੀ ਗਈ। ਕਿਉਂਕਿ ਕ਼ਾਨੂਨ ਅਤੇ ਪ੍ਰਬੰਧ, ਪੁਲਿਸ ਭਾਰਤ ਸਰਕਾਰ ਦੀ ਜਿੰਮੇਵਾਰੀ ਹੈ, ਅਤੇ ਦਿੱਲੀ ਨੇ ਹਲੇ ਬੀਤੇ ਸਾਲ ਹੀ ਸੰਪਰਦਾਇਕ ਹਿੰਸਾ ਵੇਖੀ ਹੈ, ਇਸ ਲਈ ਕਾਰਵਾਈ ਰੋਕ ਕੇ ਇਸ ਲੋਕ ਅਹਿਮੀਅਤ ਦੇ ਜ਼ਰੂਰੀ ਮੁੱਦੇ 'ਤੇ ਚਰਚਾ ਕੀਤੀ ਜਾਣੀ ਚਾਹੀਦੀ ਹੈ," ਏਆਈਐੱਮਆਈਐੱਸ ਦੇ ਮੁਖੀ ਨੇ ਆਪਣੇ ਨੋਟਿਸ ਵਿੱਚ ਆਖਿਆ।
ਟਵਿੱਟਰ 'ਤੇ ਓਵੈਸੀ ਨੇ ਇਲਜ਼ਾਮ ਲਾਇਆ ਕਿ ਨਿਆਂ ਅਤੇ ਕਾਨੂੰਨੀ ਕਾਰਵਾਈ ਦੀ ਮੰਗ ਕਰਨਾ ਵੀ ਹੁਣ ਇੱਕ ਮਜ਼ਾਕ ਹੀ ਬਣ ਗਿਆ ਹੈ।
"ਅੱਜਕੱਲ ਹਾਲਾਤ ਇਸ ਤਰਾਂ ਦੇ ਬਣ ਗਏ ਹਨ ਕਿ ਨਿਆਂ ਅਤੇ ਕਾਨੂੰਨੀ ਕਾਰਵਾਈ ਦੀ ਮੰਗ ਕਰਨਾ ਵੀ ਹੁਣ ਇੱਕ ਮਜ਼ਾਕ ਹੀ ਬਣ ਗਿਆ ਹੈ। ਇਸ ਬਾਰੇ ਅੱਜ ਲੋਕ ਸਭਾ ਵਿੱਚ ਚਰਚਾ ਕੀਤੀ ਜਾਣੀ ਚਾਹੀਦੀ ਹੈ, ਇਸ ਲਈ ਵਜ਼ੀਰ-ਏ-ਦਾਖਲਾ ਨੂੰ ਜਿੰਮੇਵਾਰ ਠਹਿਰਾਉਣਾ ਚਾਹੀਦਾ ਹੈ। ਇਸ ਮੁੱਦੇ 'ਤੇ ਨਿਯਮਾਂ ਮੁਤਾਬਕ, ਮੈਂ ਲੋਕ ਸਭਾ ਵਿੱਚ ਕਾਰਵਾਈ ਰੋਕਣ ਦਾ ਨੋਟਿਸ ਦਿੱਤਾ ਹੈ,"ਉਨ੍ਹਾਂ ਟਵੀਟ ਕੀਤਾ।
ਉਨ੍ਹਾਂ ਪ੍ਰਧਾਨ ਮੰਤਰੀ ਨਰੇਂਦਰ ਮੋਦੀ 'ਤੇ ਵੀ ਕਰੜੇ ਸ਼ਬਦਾਂ 'ਚ ਵਾਰ ਕਰਦਿਆਂ ਆਖਿਆ ਕਿ ਐਤਵਾਰ ਨੂੰ ਜੰਤਰ ਮੰਤਰ ਵਿਖੇ ਮੁਸਲਮਾਨ ਵਿਰੋਧੀ ਨਾਅਰੇ ਲਾਏ ਗਏ, ਜੋ ਕਿ ਪ੍ਰਧਾਨ ਮੰਤਰੀ ਦੀ ਰਿਹਾਇਸ਼ ਤੋਂ 20 ਮਿੰਟਾਂ ਦੀ ਦੂਰੀ 'ਤੇ ਹੈ।
