13.58C Vancouver 13.58C VancouverJul 12, 2024 4:07 PM - The Canadian Press
ਕੈਨੇਡਾ ਦੀ ਮੁੱਖ ਵਿਰੋਧੀ ਧਿਰ ਦੇ ਲੀਡਰ ਪੀਅਰੇ ਪੋਲੀਵਰੇ ਨੇ ਨਾਟੋ ਸਮਿਟ ਵਿਚ ਕੈਨੇਡਾ ਦੇ ਅਲੱਗ-ਥਲੱਗ ਪੈਣ ’ਤੇ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ’ਤੇ ਵੱਡਾ ਹਮਲਾ ਬੋਲਿਆ ਹੈ। ਪੋਲੀਵਰੇ ਨੇ ਕਿਹਾ ਕਿ ਨਾਟੋ ਸਹਿਯੋਗੀਆਂ ਨੇ ਟਰੂਡੋ ਨੂੰ ਹਿਊਮਨ ਪਿਨਾਟਾ ਦੀ ਤਰ੍ਹਾਂ ਟਰੀਟ ਕੀਤਾ, ਯਾਨੀ ਉਨ੍ਹਾਂ ਨੂੰ ਖਾਸ ਮਹੱਤਵ ਨਹੀਂ ਮਿਲਿਆ।
ਟਰੂਡੋ ’ਤੇ ਹਮਲਾ ਬੋਲਦਿਆਂ ਕੰਜ਼ਰਵੇਟਿਵ ਲੀਡਰ ਨੇ ਕਿਹਾ ਕਿ ਲਿਬਰਲ ਸਰਕਾਰ ਦੇ ਸਾਸ਼ਨ ਵਿਚ ਕੈਨੇਡਾ ਨੇ ਅੰਤਰਰਾਸ਼ਟਰੀ ਮੰਚ ’ਤੇ ਆਪਣੀ ਸਾਖ਼ ਗੁਆ ਦਿੱਤੀ ਹੈ ਅਤੇ ਟਰੂਡੋ ਆਪਣੇ ਕਿਸੇ ਕੰਮ ਨੂੰ ਸਿਰੇ ਚੜ੍ਹਾਏ ਬਿਨਾਂ ਦੁਨੀਆ ਨੂੰ ਲੈਕਚਰ ਦੇ ਰਹੇ ਨੇ।
ਪੀ. ਐੱਮ. ਜਸਟਿਨ ਟਰੂਡੋ ਨੇ ਵੀਰਵਾਰ ਵਾਸ਼ਿੰਗਟਨ ਡੀ.ਸੀ. ਵਿਚ ਨਾਟੋ ਸੰਮੇਲਨ ਦੇ ਆਖਰੀ ਦਿਨ ਇਹ ਘੋਸ਼ਣਾ ਕੀਤੀ ਸੀ ਕਿ ਕੈਨੇਡਾ ਨੂੰ 2032 ਤੱਕ ਡਿਫੈਂਸ ’ਤੇ ਨਾਟੋ ਦੇ ਟਾਰਗੇਟ ਨੂੰ ਪੂਰਾ ਕਰਨ ਦੀ ਪੂਰੀ ਉਮੀਦ ਹੈ।
ਇਸ ’ਤੇ ਪੋਲੀਵਰੇ ਨੇ ਕਿਹਾ ਕਿ ਟਰੂਡੋ ਹੋਰ ਕੁਝ ਨਹੀਂ ਸਿਰਫ ਨਾਟੋ ਸਹਿਯੋਗੀਆਂ ਵਿਚ ਆਪਣੀ ਸਾਖ਼ ਬਚਾਉਣ ਦੀ ਕੋਸ਼ਿਸ਼ ਕਰ ਰਹੇ ਸਨ। ਪ੍ਰਧਾਨ ਮੰਤਰੀ ਨੇ ਇਸ ਦਾ ਕੋਈ ਰੋਡਮੈਪ ਨਹੀਂ ਦਿੱਤਾ ਕਿ ਕੈਨੇਡਾ ਇਸ ਟਾਰਗੇਟ ’ਤੇ ਕਿਵੇਂ ਪਹੁੰਚੇਗਾ।
ਗੌਰਤਲਬ ਹੈ ਕਿ 2014 ਵਿਚ ਨਾਟੋ ਮੈਂਬਰਾਂ ਨੇ ਆਪਣੀ ਜੀ. ਡੀ. ਪੀ.ਦਾ ਦੋ ਫੀਸਦੀ ਡਿਫੈਂਸ ’ਤੇ ਖਰਚ ਦਾ ਟੀਚਾ ਤੈਅ ਕੀਤਾ ਸੀ ਪਰ ਕੈਨੇਡਾ ਇੱਕ ਵਾਰ ਵੀ ਇਹ ਟਾਰਗੇਟ ਪੂਰਾ ਨਹੀਂ ਕਰ ਸਕਿਆ ਹੈ।
