9.14C Vancouver 9.14C VancouverJul 7, 2022 7:23 PM - The Canadian Press
ਔਂਟੈਰੀਓ ਪ੍ਰੋਵਿੰਸ਼ੀਅਲ ਪੁਲਿਸ ਵੱਲੋਂ ਕੁਝ ਲੋਕਾਂ ਵੱਲੋਂ ਇੱਕ ਹਾਈਵੇਅ 'ਤੇ ਵਿਖਾਈ ਗਈ ਬਹਾਦੁਰੀ ਅਤੇ ਸੂਝਬੂਝ ਦੀ ਸ਼ਲਾਘਾ ਕੀਤੀ ਜਾ ਰਹੀ ਹੈ।
ਦਰਅਸਲ ਮਿਸੀਸਾਗਾ ਦੇ ਵਿੱਚ ਕਵਾਰਥਾ ਦੇ ਕੋਲ ਕਵੀਨ ਐਲਿਜ਼ਾਬੈਥ ਵੇਅ 'ਤੇ ਇੱਕ ਵਾਹਨ ਨੂੰ ਅੱਗ ਲਗ ਗਈ ਸੀ।
ਇਸ ਵਾਹਨ 'ਚ ਚਾਲਕ ਫਸ ਗਿਆ ਸੀ।
ਵਾਹਨ ਨੂੰ ਕਥਿਤ ਤੌਰ 'ਤੇ ਤੁਰੇ ਜਾਂਦੇ ਨੂੰ ਹੀ ਅੱਗ ਲਗ ਗਈ ਸੀ ਅਤੇ ਫਿਰ ਇਹ ਵਾਹਨ ਪਾਸੇ ਇੱਕ ਖੱਡ 'ਚ ਜਾ ਡਿੱਗਿਆ ਅਤੇ ਵਾਹਨ 'ਚ ਅੱਗ ਫੈਲ ਗਈ।
ਪੁਲਿਸ ਫੋਰਸ ਦੇ ਹਾਈਵੇਅ ਸੇਫਟੀ ਡਿਵੀਜਨ ਨੇ ਘਟਨਾ ਸੰਬੰਧੀ ਇੱਕ ਵੀਡੀਓ ਟਵੀਟ ਕੀਤਾ ਜਿਸ 'ਚ 5 ਆਦਮੀਆਂ ਨੂੰ ਚਿੱਟੇ ਰੰਗ ਦੇ ਵਾਹਨ ਕੋਲ ਭੱਜ ਕੇ ਪਹੁੰਚਦੇ ਵੇਖਿਆ ਜਾ ਸਕਦਾ ਹੈ।
ਫੋਰਸ ਦਾ ਕਹਿਣਾ ਸੀ ਕਿ ਵਾਹਨ ਚਲਾ ਰਹੇ 36 ਸਾਲਾ ਵਿਅਕਤੀ ਨੂੰ ਕਿਸੇ ਪ੍ਰਕਾਰ ਦੀ ਮੈਡਿਕਲ ਪ੍ਰੇਸ਼ਾਨੀ ਹੋ ਗਈ ਸੀ।
ਇਸੇ ਦੌਰਾਨ ਉਸ ਦੀ ਗੱਡੀ ਕਵਾਰਥਾ ਰੋਡ ਐਗਜ਼ਿਟ ਕੋਲ ਖੱਡ 'ਚ ਜਾ ਡਿੱਗੀ ਸੀ।
ਬਚਾਅ ਲਈ ਪਹੁੰਚੇ 5 ਆਦਮੀਆਂ ਨੇ ਵਾਰ-ਵਾਰ ਸ਼ੀਸ਼ੇ ਭੰਨਣ ਦੀ ਕੋਸ਼ਿਸ਼ ਕੀਤੀ ਅਤੇ ਇੱਕ ਆਦਮੀ ਨੂੰ ਤਾਂ ਖਿੜਕੀ 'ਤੇ ਮੁੱਕੇ ਮਾਰ ਕੇ ਵੀ ਖਿੜਕੀ ਤੋੜਨ ਦੀ ਕੋਸ਼ਿਸ਼ ਕਰਦੇ ਵੇਖਿਆ ਜਾ ਸਕਦਾ ਹੈ।
ਜਦ ਇਹ ਲੋਕ ਪੀੜਤ ਨੂੰ ਗੱਡੀ ਵਿੱਚੋਂ ਕੱਢਣ 'ਚ ਕਾਮਯਾਬ ਹੋਏ ਤਾਂ ਉਸ ਤੋਂ ਕੁਝ ਹੀ ਸਮੇਂ 'ਚ ਵਾਹਨ ਪੂਰੀ ਤਰ੍ਹਾਂ ਅੱਗ ਦੀ ਚਪੇਟ 'ਚ ਆਇਆ ਵੇਖਿਆ ਜਾ ਸਕਦਾ ਹੈ।
