20.01C Vancouver 20.01C VancouverNov 9, 2020 11:31 PM -
ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਕੈਨੇਡਾ ਵਾਸੀਆਂ ਨੂੰ ਅਪੀਲ ਕੀਤੀ ਹੈ ਕਿ ਮਾਸਕ ਪਹਿਨਣਾ ਜਾਰੀ ਰੱਖਿਆ ਜਾਵੇ, ਸ਼ਰੀਰਕ ਦੂਰੀ ਬਣਾ ਕੇ ਰੱਖੀ ਜਾਵੇ ਅਤੇ ਸਾਫ-ਸਫ਼ਾਈ ਦਾ ਵੀ ਧਿਆਨ ਦਿੱਤਾ ਜਾਵੇ।
ਉਨ੍ਹਾਂ ਕਿਹਾ ਕਿ ਵੈਕਸੀਨ ਉਪਲਭਧ ਹੋਣ 'ਚ ਅਜੇ ਕੁਝ ਸਮਾਂ ਲੱਗ ਸਕਦਾ ਹੈ।
ਟਰੂਡੋ ਨੇ ਅੱਜ ਔਟਵਾ 'ਚ ਇੱਕ ਪ੍ਰੈਸ ਕਾਨਫਰੰਸ ਦੌਰਾਨ ਕਿਹਾ ਕਿ ਅੱਜ ਦੀ ਸਵੇਰ ਕੈਨੇਡਾ ਵਾਸੀਆਂ ਲਈ ਇੱਕ ਚੰਗੀ ਖਬਰ ਲੈਕੇ ਆਈ ਹੈ, ਅਤੇ ਫਾਈਜ਼ਰ ਨੇ ਵੈਕਸੀਨ 'ਚ ਮਿਲੀ ਸ਼ੁਰੂਆਤੀ ਕਾਮਯਾਬੀ ਬਾਰੇ ਦੱਸਿਆ ਹੈ।
ਉਨ੍ਹਾਂ ਦੱਸਿਆ ਕਿ ਕੈਨੇਡਾ ਦਾ ਵੈਕਸੀਨ ਦੇ 20 ਮਿਲੀਅਨ ਡੋਜ਼ ਦਾ ਕਰਾਰ ਕੀਤਾ ਹੋਇਆ ਹੈ।
ਟਰੂਡੋ ਨੇ ਨਾਲ ਹੀ ਕਿਹਾ ਕਿ ਅਗਲੇ ਸਾਲ ਤੱਕ ਵੈਕਸੀਨ ਦੇ ਉਪਲਬਧ ਹੋਣ ਦੀ ਸੰਭਾਵਨਾ ਬਣ ਗਈ ਹੈ।
ਪਰ ਉਨ੍ਹਾਂ ਕਿਹਾ ਕਿ ਫ਼ਿਲਹਾਲ ਕੋਵਿਡ-19 ਸੰਬੰਧੀ ਨਿਰਦੇਸ਼ਾਂ ਦੀ ਪਾਲਣਾ ਕਰਨਾ ਬੇਹੱਦ ਜ਼ਰੂਰੀ ਹੈ।
ਟਰੂਡੋ ਨੇ ਕਿਹਾ, ਅਮਰੀਕਾ ਨਾਲ ਅੱਗੇ ਕੰਮ ਕਰਨ ਨੂੰ ਤਿਆਰ ਪਰ ਕੈਨੇਡਾ ਦੇ ਹਿਤ ਹਮੇਸ਼ਾ ਰਹਿਣਗੇ ਪ੍ਰਮੁੱਖ
ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਅੱਜ ਕਿਹਾ ਹੈ ਕਿ ਕੈਨੇਡਾ ਅਤੇ ਅਮਰੀਕਾ ਦਾ ਇੱਕ ਨਿਵੇਕਲਾ ਰਿਸ਼ਤਾ ਹੈ, ਅਤੇ ਇਹ ਮਜ਼ਬੂਤ ਰਿਸ਼ਤਾ ਹਮੇਸ਼ਾ ਇੱਕ ਚੰਗੇ ਭਵਿੱਖ ਦੀ ਬੁਨਿਆਦ ਸਾਬਿਤ ਹੁੰਦਾ ਰਹੇਗਾ।
