11.79C Vancouver 11.79C VancouverFeb 1, 2021 4:35 PM -
ਬ੍ਰਿਟਿਸ਼ ਕੋਲੰਬੀਆ ਦੇ ਸਿਹਤ ਅਧਿਕਾਰੀ ਇਸ ਗੱਲ ਦੀ ਪੁਸ਼ਟੀ ਕਰਨ ਦੇ ਯਤਨ ਕਰ ਰਹੇ ਹਨ ਕਿ ਮੇਪਲ ਰਿੱਜ ਦੇ ਇੱਕ ਹਾਈ ਸਕੂਲ ਦੇ ਵਿਦਿਆਰਥੀਆਂ ਅਤੇ ਸਟਾਫ ਦਾ ਸੰਪਰਕ ਕੋਵਿਡ-19 ਦੇ ਨਵੇਂ ਅਤੇ ਜ਼ਿਆਦਾ ਤੇਜ਼ੀ ਨਾਲ ਫੈਲਣ ਵਾਲੇ ਵੇਰੀਐਂਟ ਨਾਲ ਹੋਇਆ ਹੈ ਜਾਂ ਨਹੀਂ।
ਐਤਵਾਰ ਨੂੰ ਫਰੇਜ਼ਰ ਹੈਲਥ ਵੱਲੋਂ ਸਾਂਝੀ ਕੀਤੀ ਗਈ ਜਾਣਕਾਰੀ ਮੁਤਾਬਕ ਗੈਰੀਬਾਲਡੀ ਸੈਕੰਡਰੀ ਸਕੂਲ ਵਿੱਚ ਇੱਕ ਵਿਅਕਤੀ ਕੋਵਿਡ-19 ਪੌਜ਼ਿਟਿਵ ਹੈ ਅਤੇ ਵਾਇਰਸ ਦੇ ਨਵੇਂ ਰੂਪਾਂਤਰ ਤੋਂ ਪੀੜਤ ਇੱਕ ਹੋਰ ਵਿਅਕਤੀ ਦੇ ਸੰਪਰਕ ਵਿੱਚ ਵੀ ਆਇਆ ਹੈ।
ਸਿਹਤ ਅਧਿਕਾਰੀਆਂ ਅਨੁਸਾਰ ਵੇਰੀਐਂਟ ਤੋਂ ਪ੍ਰਭਾਵਿਤ ਵਿਅਕਤੀ ਸਕੂਲ ਨਾਲ ਸਬੰਧਤ ਨਹੀਂ ਹੈ।
ਸਕੂਲ ਦੇ ਉਨ੍ਹਾਂ ਸਾਰੇ ਸਟਾਫ ਮੈਂਬਰਾਂ ਅਤੇ ਵਿਦਿਆਰਥੀਆਂ ਦੀ ਟੈਸਟਿੰਗ ਕੀਤੀ ਜਾਵੇਗੀ ਜੋ ਕੋਵਿਡ-19 ਤੋਂ ਪੀੜਤ ਵਿਅਕਤੀ ਦੇ ਸੰਪਰਕ ਵਿੱਚ ਆਏ ਸਨ।
ਕੋਵਿਡ-19 ਦੇ ਨਵੇਂ ਰੂਪਾਂਤਰ ਵਧੇਰੇ ਤੇਜ਼ੀ ਨਾਲ ਫੈਲਦੇ ਹਨ ਪਰ ਡਾਕਟਰਾਂ ਅਨੁਸਾਰ ਗੰਭੀਰ ਤੌਰ ’ਤੇ ਮਰੀਜ਼ ਦੀ ਸਿਹਤ ਨੂੰ ਪ੍ਰਭਾਵਤ ਨਹੀਂ ਕਰਦੇ ਅਤੇ ਨਾ ਹੀ ਵਾਇਰਸ ਦੇ ਟੀਕਿਆਂ ਦੇ ਅਸਰ ਨੂੰ ਘਟਾਉਂਦੇ ਹਨ।
ਸੁਬਾਈ ਸਹਿਤ ਅਫਸਰ ਡਾਕਟਰ ਬੌਨੀ ਹੈਨਰੀ ਅਤੇ ਸਿਹਤ ਮੰਤਰੀ ਐਡਰੀਅਨ ਡਿਕਸ ਵਲੋਂ ਸੋਮਵਾਰ ਦੁਪਹਿਰ ਨੂੰ ਕੋਵਿਡ-19 ਸੰਬੰਧੀ ਨਵੀਂ ਜਾਣਕਾਰੀ ਸਾਂਝੀ ਕੀਤੀ ਜਾਵੇਗੀ।
ਸ਼ੁਕਰਵਾਰ ਨੂੰ ਸੂਬੇ ਵਿੱਚ ਵਾਇਰਸ ਦੇ 514 ਨਵੇਂ ਮਾਮਲੇ ਸਾਹਮਣੇ ਆਏ ਸਨ ਅਤੇ 5 ਹੋਰ ਵਿਅਕਤੀ ਦਮ ਤੋੜ ਗਏ ਸਨ।
