20.26C Vancouver 20.26C VancouverJul 28, 2021 8:35 AM -
ਵਿਰੋਧੀ ਧਿਰ ਵੱਲੋਂ ਲਗਾਤਾਰ ਕੀਤੇ ਜਾ ਰਹੇ ਹੰਗਾਮੇ ਦੇ ਦੌਰਾਨ, 'ਪੈਗੈਸਸ ਪ੍ਰੌਜੈਕਟ' 'ਤੇ ਚਰਚਾ ਦੀ ਮੰਗ ਕਰਦਿਆਂ 'ਖੇਲਾ ਹੋਬੇ' ਦੇ ਨਾਅਰੇ ਲਾਏ ਗਏ, ਜਿਸ ਕਰਕੇ ਪਾਰਲੀਮੈਂਟ ਦੇ ਮਾਨਸੂਨ ਇਜਲਾਸ ਦੇ ਸੱਤਵੇਂ ਦਿਨ ਅੱਜ ਬੁੱਧਵਾਰ ਨੂੰ ਲੋਕ ਸਭਾ ਅਤੇ ਰਾਜ ਸਭਾ ਦੀ ਕਾਰਵਾਈ 2 ਵਜੇ ਤੱਕ ਮੁਲਤਵੀ ਕੀਤੀ ਗਈ।
ਹੇਠਲਾ ਏਵਾਨ ਅੱਜ ਬੁੱਧਵਾਰ ਨੂੰ ਦੋ ਵਾਰੀ ਮੁਲਤਵੀ ਕੀਤਾ ਗਿਆ, ਇੱਕ ਵਾਰੀ 12:30 ਵਜੇ ਤੱਕ ਅਤੇ ਦੂਜੀ ਵਾਰੀ 2 ਵਜੇ ਤੱਕ।
ਦੂਜੇ ਪਾਸੇ, ਪਾਰਲੀਮੈਂਟ ਦੇ ਉਤਲੇ ਏਵਾਨ ਦੀ ਕਾਰਵਾਈ ਵੀ ਦੋ ਵਾਰੀ ਹੀ ਮੁਲਤਵੀ ਕਰਨੀ ਪਾਈ, ਇੱਕ ਵਾਰੀ ਦੁਪਹਿਰ 12 ਵਜੇ ਤੱਕ ਅਤੇ ਫਿਰ 2 ਵਜੇ ਤੱਕ।
ਦਰਅਸਲ, ਵਿਰੋਧੀ ਪਾਰਟੀਆਂ ਵੱਲੋਂ ਅੱਜ ਪਹਿਲਾਂ ਪਾਰਲੀਮੈਂਟ ਵਿੱਚ, ਦੋਵਾਂ ਏਵਾਨਾਂ ਵਿੱਚ ਆਉਣ ਵਾਲੇ ਦਿਨਾਂ 'ਚ ਚੁੱਕੇ ਜਾਣ ਵਾਲੇ ਕਈ ਮੁੱਦਿਆਂ 'ਤੇ ਕੀਤੀ ਜਾਣ ਵਾਲੀ ਕਾਰਵਾਈ ਬਾਰੇ ਬੈਠਕ ਕੀਤੀ ਗਈ ਸੀ, ਜਿਸ ਤੋਂ ਬਾਅਦ ਇਹ ਸਭ।
ਇਸ ਬੈਠਕ ਵਿੱਚ ਕਾਂਗਰਸ ਦੇ ਲੀਡਰ ਰਾਹੁਲ ਗਾਂਧੀ ਵੀ ਮੌਜੂਦ ਸਨ।
ਕੇਂਦਰ ਸਰਕਾਰ 'ਤੇ ਵਿਰੋਧੀ ਧਿਰ ਨੂੰ ਬਦਨਾਮ ਕਰਨ ਦਾ ਇਲਜ਼ਾਮ ਲਾਉਂਦੀਆਂ, ਗਾਂਧੀ ਨੇ ਬੈਠਕ ਵਿੱਚ ਆਖਿਆ,"ਸਰਕਾਰ ਵਿਰੋਧੀ ਧਿਰ 'ਤੇ ਇਹ ਇਲਜ਼ਾਮ ਲਾ ਰਹੀ ਹੈ ਕਿ ਅਸੀਂ ਪਾਰਲੀਮੈਂਟ ਦੀ ਕਾਰਵਾਈ ਨਹੀਂ ਹੋਣ ਦੇ ਰਹੇ, ਜਦਕਿ ਅਸੀਂ ਨਾਗਰਿਕਾਂ, ਕਿਸਾਨਾਂ ਅਤੇ ਮੁਲਕ ਦੀ ਸੁਰੱਖਿਆ ਨਾਲ ਜੁੜੇ ਮੁੱਦੇ ਹੀ ਚੁੱਕ ਰਹੇ ਹਾਂ।"
ਬੈਠਕ ਤੋਂ ਬਾਅਦ, ਗਾਂਧੀ ਨੇ ਆਖਿਆ,"ਅਸੀਂ ਮਹਿੰਗਾਈ, ਪੈਗੈਸਸ ਅਤੇ ਕਿਸਾਨਾਂ ਦੇ ਮੁੱਦਿਆਂ 'ਤੇ ਸਮਝੌਤਾ ਨਹੀਂ ਕਰਨਾ ਚਾਹੁੰਦੇ। ਅਸੀਂ ਏਵਾਨ ਵਿੱਚ ਇਸ 'ਤੇ ਚਰਚਾ ਕਰਨਾ ਚਾਹੁੰਦੇ ਹਾਂ।"
ਇਸ ਤੋਂ ਪਹਿਲਾਂ ਅੱਜ, ਸੀਪੀਆਈ (ਮਾਰਕਸਵਾਦੀ) ਐੱਮਪੀ ਏਲਾਮਰਾਮ ਕਰੀਮ ਨੇ ਰਾਜ ਸਭਾ ਵਿੱਚ ਨਿਯਮ 267 ਦੇ ਤਹਿਤ, ਪੈਗੈਸਸ ਪ੍ਰੌਜੈਕਟ ਰਿਪੋਰਟ 'ਤੇ ਚਰਚਾ ਦੀ ਮੰਗ ਕਰਦਿਆਂ, ਕਾਰਵਾਈ ਰੋਕਣ ਦਾ ਨੋਟਿਸ ਦਿੱਤਾ ਸੀ।
ਗ਼ੌਰਤਲਬ ਹੈ ਕਿ ਮਾਨਸੂਨ ਇਜਲਾਸ 19 ਜੁਲਾਈ ਨੂੰ, ਪ੍ਰਧਾਨ ਮੰਤਰੀ ਨਰੇਂਦਰ ਮੋਦੀ ਵੱਲੋਂ ਪਾਰਲੀਮੈਂਟ ਵਿੱਚ ਨਵੇਂ ਕੇਂਦਰੀ ਮੰਤਰੀਆਂ ਦੀ ਜਾਣ-ਪਛਾਣ ਕਰਾਉਣ ਦੌਰਾਨ, ਵਿਰੋਧੀ ਧਿਰ ਵੱਲੋਂ ਕੀਤੇ ਗਏ ਹੰਗਾਮੇ ਵਿਚਾਲੇ ਸ਼ੁਰੂ ਹੋਇਆ ਸੀ।
ਇਹ ਇਜਲਾਸ 13 ਅਗਸਤ ਨੂੰ ਖ਼ਤਮ ਹੋਵੇਗਾ।
