ਇਜ਼ਰਾਈਲੀ ਫੌਜਾਂ ਦੇ ਪਿੱਛੇ ਹਟਣ ਤੋਂ ਬਾਅਦ ਖਾਨ ਯੂਨਿਸ ਵੱਲ ਪਰਤੇ ਲੋਕ

ਇਜ਼ਰਾਇਲੀ ਫੌਜ ਦੱਖਣੀ ਗਾਜ਼ਾ ਦੇ ਸ਼ਹਿਰ ਖਾਨ ਯੂਨਿਸ ਤੋਂ ਪਿੱਛੇ ਹਟ ਗਈ ਹੈ, ਜਿਸ ਤੋਂ ਬਾਅਦ ਫਲਸਤੀਨੀਆਂ ਨੇ ਸ਼ਹਿਰ ਵਿਚ ਵਾਪਸੀ ਸ਼ੁਰੂ ਕਰ ਦਿੱਤੀ ਹੈ। ਪਿਛਲੇ 4 ਮਹੀਨਿਆਂ ਤੋਂ ਲਗਾਤਾਰ ਇਜ਼ਰਾਈਲੀ ਫੌਜ ਇੱਥੇ ਹਮਲੇ ਕਰ ਰਹੀ ਸੀ।

ਰਿਪੋਰਟਸ ਦਾ ਕਹਿਣਾ ਹੈ ਕਿ ਇਥੇ ਸ਼ਹਿਰ ਨਾਮ ਦੀ ਚੀਜ਼ ਨਹੀਂ ਬਚੀ ਹੈ, ਸਿਰਫ ਮਲਬਾ ਹੈ ਅਤੇ ਲੋਕ ਆਪਣੇ ਟੁੱਟੇ ਹੋਏ ਘਰਾਂ ਨੂੰ ਵਾਪਸ ਜਾ ਰਹੇ ਹਨ। ਇਜ਼ਰਾਇਲੀ ਫੌਜ ਦਾ ਕਹਿਣਾ ਹੈ ਕਿ ਹੁਣ ਗਾਜ਼ਾ ਦੇ ਰਾਫਾ ਇਲਾਕੇ ਨੂੰ ਖਾਲੀ ਕਰਵਾਇਆ ਜਾਵੇਗਾ, ਜਿੱਥੇ ਹਮਾਸ ਦੀਆਂ ਚਾਰ ਬਟਾਲੀਅਨ ਮੌਜੂਦ ਹਨ।

ਫੌਜ ਨੇ ਕਿਹਾ ਕਿ ਸਾਡੀ ਕੋਸ਼ਿਸ਼ ਹੋਵੇਗੀ ਕਿ ਰਾਫਾ ਵਿਚ ਆਮ ਲੋਕਾਂ ਨੂੰ ਨੁਕਸਾਨ ਨਾ ਪਹੁੰਚੇ। ਰਿਪੋਰਟਸ ਦੀ ਮੰਨੀਏ ਤਾਂ ਰਾਫਾ ਵਿਚ ਕਰੀਬ 15 ਲੱਖ ਹਨ ਜਿਨ੍ਹਾਂ ਵਿਚ ਜ਼ਿਆਦਾਤਰ ਉਹ ਲੋਕ ਹਨ ਜੋ ਇਜ਼ਰਾਇਲੀ ਹਮਲੇ ਸ਼ੁਰੂ ਹੋਣ ਤੋਂ ਬਾਅਦ ਗਾਜ਼ਾ ਦੇ ਵੱਖ-ਵੱਖ ਹਿੱਸਿਆਂ ਤੋਂ ਭੱਜ ਕੇ ਇੱਥੇ ਪਨਾਹ ਲੈਣ ਪਹੁੰਚੇ।

ਗੌਰਤਲਬ ਹੈ ਕਿ ਹਮਾਸ ਨੇ 7 ਅਕਤੂਬਰ 2023 ਨੂੰ ਇਜ਼ਰਾਇਲ ਉੱਤੇ ਹਮਲਾ ਕੀਤਾ ਸੀ, ਜਿਸ ਵਿਚ 1,200 ਲੋਕਾਂ ਦੀ ਮੌਤ ਹੋਈ ਸੀ ਅਤੇ ਕਈ ਸਾਰੇ ਲੋਕਾਂ ਨੂੰ ਉਹ ਬੰਧਕ ਬਣਾ ਕੇ ਲੈ ਗਏ ਸਨ, ਜਿਨ੍ਹਾਂ ਵਿਚੋਂ ਅਜੇ ਵੀ ਕਈ ਉਸ ਦੀ ਕੈਦ ਵਿਚ ਹਨ। ਉਥੇ ਹੀ, ਇਜ਼ਰਾਇਲ ਦੇ ਜਵਾਬੀ ਹਮਲਿਆਂ ਵਿਚ ਹੁਣ ਤੱਕ 33 ਹਜ਼ਾਰ ਤੋਂ ਵੱਧ ਫਲਸਤੀਨੀਆਂ ਦੀ ਮੌਤ ਹੋ ਚੁੱਕੀ ਹੈ।