ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਵਿਦੇਸ਼ੀ ਦਖਲ ਦੀ ਜਾਂਚ ’ਤੇ ਗਵਾਹੀ ਦੇਣ ਲਈ ਹੋਣਗੇ ਪੇਸ਼

ਕੈਨੇਡਾ ਦੀਆਂ ਪਿਛਲੀਆਂ ਦੋ ਇਲੈਕਸ਼ਨਸ ਵਿਚ ਵਿਦੇਸ਼ੀ ਦਖ਼ਲ ਦੀ ਜਾਂਚ ਕਰ ਰਹੇ ਕਮਿਸ਼ਨ ਸਾਹਮਣੇ ਅੱਜ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਪੇਸ਼ ਹੋ ਰਹੇ ਹਨ। ਹੁਣ ਤੱਕ ਜਾਂਚ ਵਿਚ ਸੁਣਿਆ ਜਾ ਚੁੱਕਾ ਹੈ ਕਿ ਕੈਨੇਡਾ ਦੀਆਂ ਚੋਣਾਂ ਵਿਚ ਮੁੱਖ ਤੌਰ ’ਤੇ ਚੀਨ ਵਲੋਂ ਦਖ਼ਲ ਦੇਣ ਦੀ ਕੋਸ਼ਿਸ਼ ਕੀਤੀ ਗਈ ਸੀ।

ਲਿਬਰਲ ਪਾਰਟੀ ਦੇ ਮੈਂਬਰ ਹਾਨ ਡੋਂਗ ਲਈ ਪਾਰਟੀ ਨੂੰ ਚਿਤਾਵਨੀ ਦਿੱਤੀ ਗਈ ਸੀ ਕਿ ਕੈਨੇਡੀਅਨ ਸੁਰੱਖਿਆ ਇੰਟੈਲੀਜੈਂਸ ਸਰਵਿਸ ਵਲੋਂ ਉਨ੍ਹਾਂ ’ਤੇ ਨਜ਼ਰ ਰੱਖੀ ਜਾ ਰਹੀ ਹੈ ਕਿਉਂਕਿ 2019 ਦੀ ਇਲੈਕਸ਼ਨ ਦੌਰਾਨ ਓਨਟਾਰੀਓ ਦੇ ਡੌਨ ਵੈਲੀ ਉੱਤਰੀ ਹਲਕੇ ਦੇ ਨਾਮਜ਼ਦਗੀ ਮੁਕਾਬਲੇ ਵਿਚ ਜਾਸੂਸ ਏਜੰਸੀ ਨੂੰ ਚੀਨ ਦਖ਼ਲ ਬਾਰੇ ਪਤਾ ਲੱਗਾ ਸੀ।

ਡੋਂਗ ਉਸ ਸਾਲ 12 ਸਤੰਬਰ ਨੂੰ ਉੱਥੋਂ ਨਾਮਜ਼ਦਗੀ ਜਿੱਤੇ ਸਨ ਅਤੇ 21 ਅਕਤੂਬਰ 2019 ਦੇ ਜਨਰਲ ਇਲੈਕਸ਼ਨ ਵਿਚ ਜਿੱਤ ਹਾਸਲ ਕੀਤੀ ਸੀ। ਟੋਰਾਂਟੋ ਸਥਿਤ ਚੀਨੀ ਕੌਂਸਲ-ਜਨਰਲ ਹਾਨ ਤਾਓ ਨਾਲ ਉਨ੍ਹਾਂ ਦੀ ਵਿਵਾਦਪੂਰਨ ਗੱਲਬਾਤ ਸਾਹਮਣੇ ਆਉਣ ਤੋਂ ਬਾਅਦ ਡੋਂਗ ਨੇ ਪਿਛਲੇ ਸਾਲ ਲਿਬਰਲ ਕਾਕਸ ਤੋ ਅਸਤੀਫਾ ਦੇ ਦਿੱਤਾ ਸੀ ਅਤੇ ਉਦੋਂ ਤੋਂ ਉਹ ਹਾਊਸ ਔਫ ਕੌਮਨਜ਼ ਵਿਚ ਆਜ਼ਾਦ ਐੱਮ.ਪੀ. ਵਜੋਂ ਬੈਠਦੇ ਹਨ। ਡੋਂਗ ’ਤੇ ਚੀਨੀ ਵਿਦੇਸ਼ੀ ਦਖਲਅੰਦਾਜ਼ੀ ਨੈੱਟਵਰਕ ਦਾ ਹਿੱਸਾ ਹੋਣ ਦੇ ਇਲਜ਼ਾਮ ਲੱਗੇ ਸਨ।

ਕਿਹਾ ਜਾਂਦਾ ਹੈ ਕਿ ਚੀਨ ਵਲੋਂ ਚਾਈਨੀਸ ਸਟੂਡੈਂਟਸ ਨੂੰ ਡੋਂਗ ਨੂੰ ਵੋਟ ਪਾਉਣ ਲਈ ਮਜਬੂਰ ਕੀਤਾ ਗਿਆ ਸੀ। ਹਾਲਾਂਕਿ, ਡੌਂਗ ਇਸ ਮਾਮਲੇ ਵਿਚ ਕਿਸੇ ਵੀ ਤਰ੍ਹਾਂ ਦੀ ਸਾਜ਼ਿਸ਼ ਤੋਂ ਇਨਕਾਰ ਕਰਦੇ ਹਨ। ਗੌਰਤਲਬ ਹੈ ਕਿ ਕਮਿਸ਼ਨ ਵਲੋਂ ਸ਼ੁਰੂ ਕੀਤੀ ਗਈ ਜਨਤਕ ਸੁਣਵਾਈ ਦੇ ਪਹਿਲੇ ਪੜਾਅ ਦਾ ਅੱਜ ਅੰਤਿਮ ਦਿਨ ਹੈ, ਮਈ ਵਿਚ ਕਮਿਸ਼ਨ ਇਸ ਦੇ ਨਤੀਜਿਆਂ ਦੀ ਅੰਤਰਿਮ ਰਿਪੋਰਟ ਜਾਰੀ ਕਰੇਗਾ।