ਉਨ੍ਹਾਂ ਉਚੇਚੇ ਤੌਰ 'ਤੇ ਵਾਈਸ-ਪ੍ਰੈਜ਼ੀਡੈਂਟ ਇਲੈਕਟ, ਕਮਲਾ ਹੈਰਿਸ ਨੂੰ ਵਧਾਈ ਦਿੰਦਿਆਂ ਕਿਹਾ ਕਿ ਇੱਕ ਸਿਆਹ ਰੰਗ ਦੀ ਅਤੇ ਦੱਖਣ ਏਸ਼ੀਆਈ ਮੂਲ ਦੀ ਔਰਤ ਦਾ ਇਸ ਅਹੁਦੇ ਲਈ ਚੁਣਿਆ ਜਾਣਾ ਇਤਿਹਾਸਿਕ ਹੈ।
ਟਰੂਡੋ ਨੇ ਕਿਹਾ ਕਿ ਇਹ ਬੇਹੱਦ ਉਤਸ਼ਾਹਿਤ ਕਰਦਾ ਹੈ ਅਤੇ ਦਰਸ਼ਾਉਂਦਾ ਹੈ ਕਿ ਰਾਜਨੀਤੀ 'ਚ ਸਭ ਦੀ ਆਵਾਜ਼ ਸੁਣੀ ਜਾਂਦੀ ਹੈ।
ਟਰੂਡੋ ਨੇ ਕਿਹਾ ਕਿ ਉਹ ਅਮਰੀਕਾ 'ਚ ਨਵੇਂ ਪ੍ਰਸ਼ਾਸਨ ਨਾਲ ਕੰਮ ਕਰਨ ਲਈ ਉਤਸ਼ਾਹਿਤ ਹਨ, ਪਰ ਉਨ੍ਹਾਂ ਕਿਹਾ ਕਿ ਕੈਨੇਡਾ ਦੇ ਹਿਤ ਹਮੇਸ਼ਾ ਪ੍ਰਮੁੱਖ ਰਹਿਣਗੇ।
ਟਰੂਡੋ ਨੇ ਯੂਨੀਵਰਸਲ ਬ੍ਰੌਡਬੈਂਡ ਫ਼ੰਡ ਦਾ ਕੀਤਾ ਐਲਾਨ
ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਅੱਜ ਸਵੇਰੇ ਔਟਵਾ 'ਚ ਇੱਕ ਪ੍ਰੈਸ ਕਾਨਫਰੰਸ ਦੌਰਾਨ 'ਯੂਨੀਵਰਸਲ ਬ੍ਰੌਡਬੈਂਡ ਫ਼ੰਡ' ਦਾ ਐਲਾਨ ਕੀਤਾ ਹੈ।
ਇਸ 'ਚ 1.75 ਬਿਲੀਅਨ ਡਾਲਰ ਦਾ ਫੰਡ ਐਲਾਨਿਆ ਗਿਆ ਹੈ।
ਇਸ ਫੰਡ ਆਸਰੇ ਪੇਂਡੂ ਜਾਂ ਪਿੱਛੜੇ ਇਲਾਕਿਆਂ 'ਚ ਹਾਈ-ਸਪੀਡ ਇੰਟਰਨੈਟ ਉਪਲਬਧ ਕਰਵਾਇਆ ਜਾਵੇਗਾ।
ਉਨ੍ਹਾਂ ਕਿਹਾ ਕਿ ਇਸ ਫੰਡ 'ਚ 600 ਮਿਲੀਅਨ ਡਾਲਰ ਦਾ ਕਰਾਰ ਵੀ ਸ਼ਾਮਿਲ ਹੈ, ਜੋ ਕਿ ਟੈਲਸੈਟ ਨਾਮ ਦੀ ਕੰਪਨੀ ਨਾਲ ਹੋਇਆ ਹੈ, ਜਿਸ ਆਸਰੇ ਪੇਂਡੂ ਇਲਾਕਿਆਂ 'ਚ ਹਾਈ ਸਪੀਡ ਇੰਟਰਨੈਟ 'ਤੇ ਕੰਮ ਕੀਤਾ ਜਾਵੇਗਾ।
ਇਸ ਪਲੈਨ ਤਹਿਤ ਸਾਲ 2026 ਤੱਕ 98% ਕਨੇਡੀਅਨ ਲੋਕਾਂ ਨੂੰ ਹਾਈ ਸਪੀਡ ਇੰਟਰਨੈਟ ਨਾਲ ਜੋੜਿਆ ਜਾ ਸਕੇਗਾ।
