ਪੀਅਰ ਪੌਲੀਐਵ ਨੇ ਮਾਰਕ ਕਾਰਨੀ ’ਤੇ ਸਾਧਿਆ ਨਿਸ਼ਾਨਾ

ਕੈਨੇਡਾ ਦੀ ਮੁੱਖ ਵਿਰੋਧੀ ਧਿਰ ਦੇ ਲੀਡਰ ਪੀਅਰ ਪੌਲੀਐਵ ਨੇ ਲਿਬਰਲ ਪਾਰਟੀ ਦੇ ਲੀਡਰਸ਼ਿਪ ਉਮੀਦਵਾਰ ਮਾਰਕ ਕਾਰਨੀ ’ਤੇ ਨਿਸ਼ਾਨਾ ਸਾਧਿਆ ਹੈ ਅਤੇ ਦੋਸ਼ ਲਗਾਇਆ ਹੈ ਕਿ ਜੇ ਕਾਰਨੀ ਦੇ ਹੱਥ ਕੈਨੇਡਾ ਦੀ ਵਾਗਡੋਰ ਆਈ ਤਾਂ ਕੈਨੇਡਾ ਵਿਚ ਸਟੀਲ ਸੈਕਟਰ ਦੀਆਂ ਜੌਬਸ ਖੁਸ ਜਾਣਗੀਆਂ।

ਪੌਲੀਐਵ ਨੇ ਕਿਹਾ ਕਿ ਟਰੰਪ ਕੈਨੇਡਾ ਦੀਆਂ ਸਟੀਲ ਜੌਬਸ ਅਮਰੀਕਾ ਵਿਚ ਲਿਜਾਉਣਾ ਚਾਹੁੰਦੇ ਹਨ ਅਤੇ ਕਾਰਬਨ ਟੈਕਸ ਕਾਰਨੀ ਉਹ ਸ਼ਖ਼ਸ ਹਨ ਜੋ ਟਰੰਪ ਨੂੰ ਇਹ ਸੌਂਪਣਗੇ। ਕੰਜ਼ਰਵੇਟਿਵ ਪਾਰਟੀ ਦੇ ਲੀਡਰ ਨੇ ਕਿਹਾ ਕਿ ਘੱਟੋ-ਘੱਟ 2020 ਤੋਂ ਕਾਰਨੀ ਟਰੂਡੋ ਨੂੰ ਸਲਾਹ ਦੇ ਰਹੇ ਹਨ ਅਤੇ ਟਰੂਡੋ ਦੀਆਂ ਉਨ੍ਹਾਂ ਨੀਤੀਆਂ ਦਾ ਸਮਰਥਨ ਕੀਤਾ ਹੈ ਜਿਨ੍ਹਾਂ ਨੇ ਲੱਖਾਂ ਲੋਕਾਂ ਦੀਆਂ ਜ਼ਿੰਦਗੀਆਂ ਬਰਬਾਦ ਕਰ ਦਿੱਤੀਆਂ ਅਤੇ ਕੈਨੇਡੀਅਨ ਨੌਕਰੀਆਂ ਨੂੰ ਅਮਰੀਕਾ ਵਿਚ ਜਾਣ ਦਿੱਤਾ।

ਪੌਲੀਐਵ ਨੇ ਕਿਹਾ ਕਿ ਕਾਰਨੀ ਅਤੇ ਟਰੂਡੋ ਵਿਚ ਕੋਈ ਫਰਕ ਨਹੀਂ ਦੋਵੇਂ ਇੱਕੋ-ਜਿਹੇ ਹਨ। ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਦੀ ਕੰਜ਼ਰਵੇਟਿਵ ਸਰਕਾਰ ਹੀ ਇੱਕ ਅਜਿਹੀ ਸਰਕਾਰ ਹੋਵੇਗੀ ਜੋ ਕਾਰਬਨ ਟੈਕਸ ’ਤੇ ਕੈਂਚੀ ਚਲਾਵੇਗੀ, ਪੂੰਜੀ ਲਾਭ ਟੈਕਸ ਵਿਚ ਵਾਧੇ ਨੂੰ ਰੱਦ ਕਰੇਗੀ ਅਤੇ ਪਾਈਪਲਾਈਨ ਪ੍ਰੋਜੈਕਟ ਨੂੰ ਮਨਜ਼ੂਰੀ ਦੇਵੇਗੀ ਤੇ ਕੈਨੇਡਾ ਨੂੰ ਪਹਿਲ ’ਤੇ ਰੱਖੇਗੀ।

ਗੌਰਤਲਬ ਹੈ ਕਿ ਪੌਲੀਐਵ ਲਗਾਤਾਰ ਕਾਰਨੀ ’ਤੇ ਹਮਲਾਵਰ ਹਨ ਕਿਉਂਕਿ ਮੰਨਿਆ ਜਾ ਰਿਹਾ ਹੈ ਕਿ ਉਹ ਲਿਬਰਲ ਪਾਰਟੀ ਦੀ ਲੀਡਰਸ਼ਿਪ ਰੇਸ ਜਿੱਤ ਸਕਦੇ ਹਨ।