11.25C Vancouver 11.25C VancouverMay 3, 2021 3:12 PM -
ਸ਼ਨੀਵਾਰ ਦੁਪਹਿਰ ਨੂੰ ਡੈਲਟਾ ਮਾਲ ਦੇ ਬਾਹਰ ਵਾਪਰੀ ਗੋਲੀ ਚੱਲਣ ਦੀ ਵਾਰਦਾਤ ਵਿਚ ਮ੍ਰਿਤਕ ਦੀ ਪਛਾਣ 29 ਸਾਲਾ ਪ੍ਰੋਵਿੰਸ਼ੀਅਲ ਕਰੈਕਸ਼ਨਸ ਅਫਸਰ ਬਿਕਰਮਦੀਪ ਰੰਧਾਵਾ ਵਜੋਂ ਕੀਤੀ ਗਈ ਹੈ।
ਇਹ ਘਟਨਾ 72 ਐਵੇਨਿਊ ਅਤੇ 120 ਸਟਰੀਟ ਤੇ ਸਥਿਤ ਸਕਾਟਸਡੇਲ ਸੈਂਟਰ ਦੇ ਬਾਹਰ ਤਕਰੀਬਨ 5 ਵਜੇ ਵਾਪਰੀ।
ਡੈਲਟਾ ਪੁਲਿਸ ਮੁਤਾਬਕ ਮ੍ਰਿਤਕ ਨੂੰ ਮਿੱਥ ਕੇ ਨਿਸ਼ਾਨਾ ਬਣਾਇਆ ਮੰਨਿਆ ਜਾ ਰਿਹਾ ਹੈ ਅਤੇ ਉਸ ਨਾਲ ਪੁਲਿਸ ਵਾਕਫ਼ ਨਹੀਂ ਸੀ।
ਟਵਿੱਟਰ ਤੇ ਸਾਂਝੀ ਕੀਤੀ ਗਈ ਇਕ ਵੀਡੀਓ ਵਿੱਚ ਇੱਕ ਵਿਅਕਤੀ ਨੂੰ ਪਾਰਕਿੰਗ ਲਾਟ ਦੇ ਵਿੱਚ ਭੱਜਦਿਆਂ ਅਤੇ ਫੇਰ ਇੱਕ ਗੱਡੀ ਵਿੱਚ ਬਹਿੰਦਿਆਂ ਦੇਖਿਆ ਜਾ ਸਕਦਾ ਹੈ।
ਵੀਡੀਓ ਵਿੱਚ ਗੱਡੀ ਫੇਰ ਉੱਥੋਂ ਤੇਜ਼ੀ ਨਾਲ ਜਾਂਦੀ ਦੇਖੀ ਜਾ ਸਕਦੀ ਹੈ।
ਪੁਲਿਸ ਮੁਤਾਬਕ ਸ਼ੱਕੀ ਵਾਹਨ ਨੂੰ ਬਰਨਬੀ ਵਿੱਚ ਕੁਝ ਸਮੇਂ ਬਾਅਦ ਅੱਗ ਲਾ ਦਿੱਤੀ ਗਈ ਸੀ।
ਡੈਲਟਾ ਪੁਲਿਸ ਮੁਤਾਬਕ ਮ੍ਰਿਤਕ ਨੂੰ ਕਿਉਂ ਨਿਸ਼ਾਨਾ ਬਣਾਇਆ ਗਿਆ ਇਸ ਦੀ ਜਾਂਚ ਕੀਤੀ ਜਾ ਰਹੀ ਹੈ।
ਅਧਿਕਾਰੀਆਂ ਅਨੁਸਾਰ ਜਾਂਚਕਰਤਾ ਹਰ ਪੱਖੋਂ ਮਾਮਲੇ ਦੀ ਪੜਤਾਲ ਕਰ ਰਹੇ ਹਨ, ਇਸ ਵਿੱਚ ਮ੍ਰਿਤਕ ਨੂੰ ਕੋਈ ਹੋਰ ਸਮਝਕੇ ਮਾਰਨ ਦੀ ਸੰਭਾਵਨਾ ਜਾਂ ਨਿਜੀ ਜਾਂ ਕੰਮ ਕਾਰਣ ਨਿਸ਼ਾਨਾ ਬਣਾਉਣ ਦੀ ਸੰਭਾਵਨਾ ਵਰਗੇ ਪਹਿਲੂ ਵੀ ਸ਼ਾਮਲ ਹਨ।
ਫਿਲਹਾਲ ਇਸ ਸਬੰਧ ਵਿਚ ਕੋਈ ਗ੍ਰਿਫਤਾਰੀ ਨਹੀਂ ਕੀਤੀ ਗਈ।
