11.59C Vancouver 11.59C VancouverFeb 19, 2020 2:51 PM -
ਜਪਾਨ ਦੇ ਯੋਕੋਹਾਮਾ ਤੱਟ ਤੇ ਪਿਛਲੇ ਦੋ ਹਫ਼ਤਿਆਂ ਤੋਂ ਖੜ੍ਹੇ ਸਮੁੰਦਰੀ ਜਹਾਜ਼ ਦਾ ਕੁਆਰੰਟੀਨ ਦਾ ਸਮਾਂ ਖਤਮ ਹੋਣ ਤੋਂ ਬਾਅਦ ਸੈਂਕੜੇ ਯਾਤਰੀ ਅੱਜ ਜਹਾਜ਼ ਤੋਂ ਬਾਹਰ ਆਉਣੇ ਸ਼ੁਰੂ ਹੋਏ।
ਸਿਹਤ ਮਾਹਿਰਾਂ ਵੱਲੋਂ ਜਹਾਜ਼ ਦੀ ਕੁਆਰੰਟੀਨ ਕਰਨ ਦੀ ਪ੍ਰਕਿਰਿਆ ਉੱਤੇ ਸਵਾਲੀਆ ਚਿੰਨ੍ਹ ਖੜ੍ਹੇ ਕੀਤੇ ਜਾ ਰਹੇ ਸਨ।
ਅਧਿਕਾਰੀਆਂ ਵੱਲੋਂ ਹਾਲੇ ਵੀ ਵਾਇਰਸ ਸਬੰਧੀ ਟੈਸਟ ਜਹਾਜ਼ ਦੇ ਯਾਤਰੀਆਂ ਤੇ ਕੀਤੇ ਜਾ ਰਹੇ ਹਨ।
ਡਾਇਮੰਡ ਪ੍ਰਿੰਸੈਸ ਨਾਂ ਦੇ ਇਸ ਜਹਾਜ਼ ਤੇ ਹੁਣ ਤੱਕ 540 ਦੇ ਕਰੀਬ ਯਾਤਰੀ ਵਾਇਰਸ ਤੋਂ ਪੀੜਤ ਪਾਏ ਗਏ ਹਨ।
ਕੁਝ ਯਾਤਰੀਆਂ ਨੇ ਟਵਿੱਟਰ ਉੱਤੇ ਇਹ ਗੱਲ ਸਾਂਝੀ ਕੀਤੀ ਕਿ ਉਨ੍ਹਾਂ ਨੂੰ ਵਾਇਰਸ ਦੀਆਂ ਨਿਸ਼ਾਨੀਆਂ ਜਿਵੇਂ ਕਿ ਸਿਰਦਰਦ, ਬੁਖਾਰ ਅਤੇ ਖੰਘ ਦੀ ਪਛਾਣ ਕਰਨ ਵਾਸਤੇ ਹੈਲਥ ਫਾਰਮ ਦਿੱਤੇ ਗਏ ਸਨ।
ਜਿਹੜੇ ਯਾਤਰੀਆਂ ਨੂੰ ਵਾਇਰਸ ਦੀਆਂ ਕੋਈ ਨਿਸ਼ਾਨੀਆਂ ਨਜ਼ਰ ਨਹੀਂ ਆਈਆਂ ਉਨ੍ਹਾਂ ਦਾ ਟੈਂਪਰੇਚਰ ਵੀ ਜਹਾਜ਼ ਤੋਂ ਉਤਰਨ ਤੋਂ ਪਹਿਲਾਂ ਚੈੱਕ ਕੀਤਾ ਗਿਆ।
ਇਹ ਖਾਸ ਇਤਿਹਾਤ ਇਸ ਲਈ ਵਰਤੀ ਜਾ ਰਹੀ ਹੈ ਕਿਉਂਕਿ ਹਾਂਗਕਾਂਗ ਦੇ ਵਿੱਚ ਉੱਤਰੇ ਇੱਕ ਯਾਤਰੀ ਨੂੰ ਵਾਇਰਸ ਨਾਲ ਪੀੜਤ ਪਾਇਆ ਗਿਆ ਸੀ।
ਡਾਇਮੰਡ ਪ੍ਰਿੰਸਜ਼ ਉੱਤੇ 3,711 ਯਾਤਰੀਆਂ ਵਿੱਚ ਮੰਗਲਵਾਰ ਤੱਕ 542 ਵਿਅਕਤੀ ਵਾਇਰਸ ਤੋਂ ਪੀੜਤ ਪਾਏ ਗਏ ਹਨ ਜੋ ਕਿ ਚੀਨ ਤੋਂ ਬਾਹਰ ਵਾਇਰਸ ਨਾਲ ਸਭ ਤੋਂ ਵੱਧ ਗਿਣਤੀ ਹੈ।
ਜਿੱਥੇ ਇੱਕ ਪਾਸੇ ਜਪਾਨੀ ਅਧਿਕਾਰੀਆਂ ਮੁਤਾਬਕ ਵਾਇਰਸ ਤੋਂ ਪੀੜਤ ਵਿਅਕਤੀਆਂ ਦੀ ਗਿਣਤੀ ਘਟੀ ਹੈ ਉੱਥੇ ਹੀ ਹਰ ਰੋਜ਼ ਦਰਜਨਾਂ ਕੇਸ ਸਾਹਮਣੇ ਆ ਰਹੇ ਹਨ ਮੰਗਲਵਾਰ ਨੂੰ 88 ਹੋਰ ਵਿਅਕਤੀ ਵਾਇਰਸ ਤੋਂ ਪੀੜਤ ਪਾਏ ਗਏ।
ਤਕਰੀਬਨ 500 ਵਿਅਕਤੀ ਅੱਜ ਆਪਣੇ ਘਰ ਵਾਪਸ ਜਾ ਸਕਣਗੇ ਇਹ ਉਮੀਦ ਕੀਤੀ ਜਾ ਰਹੀ ਹੈ।
ਸਮੁੰਦਰੀ ਜਹਾਜ਼ ਤੇ ਕੰਮ ਕਰਨ ਵਾਲੇ ਕਰਮਚਾਰੀਆਂ ਨੂੰ ਫਿਲਹਾਲ ਸ਼ਿੱਪ ਤੇ ਹੀ ਰਹਿਣਾ ਪਵੇਗਾ।
ਜਹਾਜ਼ ਦੇ ਆਪਰੇਟਰ ਪ੍ਰਿੰਸੈਸ ਕਰੂਜ਼ਜ਼ ਵੱਲੋਂ ਮੰਗਲਵਾਰ ਨੂੰ ਜਾਰੀ ਕੀਤੀ ਸਟੇਟਮੈਂਟ ਮੁਤਾਬਕ, 169 ਵਿਅਕਤੀ ਜਿਨ੍ਹਾਂ ਦੇ ਟੈਸਟ ਪਾਜ਼ੇਟਿਵ ਆਏ ਹਨ ਫਿਲਹਾਲ ਜਹਾਜ਼ ਤੇ ਹੀ ਹਨ ਅਤੇ ਹਸਪਤਾਲਾਂ ਵਿੱਚ ਭਰਤੀ ਹੋਣ ਦੀ ਉਡੀਕ ਕਰ ਰਹੇ ਹਨ।
