ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਕੀਤਾ ਦਾਅਵਾ ,ਅਗਲੀਆਂ ਚੋਣਾਂ 'ਚ ਵੀ ਹੋਣਗੇਪੀਐੱਮ ਉਮੀਦਵਾਰ

ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਸਾਫ ਕੀਤਾ ਹੈ ਕਿ ਅਗਲੀਆਂ ਚੋਣਾਂ ਦੌਰਾਨ ਪੀਐੱਮ ਦੀ ਰੇਸ ਤੋਂ ਹਟਣ ਦਾ ਉਨ੍ਹਾਂ ਦਾ ਕੋਈ ਇਰਾਦਾ ਨਹੀਂ ਹੈ। ਟਰੂਡੋ ਦੀ ਇਹ ਟਿੱਪਣੀ ਹਾਲ ਹੀ ਦੇ ਉਸ ਸਰਵੇਖਣ ਤੋਂ ਬਾਅਦ ਆਈ ਹੈ ਜਿਨ੍ਹਾਂ ਵਿੱਚ ਲਿਬਰਲਸ ਕੰਜ਼ਰਵੇਟਿਵਸ ਤੋਂ ਭਾਰੀ ਸੀਟਾਂ ਨਾਲ ਪਿਛੜਦੇ ਦੱਸੇ ਗਏ ਹਨ।

ਇੱਕ ਚੈਨਲ ਨੂੰ ਦਿੱਤੇ ਗਏ ਇੰਟਰਵਿਊ ਵਿੱਚ ਉਨ੍ਹਾਂ ਕਿਹਾ ਕਿ ਉਹ ਲਿਬਰਲ ਲੀਡਰ ਵਜੋਂ ਬਣੇ ਰਹਿਣਗੇ। ਉਥੇ ਹੀ ਹੋਮ ਹੀਟਿੰਗ ਆਇਲ ਨੂੰ ਕਾਰਬਨ ਟੈਕਸ ਤੋਂ ਦਿੱਤੀ ਗਈ ਛੋਟ ਬਾਰੇ ਉੱਠ ਰਹੇ ਸਵਾਲਾਂ 'ਤੇ ਉਨ੍ਹਾਂ ਕਿਹਾ ਕਿ ਇਸ ਦਾ ਮਕਸਦ ਅਟਲਾਂਟਿਕ ਕੈਨੇਡਾ ਵਿੱਚ ਲਿਬਰਲ ਲਈ ਸੀਟਾਂ ਪੱਕੀਆਂ ਕਰਨਾ ਨਹੀਂ ਸਗੋਂ ਲੋਕਾਂ ਨੂੰ ਹੀਟ ਪੰਪਸ 'ਤੇ ਸਵਿਚ ਕਰਨ ਦਾ ਵੇਧੇਰ ਸਮਾਂ ਦੇਣਾ ਹੈ।

ਐਟਲਾਂਟਿਕ ਕੈਨੇਡਾ ਵਿੱਚ ਲਗਭਗ 30 ਫੀਸਦੀ ਪਰਿਵਾਰ ਹੋਮ ਹੀਟਿੰਗ ਲਈ ਤੇਲ ਦੀਆਂ ਭੱਠੀਆਂ ਦਾ ਇਸਤੇਮਾਲ ਕਰਦੇ ਹਨ ਅਤੇ ਵਿਰੋਧੀ ਧਿਰਾਂ ਦਾ ਕਹਿਣਾ ਹੈ ਕਿ ਟਰੂਡੋ ਨੇ ਲਿਬਰਲ ਲਈ ਸੀਟਾਂ ਨੂੰ ਸੁਰੱਖਿਅਤ ਕਰਨ ਲਈ ਹੀ ਇਹ ਪੱਖਪਾਤੀ ਫੈਸਲਾ ਕੀਤਾ। ਉੱਥੇ ਹੀ ਟਰੂਡੋ ਨੇ ਮੰਨਿਆ ਕਿ ਹਾਊਸਿੰਗ ਲਈ ਵਧੇਰੇ ਕੁਝ ਕਰਨ ਦੀ ਜ਼ਰੂਰਤ ਹੈ ਪਰ ਉਨ੍ਹਾਂ ਕਿਹਾ ਕਿ ਰੈਪਿਡ ਹਾਊਸਿੰਗ ਇਨੀਸ਼ੀਏਟਿਵ ਅਤੇ ਫਸਟ ਹੋਮ ਸੇਵਿੰਗ ਅਕਾਊਂਟ ਵਰਗੇ ਪ੍ਰੋਗਰਾਮ ਕੈਨੇਡੀਅਨ ਨੂੰ ਘਰ ਖਰੀਦਣ ਵਿੱਚ ਮਦਦ ਕਰਨਗੇ।

ਗੌਰਤਲਬ ਹੈ ਕਿ ਪਿਛਲੇ ਦੋ ਮਹੀਨਿਆਂ ਵਿੱਚ 69 ਤੋਂ 73 ਫੀਸਦੀ ਕੈਨੇਡੀਅਨ ਨੇ ਸਰਵੇ ਵਿੱਚ ਕਿਹਾ ਸੀ ਕਿ ਟਰੂਡੋ ਨੂੰ ਹੁਣ ਅਹੁਦਾ ਛੱਡ ਦੇਣਾ ਚਾਹੀਦਾ ਹੈ।