ਪੌਲੀਐਵ ਨੇ ਇਨਕਮ ਟੈਕਸ ਵਿਚ ਕਟੌਤੀ ਕਰਨ ਅਤੇ ਕਾਰਬਨ ਟੈਕਸ ਨੂੰ ਪੂਰੀ ਤਰ੍ਹਾਂ ਖ਼ਤਮ ਕਰਨ ਦੀ ਕੀਤੀ ਘੋਸ਼ਣਾ

ਕੰਜ਼ਰਵੇਟਿਵ ਲੀਡਰ ਪੀਅਰ ਪੌਲੀਐਵ ਨੇ ਪ੍ਰਧਾਨ ਮੰਤਰੀ ਬਣਨ 'ਤੇ ਇਨਕਮ ਟੈਕਸ ਵਿਚ ਕਟੌਤੀ ਕਰਨ ਅਤੇ ਕਾਰਬਨ ਟੈਕਸ ਨੂੰ ਪੂਰੀ ਤਰ੍ਹਾਂ ਖ਼ਤਮ ਕਰਨ ਦੀ ਘੋਸ਼ਣਾ ਕੀਤੀ ਹੈ। ਉਨ੍ਹਾਂ ਕਿਹਾ ਕਿ ਉਹ ਸਭ ਤੋਂ ਘੱਟ ਟੈਕਸ ਬਰੈਕਟ ਦੀ ਦਰ ਨੂੰ 15 ਫੀਸਦੀ ਤੋਂ ਘਟਾ ਕੇ 12.75 ਫੀਸਦੀ ਕਰ ਦੇਣਗੇ, ਜਿਸ ਨਾਲ ਪ੍ਰਤੀ ਵਿਅਕਤੀ ਨੂੰ ਪ੍ਰਤੀ ਸਾਲ $900 ਦੀ ਬਚਤ ਹੋਵੇਗੀ। ਇਸ ਦੇ ਨਾਲ ਹੀ ਉਨ੍ਹਾਂ ਲਿਬਰਲ ਪਾਰਟੀ ਅਤੇ ਇਸ ਦੇ ਲੀਡਰ ਮਾਰਕ ਕਾਰਨੀ 'ਤੇ ਹਮਲਾ ਬੋਲਿਆ।

ਓਨਟਾਰੀਓ ਦੇ ਨੌਰਥ ਯੌਰਕ ਵਿਚ ਰੈਲੀ ਨੂੰ ਸੰਬੋਧਨ ਕਰਦੇ ਉਨ੍ਹਾਂ ਕਿਹਾ ਕਿ ਲਿਬਰਲ ਨੇ 7 ਸਾਲ ਕਾਰਬਨ ਟੈਕਸ ਨੂੰ ਲਾਗੂ ਰੱਖਣ ਮਗਰੋਂ ਬੜੀ ਚਾਲਾਕੀ ਨਾਲ ਇਸ ਨੂੰ ਇਲੈਕਸ਼ਨ ਤੋਂ 30 ਦਿਨ ਪਹਿਲਾਂ ਸਿਰਫ ਗੈਸ ਸਟੇਸ਼ਨ 'ਤੇ ਮੁਲਤਵੀ ਕੀਤਾ ਹੈ, ਨਾ ਕਿ ਇਸ ਨੂੰ ਰੱਦ ਕੀਤਾ ਹੈ। ਪੌਲੀਐਵ ਨੇ ਕਿਹਾ ਕਿ ਕੰਜ਼ਰਵੇਟਿਵ ਦੇ ਸੱਤਾ ਵਿਚ ਆਉਣ 'ਤੇ ਉਹ ਇਸ ਕਾਨੂੰਨ ਨੂੰ ਨਾ ਸਿਰਫ ਆਮ ਲੋਕਾਂ ਸਗੋਂ ਹਰ ਕਿਸੇ ਲਈ ਪੂਰੀ ਤਰ੍ਹਾਂ ਰੱਦ ਕਰ ਦੇਣਗੇ।

ਗੌਰਤਲਬ ਹੈ ਕਿ ਕਾਰਨੀ ਨੇ ਵੀ ਮਿਡਲ ਕਲਾਸ ਨੂੰ ਇਨਕਮ ਟੈਕਸ ਵਿਚ ਕਰੀਬ 400 ਡਾਲਰ ਦੀ ਰਾਹਤ ਦੇਣ ਲਈ ਸਭ ਤੋਂ ਨੀਵੇਂ ਬਰੈਕਟ ਵਿਚ ਕਟੌਤੀ ਕਰਨ ਦਾ ਵਾਅਦਾ ਕੀਤਾ ਹੈ।