ਪੀਅਰ ਪੌਲੀਐਵ ਨੇ ਆਪਣੀ ਸਰਕਾਰ ਬਣਨ 'ਤੇ ਕਾਰਬਨ ਕੀਮਤ ਕਾਨੂੰਨ ਨੂੰ ਪੂਰੀ ਤਰ੍ਹਾਂ ਖਤਮ ਕਰਨ ਦਾ ਕੀਤਾ ਵਾਅਦਾ

ਕੰਜ਼ਰਵੇਟਿਵ ਲੀਡਰ ਪੀਅਰ ਪੌਲੀਐਵ ਨੇ ਘੋਸ਼ਣਾ ਕੀਤੀ ਹੈ ਕਿ ਜੇ ਉਨ੍ਹਾਂ ਦੀ ਸਰਕਾਰ ਬਣੀ ਤਾਂ ਉਹ ਕਾਰਬਨ ਕੀਮਤ ਕਾਨੂੰਨ ਨੂੰ ਪੂਰੀ ਤਰ੍ਹਾਂ ਸਮਾਪਤ ਕਰ ਦੇਣਗੇ, ਜਿਸ ਵਿਚ ਕਾਰੋਬਾਰ ਅਤੇ ਉਦਯੋਗਿਕ ਕਾਰਬਨ ਚਾਰਜ ਵੀ ਸ਼ਾਮਲ ਹੈ। ਪੌਲੀਐਵ ਦੀ ਇਹ ਟਿੱਪਣੀ ਉਦੋਂ ਆਈ ਹੈ ਜਦੋਂ ਸ਼ੁੱਕਰਵਾਰ ਨੂੰ ਮਾਰਕ ਕਾਰਨੀ ਨੇ ਪ੍ਰਧਾਨ ਮੰਤਰੀ ਵਜੋਂ ਅਹੁਦਾ ਸੰਭਾਲਦੇ ਹੀ ਪੈਟਰੋਲ ਵਰਗੀਆਂ ਚੀਜ਼ਾਂ 'ਤੇ ਖਪਤਕਾਰ ਕਾਰਬਨ ਕੀਮਤ ਨੂੰ ਖਤਮ ਕਰਨ ਦੀ ਪ੍ਰਕਿਰਿਆ ਸ਼ੁਰੂ ਕੀਤੀ ਹੈ।

ਸੋਸ਼ਲ ਮੀਡੀਆ 'ਤੇ ਪੋਸਟ ਕੀਤੀ ਇੱਕ ਵੀਡੀਓ ਵਿਚ ਪੌਲੀਐਵ ਨੇ ਕਿਹਾ ਕਿ ਜੇ ਲਿਬਰਲਸ ਕਾਰਬਨ ਟੈਕਸ ਖਤਮ ਕਰਨ ਲਈ ਗੰਭੀਰ ਹਨ ਤਾਂ ਉਹ ਸੰਸਦ ਨੂੰ ਵਾਪਸ ਸੱਦਣ ਅਤੇ ਇਸ ਨੂੰ ਕਾਨੂੰਨ ਜ਼ਰੀਏ ਸਮਾਪਤ ਕਰਨ। ਪੌਲੀਐਵ ਨੇ ਕਿਹਾ ਕਿ ਉਨ੍ਹਾਂ ਦੀ ਸਰਕਾਰ ਸਾਫ਼ ਤਕਨਾਲੋਜੀ ਅਤੇ ਸਾਫ਼ ਨਿਰਮਾਣ ਟੈਕਸ ਕ੍ਰੈਡਿਟ ਦਾ ਵੀ ਵਿਸਥਾਰ ਕਰੇਗੀ।

ਗੌਰਤਲਬ ਹੈ ਕਿ ਸਿਰਫ ਮੈਨੀਟੋਬਾ, ਪ੍ਰਿੰਸ ਐਡਵਰਡ ਆਈਲੈਂਡ, ਯੂਕੋਨ ਅਤੇ ਨੂਨਵੱਟ ਹੀ ਫੈਡਰਲ ਉਦਯੋਗਿਕ ਕੀਮਤ ਪ੍ਰਣਾਲੀ ਦੀ ਵਰਤੋਂ ਕਰਦੇ ਹਨ, ਜਦੋਂ ਕਿ ਬਾਕੀ ਸਾਰੇ ਸੂਬਿਆਂ ਦਾ ਆਪਣਾ ਉਦਯੋਗਿਕ ਕਾਰਬਨ ਕੀਮਤ ਹੈ, ਜੋ ਫੈਡਰਲ ਕੀਮਤ ਦੀ ਤਰਜ 'ਤੇ ਹੀ ਇਸ ਨੂੰ ਚਾਰਜ ਕਰਦੇ ਹਨ।