ਸਰੀ ਫੇਰੀ ਦੌਰਾਨ ਪੌਲੀਐਵ ਨੇ ਐਕਸਟੌਰਸ਼ਨ ਨਾਲ ਨਜਿੱਠਣ ਲਈ ਐਕਸ਼ਨ ਪਲੈਨ ਕੀਤਾ ਜਾਰੀ

ਕੰਜ਼ਰਵੇਟਿਵ ਪਾਰਟੀ ਦੇ ਲੀਡਰ ਪੀਅਰ ਪੌਲੀਐਵ ਨੇ ਅੱਜ ਸਰੀ ਦੇ ਰੌਇਲ ਕਿੰਗ ਬੈਂਕੁਇਟ ਹਾਲ ਵਿਖੇ ਪੱਤਰਕਾਰ ਸੰਮੇਲਨ ਦੌਰਾਨ ਐਕਸਟੌਰਸ਼ਨ ਵਿਰੁੱਧ ਤਿੰਨ ਕਦਮਾਂ ਵਾਲਾ ਐਕਸ਼ਨ ਪਲੈਨ ਪੇਸ਼ ਕੀਤਾ। ਇਹ ਓਹੀ ਥਾਂ ਹੈ ਜਿੱਥੇ 21 ਜੁਲਾਈ 2025 ਨੂੰ ਗੋਲੀਬਾਰੀ ਦੀ ਘਟਨਾ ਵਾਪਰੀ ਸੀ।

ਉਨ੍ਹਾਂ ਦੇ ਨਾਲ ਐਬਟਸਫੋਰਡ–ਸਾਊਥ ਲੈਂਗਲੀ ਤੋਂ ਸੰਸਦ ਮੈਂਬਰ ਸੁਖਮਨ ਗਿੱਲ ਅਤੇ ਪਾਰਟੀ ਉਮੀਦਵਾਰ ਸੁੱਖ ਪੰਧੇਰ ਤੇ ਪੁਲਿਸ ਅਧਿਕਾਰੀ ਜੈਸੀ ਸਹੋਤਾ ਵੀ ਮੌਜੂਦ ਸਨ।

ਪੌਲੀਐਵ ਨੇ ਕਿਹਾ ਕਿ ਲਿਬਰਲ ਸਰਕਾਰ ਦੇ ਸਾਸ਼ਨ ਵਿਚ ਐਕਸਟੌਰਸ਼ਨ-ਸਬੰਧੀ ਅਪਰਾਧਾਂ ਵਿਚ 330 ਫੀਸਦੀ ਵਾਧਾ ਹੋਇਆ ਕਿਉਂਕਿ ਬਿੱਲ C-5 ਅਤੇ C-75 ਜ਼ਰੀਏ ਲਿਬਰਲਸ ਨੇ ਗੰਨ ਨਾਲ ਜ਼ਬਰਨ ਵਸੂਲੀ ਦੇ ਮਾਮਲਿਆਂ ਵਿਚ ਲਾਜ਼ਮੀ ਜੇਲ੍ਹ ਦੀ ਸਜ਼ਾ ਨੂੰ ਸਮਾਪਤ ਕਰ ਦਿੱਤਾ।

ਕੰਜ਼ਰਵੇਟਿਵ ਐਕਸ਼ਨ ਪਲੈਨ ਵਿਚ ਹੇਠ ਲਿਖੇ ਤਿੰਨ ਮੁੱਖ ਕਦਮ ਸ਼ਾਮਲ ਹਨ:

• ਬਿਸ਼ਨੋਈ ਗੈਂਗ ਨੂੰ ਦਹਿਸ਼ਤਗਰਦ ਗਰੁੱਪ ਵਜੋਂ ਤੁਰੰਤ ਘੋਸ਼ਿਤ ਕਰਨ ਦੀ ਮੰਗ।
• ਬਿੱਲ C-5 ਅਤੇ C-75 ਨੂੰ ਰੱਦ ਕਰਕੇ ਬੇਲ ਦੀ ਥਾਂ ਜੇਲ੍ਹ ਦੀ ਪੌਲਿਸੀ ਲਾਗੂ ਕਰਨ ਦੀ ਮੰਗ।
• ਸੰਸਦ ਮੈਂਬਰ ਟਿਮ ਉੱਪਲ ਦੇ ਬਿੱਲ ਦਾ ਸਮਰਥਨ ਕਰਨਾ, ਜਿਸ ਵਿਚ ਐਕਸਟੌਰਸ਼ਨ ਕ੍ਰਾਈਮ ਲਈ ਘੱਟੋ-ਘੱਟ 4 ਤੋਂ 7 ਸਾਲ ਦੀ ਜੇਲ੍ਹ ਹੋਣਾ ਲਾਜ਼ਮੀ ਅਤੇ ਫਿਰੌਤੀ ਲਈ ਗੋਲੀ ਚਲਾਉਣ ਜਾਂ ਅੱਗਜ਼ਨੀ ਕਰਨ ਦੇ ਮਾਮਲੇ ਵਿਚ ਵਾਧੂ ਸਜ਼ਾ ਦੀ ਮੰਗ ਸ਼ਾਮਲ ਹੈ।

ਪੀਅਰ ਪੌਲੀਐਵ ਨੇ ਕਿਹਾ ਕਿ ਇਹ ਤਿੰਨ ਪ੍ਰਸਤਾਵ ਕੰਜ਼ਰਵੇਟਿਵ ਪਾਰਟੀ ਵਲੋਂ ਪਤਝੜ ਦੇ ਸੰਸਦੀ ਸੈਸ਼ਨ ਦੌਰਾਨ ਪੇਸ਼ ਕੀਤੇ ਜਾਣਗੇ ਤਾਂ ਜੋ ਲੋਕਾਂ ਦੀ ਸੁਰੱਖਿਆ ਮੁੜ ਬਹਾਲ ਕੀਤੀ ਜਾ ਸਕੇ।