ਕੈਨੇਡਾ ਪੋਸਟ ਦੇ ਬੋਨਸ ਨੂੰ ਲੈ ਕੇ ਪੌਲੀਐਵ ਨੇ ਲਿਬਰਲ ਸਰਕਾਰ 'ਤੇ ਸਾਧਿਆ ਨਿਸ਼ਾਨਾ

ਕੰਜ਼ਰਵੇਟਿਵ ਲੀਡਰ ਪੀਅਰ ਪੌਲੀਐਵ ਨੇ ਕੈਨੇਡਾ ਪੋਸਟ ਵਿਚ ਹਾਲ ਹੀ ਵਿਚ ਉੱਚ ਅਧਿਕਾਰੀਆਂ ਨੂੰ ਮਿਲੇ ਬੋਨਸ ਨੂੰ ਲੈ ਕੇ ਲਿਬਰਲ ਸਰਕਾਰ 'ਤੇ ਨਿਸ਼ਾਨਾ ਸਾਧਿਆ ਹੈ। ਉਨ੍ਹਾਂ ਨੇ ਦੋਸ਼ ਲਾਇਆ ਕਿ ਕਾਰਨੀ ਸਰਕਾਰ ਵਿਚ ਰਸੂਖਦਾਰ ਟੈਕਸਦਾਤਾ ਦੇ ਪੈਸੇ ਦੀ ਵਰਤੋਂ ਸਿਰਫ ਆਪਣੇ ਫਾਇਦੇ ਲਈ ਕਰ ਰਹੇ ਹਨ। ਪੌਲੀਐਵ ਨੇ ਕਿਹਾ ਕਿ ਜਿੱਥੇ ਆਮ ਕੈਨੇਡੀਅਨਜ਼ ਮਹਿੰਗਾਈ ਕਾਰਨ ਗ੍ਰੋਸਰੀ ਖਰੀਦਣ ਲਈ ਵੀ ਸੰਘਰਸ਼ ਕਰ ਰਹੇ ਹਨ, ਉੱਥੇ ਹੀ ਭਾਰੀ ਘਾਟੇ ਵਿਚ ਚੱਲ ਰਹੇ ਕੈਨੇਡਾ ਪੋਸਟ ਦੇ ਉੱਚ ਅਧਿਕਾਰੀਆਂ ਨੂੰ $30 ਮਿਲੀਅਨ ਦੇ ਬੋਨਸ ਦਿੱਤੇ ਗਏ।

ਕੰਜ਼ਰਵੇਟਿਵ ਲੀਡਰ ਨੇ ਸਰਕਾਰ ਦੀਆਂ ਨੀਤੀਆਂ ਦੀ ਆਲੋਚਨਾ ਕਰਦਿਆਂ ਕਿਹਾ ਕਿ ਆਮ ਜਨਤਾ ਦੇ ਹਿੱਸੇ ਸਿਰਫ਼ ਟੈਕਸ, ਮਹਿੰਗਾਈ ਅਤੇ ਕਰਜ਼ਾ ਆ ਰਿਹਾ ਹੈ, ਜਦੋਂ ਕਿ ਸਰਕਾਰੀ ਰਸੂਖਦਾਰਾਂ ਨੂੰ ਬੋਨਸ ਅਤੇ ਬੇਲਆਉਟ ਦੇ ਕੇ ਨਿਵਾਜਿਆ ਜਾ ਰਿਹਾ ਹੈ। ਉਨ੍ਹਾਂ ਵਾਅਦਾ ਕੀਤਾ ਕਿ ਉਹ ਇਸ ਸਰਕਾਰੀ ਫ਼ਜ਼ੂਲਖ਼ਰਚੀ ਨੂੰ ਰੋਕਣ ਅਤੇ ਜਨਤਾ ਦਾ ਪੈਸਾ ਉਨ੍ਹਾਂ ਦੀਆਂ ਜੇਬਾਂ ਵਿਚ ਵਾਪਸ ਪਹੁੰਚਾਉਣ ਲਈ ਸੰਘਰਸ਼ ਜਾਰੀ ਰੱਖਣਗੇ।

ਗੌਰਤਲਬ ਹੈ ਕਿ ਪਿਛਲੇ ਦਿਨੀਂ ਸਾਹਮਣੇ ਆਇਆ ਸੀ ਕਿ ਕੈਨੇਡਾ ਪੋਸਟ ਨੇ 2025 ਵਿਚ $1.57 ਬਿਲੀਅਨ ਦਾ ਰਿਕਾਰਡ ਘਾਟਾ ਝੱਲਣ ਦੇ ਬਾਵਜੂਦ ਆਪਣੇ ਮੈਨੇਜਮੈਂਟ ਸਟਾਫ਼ ਨੂੰ $30.8 ਮਿਲੀਅਨ ਦੇ ਬੋਨਸ ਵੰਡੇ ਹਨ। ਦੱਸਿਆ ਜਾਂਦਾ ਹੈ ਕਿ ਇਹ ਰਕਮ 2,377 ਮੈਨੇਜਮੈਂਟ ਕਰਮਚਾਰੀਆਂ ਵਿਚ ਵੰਡੀ ਗਈ ਹੈ, ਜਿਸ ਵਿਚ 417 ਉੱਚ ਪੱਧਰੀ ਕਾਰਜਕਾਰੀ ਸ਼ਾਮਲ ਸਨ, ਯਾਨੀ ਔਸਤ ਹਰ ਕਾਰਜਕਾਰੀ ਤੇ ਮੈਨੇਜਰ ਨੂੰ ਲਗਭਗ $13,000 ਦਾ ਬੋਨਸ ਮਿਲਿਆ ਹੈ।