18.49C Vancouver 18.49C VancouverMar 25, 2025 4:08 PM - Connect Newsroom
ਕੰਜ਼ਰਵੇਟਿਵ ਲੀਡਰ ਪੀਅਰ ਪੌਲੀਐਵ ਅਤੇ ਲਿਬਰਲ ਲੀਡਰ ਮਾਰਕ ਕਾਰਨੀ ਵਿਚਕਾਰ ਮੁਕਾਬਲਾ ਫਸਵਾਂ ਹੋ ਗਿਆ ਹੈ,ਦੋਵੇਂ ਲੀਡਰਸ ਕੈਨੇਡੀਅਨਾਂ ਨੂੰ ਲੁਭਾਉਣ ਲਈ ਪਹਿਲੀ ਵਾਰ ਘਰ ਖਰੀਦਣ ਵਾਲਿਆਂ ਨੂੰ ਟਾਰਗੇਟ ਕਰ ਰਹੇ ਹਨ। ਮੰਗਲਵਾਰ ਨੂੰ ਇੱਕ ਘੋਸ਼ਣਾ ਵਿਚ ਪੌਲੀਐਵ ਨੇ $1.3 ਮਿਲੀਅਨ ਤੱਕ ਦੇ ਨਵੇਂ ਘਰਾਂ 'ਤੇ ਜੀ.ਐਸ.ਟੀ. ਨੂੰ ਖਤਮ ਕਰਨ ਦਾ ਵਾਅਦਾ ਕੀਤਾ।
ਪੌਲੀਐਵ ਮੁਤਾਬਕ,ਇਸ ਕਦਮ ਨਾਲ ਵੱਡੇ ਸ਼ਹਿਰਾਂ ਵਿਚ ਘਰ ਖਰੀਦਣ 'ਤੇ ਕੈਨੇਡੀਅਨਾਂ ਨੂੰ $65,000 ਤੱਕ ਦੀ ਬਚਤ ਹੋਵੇਗੀ। ਇਸ ਤੋਂ ਪਹਿਲਾਂ ਪਿਛਲੇ ਹਫ਼ਤੇ ਲਿਬਰਲ ਪਾਰਟੀ ਦੇ ਲੀਡਰ ਮਾਰਕ ਕਾਰਨੀ ਨੇ ਐਲਾਨ ਕੀਤਾ ਸੀ ਕਿ ਜੇ ਉਨ੍ਹਾਂ ਦੀ ਪਾਰਟੀ ਦੀ ਸੱਤਾ ਵਿਚ ਵਾਪਸੀ ਹੋਈ ਤਾਂ ਪਹਿਲੀ ਵਾਰ ਘਰ ਖਰੀਦਣ ਵਾਲਿਆਂ ਲਈ $1 ਮਿਲੀਅਨ ਤੱਕ ਦੇ ਘਰਾਂ ਨੂੰ ਜੀ.ਐੱਸ.ਟੀ. ਮੁਕਤ ਕਰ ਦਿੱਤਾ ਜਾਵੇਗਾ, ਜਿਸ ਨਾਲ ਖਰੀਦਦਾਰਾਂ ਦੇ $50,000 ਬਚਣਗੇ।
ਗੌਰਤਲਬ ਹੈ ਕਿ ਲੇਜਰ ਦੇ ਤਾਜ਼ਾ ਸਰਵੇ ਮੁਤਾਬਕ,ਲਿਬਰਲ ਹੁਣ ਕੰਜ਼ਰਵੇਟਿਵ ਤੋਂ 6 ਪੁਆਇੰਟ ਅੱਗੇ ਹੋ ਗਏ ਹਨ। 44 ਫੀਸਦੀ ਫੈਸਲਾਕੁੰਨ ਵੋਟਰਾਂ ਨੇ ਇਨ੍ਹਾਂ ਚੋਣਾਂ ਵਿਚ ਲਿਬਰਲਸ ਨੂੰ ਸਪੋਰਟ ਕਰਨ ਦੀ ਗੱਲ ਆਖੀ ਹੈ,ਜਦੋਂ ਕਿ 38 ਫੀਸਦੀ ਨੇ ਕੰਜ਼ਰਵੇਟਿਵ ਦਾ ਸਮਰਥਨ ਕੀਤਾ ਹੈ। ਹਾਲਾਂਕਿ, ਕਿਹੜੀ ਪਾਰਟੀ ਬਹੁਮਤ ਹਾਸਲ ਕਰਦੀ ਹੈ ਇਹ 28 ਅਪ੍ਰੈਲ ਨੂੰ ਤੈਅ ਹੋ ਜਾਵੇਗਾ।