"ਪਿਛਲੇ ਸਾਲ ਮੋਦੀ ਦੇ ਵਜ਼ੀਰਾਂ ਨੇ "ਗੋਲੀ ਮਾਰੋ" ਦੇ ਨਾਅਰੇ ਲਾਏ ਸਨ ਅਤੇ ਉਸਤੋਂ ਛੇਤੀ ਹੀ ਬਾਅਦ ਵਿੱਚ ਉੱਤਰ-ਪੂਰਬੀ ਦਿੱਲੀ ਵਿੱਚ ਸਰੇਆਮ ਮੁਸਲਮਾਨਾਂ ਦਾ ਕਤਲੇਆਮ ਕੀਤਾ ਗਿਆ। ਭਾਰਤ ਵਿੱਚ ਇੱਕ ਮੁਸਲਮਾਨ ਅਜਿਹੀਆਂ ਭੀੜਾਂ ਅਤੇ ਅਜਿਹਿਆਂ ਨਾਅਰਿਆਂ 'ਚ ਆਪਣੇ ਆਪ ਨੂੰ ਸੁਰੱਖਿਅਤ ਕਿਵੇਂ ਮਹਿਸੂਸ ਕਰ ਸਕਦਾ ਹੈ?" ਓਵੈਸੀ ਨੇ ਪੁੱਛਿਆ।
ਏਆਈਐੱਮਆਈਐੱਸ ਮੁਖੀ ਨੇ ਦਿੱਲੀ ਪੁਲਿਸ ਦੀ ਵੀ, ਜੰਤਰ ਮੰਤਰ 'ਤੇ ਮੁਸਲਮਾਨਾਂ ਖ਼ਿਲਾਫ਼ ਨਾਅਰੇ ਲਾਉਣ ਵਾਲਿਆਂ ਖ਼ਿਲਾਫ਼ ਕੋਈ ਕਾਰਵਾਈ ਨਾ ਕਰਨ 'ਤੇ ਨਿਖੇਧੀ ਕੀਤੀ।
"ਆਖ਼ਰਕਾਰ, ਇਨ੍ਹਾਂ ਗੁੰਡਿਆਂ ਦੀ ਵੱਧ ਰਹੀ ਹਿੰਮਤ ਪਿੱਛੇ ਕੀਹਦੀ ਹੱਲਾਸ਼ੇਰੀ ਹੈ? ਉਹ ਜਾਣਦੇ ਹਨ ਕਿ ਮੋਦੀ ਸਰਕਾਰ ਉਨ੍ਹਾਂ ਨਾਲ ਖੜੀ ਹੈ। 24 ਜੁਲਾਈ ਨੂੰ ਕੌਮੀ ਸੁਰੱਖਿਆ ਐਕਟ(ਐੱਨਐੱਸਏ) ਦੇ ਤਹਿਤ, ਕੇਂਦਰ ਸਰਕਾਰ ਨੇ ਦਿੱਲੀ ਪੁਲਿਸ ਨੂੰ, ਕਿਸੇ ਵੀ ਸ਼ਖਸ ਨੂੰ ਹਿਰਾਸਤ 'ਚ ਲੈਣ ਦਾ ਹੱਕ ਦਿੱਤਾ ਸੀ। ਪਰ ਇੱਥੇ ਤਾਂ ਦਿੱਲੀ ਪੁਲਿਸ ਹੀ ਮੂਕ ਦਰਸ਼ਕ ਬਣੀ ਹੋਈ ਹੈ," ਉਨ੍ਹਾਂ ਅੱਗੇ ਆਖਿਆ।
ਦਿੱਲੀ ਪੁਲਿਸ ਦੇ ਸੂਤਰਾਂ ਮੁਤਾਬਕ, ਕੱਲ ਜੰਤਰ ਮੰਤਰ 'ਤੇ, "ਬਸਤੀਵਾਦੀ ਕਾਨੂੰਨਾਂ ਖ਼ਿਲਾਫ਼ ਅਤੇ ਇੱਕੋ ਜਿਹੇ ਕਾਨੂੰਨਾਂ ਲਈ" ਕੀਤੇ ਗਏ ਮਾਰਚ ਵਿੱਚ, ਭੜਕਾਊ ਨਾਅਰਿਆਂ ਵਾਲੀ ਵੀਡੀਓ ਸਾਹਮਣੇ ਆਉਣ ਤੋਂ ਬਾਅਦ, ਅਣਪਛਾਤੇ ਲੋਕਾਂ ਖ਼ਿਲਾਫ਼ ਐੱਫਆਈਆਰ ਦਰਜ ਕੀਤੀ ਗਈ ਹੈ।
