ਸਰੀ ਵਿਚ ਅੱਜ ਸ਼ਾਮ ਪੀਅਰ ਪੌਲੀਐਵ ਵਲੋਂ ਕੀਤੀ ਜਾਵੇਗੀ ਚੋਣ ਰੈਲੀ

ਸਰੀ ਵਿਚ ਅੱਜ ਸ਼ਾਮ ਕੰਜ਼ਰਵੇਟਿਵ ਲੀਡਰ ਪੀਅਰ ਪੌਲੀਐਵ ਵਲੋਂ ਚੋਣ ਰੈਲੀ ਕੀਤੀ ਜਾਵੇਗੀ। ਉਨ੍ਹਾਂ ਇਸ ਦਾ ਵੇਰਵਾ ਜਾਰੀ ਕਰ ਦਿੱਤਾ ਹੈ। ਪੌਲੀਐਵ ਦੀ ਕੈਨੇਡਾ ਫਸਟ ਨਾਂ ਦੀ ਇਹ ਰੈਲੀ 9690 192nd ਸਟ੍ਰੀਟ ਦੀ ਉਦਯੋਗਿਕ ਜ਼ਮੀਨ ਵਿਖੇ ਰੱਖੀ ਗਈ ਹੈ। ਇਸ ਵਿਚ ਲੋਕਾਂ ਨੂੰ ਸ਼ਾਮ 6 ਵਜੇ ਸ਼ਾਮਲ ਹੋਣ ਦਾ ਸੱਦਾ ਦਿੱਤਾ ਗਿਆ ਹੈ। ਇਸ ਵਿਚਕਾਰ ਸਰੀ-ਖੇਤਰ ਦੀਆਂ 6 ਰਾਈਡਿੰਗ ਦੇ ਉਮੀਦਵਾਰ ਵੀ ਪ੍ਰਚਾਰ ਕਰ ਰਹੇ ਹਨ।

ਕੰਜ਼ਰਵੇਟਿਵ ਪਾਰਟੀ ਦੇ ਉਮੀਦਵਾਰਾਂ ਵਿਚ ਸਰੀ ਸਿਟੀ ਸੈਂਟਰ ਤੋਂ ਰਾਜਵੀਰ ਢਿੱਲੋਂ, ਲਿਬਰਲ ਦੇ ਰਣਦੀਪ ਸਰਾਏ ਖਿਲਾਫ ਚੋਣ ਮੈਦਾਨ ਵਿਚ ਹਨ। ਉੱਥੇ ਹੀ, ਸਰੀ ਨਿਊਟਨ ਤੋਂ ਕੰਜ਼ਰਵੇਟਿਵ ਨੇ ਲਿਬਰਲ ਦੇ ਸੁੱਖ ਧਾਲੀਵਾਲ ਦੇ ਮੁਕਾਬਲੇ ਵਿਚ ਹਰਜੀਤ ਸਿੰਘ ਗਿੱਲ ਨੂੰ ਉਤਾਰਿਆ ਹੈ।

ਫਲੀਟਵੁੱਡ-ਪੋਰਟ ਕੇਲਸ ਵਿਚ ਲਿਬਰਲਸ ਵਲੋਂ ਗੁਰਬਖਸ਼ ਸੈਣੀ ਅਤੇ ਕੰਜ਼ਰਵੇਟਿਵ ਵਲੋਂ ਸੁੱਖ ਪੰਧੇਰ ਉਮੀਦਵਾਰ ਹਨ। ਗੌਰਤਲਬ ਹੈ ਕਿ ਚੋਣਾਂ ਦੀ ਘੋਸ਼ਣਾ ਤੋਂ ਬਾਅਦ ਬੀਸੀ ਵਿਚ ਇਹ ਕਿਸੇ ਫੈਡਰਲ ਪਾਰਟੀ ਦੇ ਲੀਡਰ ਦਾ ਪਹਿਲਾ ਦੌਰਾ ਹੈ।