ਪੀਅਰ ਪੌਲੀਐਵ ਨੇ ਚੋਣ ਮੁਹਿੰਮ ਤੇਜ਼ ਕਰਦਿਆਂ ਬਜ਼ੁਰਗਾਂ ਲਈ ਟੈਕਸ ਕਟੌਤੀਆਂ ਦਾ ਕੀਤਾ ਐਲਾਨ

ਕੰਜ਼ਰਵੇਟਿਵ ਲੀਡਰ ਪੀਅਰ ਪੌਲੀਐਵ ਨੇ ਇਲੈਕਸ਼ਨ ਕੰਪੇਨ ਭਖਾਉਂਦੇ ਹੋਏ ਇੱਕ ਹੋਰ ਟੈਕਸ ਕਟੌਤੀ ਦੀ ਘੋਸ਼ਣਾ ਕੀਤੀ ਹੈ। ਪੌਲੀਐਵ ਨੇ ਕਿਹਾ ਕਿ ਉਨ੍ਹਾਂ ਦੀ ਸਰਕਾਰ ਵਿਚ ਕੰਮ ਕਰ ਰਹੇ ਸੀਨੀਅਰਾਂ ਦੀ $34,000 ਤੱਕ ਦੀ ਇਨਕਮ ਟੈਕਸ ਫਰੀ ਕਰ ਦਿੱਤੀ ਜਾਵੇਗੀ। ਇਹ ਮੌਜੂਦਾ ਛੋਟ ਨਾਲੋਂ $10,000 ਦਾ ਵਾਧਾ ਹੋਵੇਗਾ।

ਕੰਜ਼ਰਵੇਟਿਵ ਲੀਡਰ ਨੇ ਇਹ ਵੀ ਕਿਹਾ ਕਿ ਕੈਨੇਡਾ ਪੈਨਸ਼ਨ ਯੋਜਨਾ, ਗਾਰੰਟੀਸ਼ੁਦਾ ਆਮਦਨੀ ਪੂਰਕ ਅਤੇ ਬੁਢਾਪਾ ਸੁਰੱਖਿਆ ਦਾ ਲਾਭ ਲੈਣ ਲਈ ਰਿਟਾਇਰਮੈਂਟ ਦੀ ਉਮਰ 65 ਸਾਲ ਬਰਕਰਾਰ ਰੱਖੀ ਜਾਵੇਗੀ। ਗੌਰਤਲਬ ਹੈ ਕਿ ਪੌਲੀਐਵ ਅੱਜ ਕਿਊਬੈਕ ਵਿਚ ਸਨ, ਜਿੱਥੇ 78 ਫੈਡਰਲ ਰਾਈਡਿੰਗ ਹਨ। ਉਨ੍ਹਾਂ ਇਹ ਵੀ ਕਿਹਾ ਕਿ ਸੀਨੀਅਰਾਂ ਨੂੰ $34,000 ਤੋਂ ਉਪਰ ਦੀ ਆਮਦਨ 'ਤੇ ਇਨਕਮ ਟੈਕਸ ਕਟੌਤੀ ਦਾ ਵੀ ਲਾਭ ਮਿਲੇਗਾ, ਜੋ ਕਿ ਸਭ ਤੋਂ ਹੇਠਲੇ ਬਰੈਕਟ ਵਿਚ ਸਾਰਿਆਂ ਲਈ 15 ਫੀਸਦੀ ਤੋਂ ਘਟਾ ਕੇ 12.75 ਫੀਸਦੀ ਕੀਤੀ ਜਾਵੇਗੀ।