ਕੈਨੇਡਾ ਭਰ ਦੇ ਪ੍ਰੀਮੀਅਰ ਦੀ ਹੈਲੀਫੈਕਸ ਵਿਚ ਚੱਲ ਰਹੀ ਤਿੰਨ ਦਿਨਾਂ ਸਲਾਨਾ ਮੀਟਿੰਗ ਅੱਜ ਹੋਈ ਖ਼ਤਮ

ਕੈਨੇਡਾ ਭਰ ਦੇ ਪ੍ਰੀਮੀਅਰ ਦੀ ਨੋਵਾ ਸਕੋਸ਼ੀਆ ਦੀ ਰਾਜਧਾਨੀ ਹੈਲੀਫੈਕਸ ਵਿਚ ਚੱਲ ਰਹੀ ਤਿੰਨ ਦਿਨਾਂ ਸਲਾਨਾ ਮੀਟਿੰਗ ਅੱਜ ਸਮਾਪਤ ਹੋ ਰਹੀ ਹੈ। ਪ੍ਰੀਮੀਅਰ ਵਲੋਂ ਜਾਰੀ ਬਿਆਨ ਵਿਚ ਕਿਹਾ ਗਿਆ ਹੈ ਕਿ ਮੀਟਿੰਗ ਵਿਚ ਮੁੱਖ ਤੌਰ ’ਤੇ ਰਿਹਾਇਸ਼ ਸਮਰੱਥਾ ਅਤੇ ਹੁਨਰ ਦੀ ਸਿਖਲਾਈ ਬਾਰੇ ਚਰਚਾ ਕੀਤੀ ਗਈ, ਇਸ ਤੋਂ ਇਲਾਵਾ ਤੇਲ ਤੇ ਗੈਸ ਸੈਕਟਰ ਦੇ ਭਵਿੱਖ ਅਤੇ ਸੰਕਟਕਾਲੀਨ ਹਾਲਾਤ ਨਾਲ ਨਜਿੱਠਣ ਵਰਗੇ ਮੁੱਦੇ ਵੀ ਚਰਚਾ ਦਾ ਮੁੱਖ ਕੇਂਦਰ ਸਨ।

ਉੱਥੇ ਹੀ ਕਈ ਪ੍ਰੀਮੀਅਰ ਨੇ ਇਸ ਗੱਲ ਦੀ ਨਿਰਾਸ਼ਾ ਪ੍ਰਗਟਾਈ ਕਿ ਕਈ ਮਹੱਤਵਪੂਰਨ ਮੁੱਦਿਆਂ ’ਤੇ ਫੈਡਰਲ ਸਰਕਾਰ ਵਲੋਂ ਤਾਲਮੇਲ ਦੀ ਘਾਟ ਹੈ। ਐਲਬਰਟਾ ਦੀ ਪ੍ਰੀਮੀਅਰ ਡੈਨੀਅਲ ਸਮਿਥ ਨੇ ਟਰੂਡੋ ਸਰਕਾਰ ’ਤੇ ਹਮਲਾ ਬੋਲਦਿਆਂ ਕਿਹਾ ਕਿ ਇਹ ਸੈਂਟਰ ਵਲੋਂ ਸਹਿਯੋਗ ਦੀ ਕਮੀ ਦਾ ਹੀ ਨਤੀਜਾ ਹਨ ਜੋ ਡੈਂਟਲ ਕੇਅਰ ਅਤੇ ਫਾਰਮਾਸਿਸਟ ਵਰਗੀਆਂ ਸੇਵਾਵਾਂ ਦੁੱਗਣੀਆਂ ਹੋ ਰਹੀਆਂ ਹਨ, ਜਦੋਂ ਕਿ ਜ਼ਿਆਦਾਤਰ ਸੂਬਾ ਵਾਸੀਆਂ ਨੂੰ ਇਹ ਕਵਰੇਜ ਪਹਿਲਾਂ ਹੀ ਉਪਲਬਧ ਹਨ।

ਐਲਬਰਟਾ ਦੀ ਪ੍ਰੀਮੀਅਰ ਇਹ ਪਹਿਲਾਂ ਹੀ ਸਪੱਸ਼ਟ ਕਰ ਚੁੱਕੇ ਹਨ ਕਿ ਉਨ੍ਹਾਂ ਦਾ ਸੂਬਾ ਇਸ ਨੈਸ਼ਨਲ ਪਲੈਨ ਵਿਚ ਸ਼ਾਮਲ ਨਹੀਂ ਹੋਵੇਗਾ ਅਤੇ ਬਿਨਾਂ ਸ਼ਰਤ ਦੇ ਐਲਬਰਟਾ ਦਾ ਹਿੱਸਾ ਲੈਣ ਲਈ ਗੱਲਬਾਤ ਕਰੇਗਾ ਤੇ ਇਸ ਹਿੱਸੇ ਦੀ ਫੰਡਿੰਗ ਨਾਲ ਵਧੇਰੇ ਘੱਟ ਆਮਦਨੀ ਵਾਲੇ ਐਲਬਰਟਨ ਲਈ ਸੂਬੇ ਵਲੋਂ ਦਿੱਤੀ ਜਾ ਰਹੀ ਕਵਰੇਜ ਦਾ ਵਿਸਥਾਰ ਕੀਤਾ ਜਾਵੇਗਾ।

ਬੀ. ਸੀ. ਦੇ ਪ੍ਰੀਮੀਅਰ ਡੇਵਿਡ ਈਬੀ ਨੇ ਕਿਹਾ ਕਿ ਉਹ ਅਤੇ ਉਨ੍ਹਾਂ ਦੇ ਸਾਥੀ ਪ੍ਰੀਮੀਅਰ ਕਈ ਸਾਲਾਂ ਤੋਂ ਇਸ ਬੈਠਕ ਵਿਚ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੂੰ ਸ਼ਾਮਲ ਹੋਣ ਲਈ ਬੇਨਤੀ ਕਰਦੇ ਆ ਰਹੇ ਹਨ ਪਰ ਹੁਣ ਤੱਕ ਕੋਈ ਜਵਾਬ ਨਹੀਂ ਮਿਲਿਆ ਹੈ।