ਮਾਰਕ ਕਾਰਨੀ, ਪੀਅਰ ਪੌਲੀਐਵ ਅਤੇ ਜਗਮੀਤ ਸਿੰਘ ਜਲਦ ਹੀ ਆਹਮੋ-ਸਾਹਮਣੇ ਕਰਨਗੇ ਡਿਬੇਟ

ਕੈਨੇਡਾ ਦੇ ਪ੍ਰਧਾਨ ਮੰਤਰੀ ਬਣਨ ਦੀ ਦੌੜ ਵਿਚ ਸ਼ਾਮਲ ਮਾਰਕ ਕਾਰਨੀ, ਪੀਅਰ ਪੌਲੀਐਵ ਅਤੇ ਜਗਮੀਤ ਸਿੰਘ ਜਲਦ ਹੀ ਆਹਮੋ-ਸਾਹਮਣੇ ਡਿਬੇਟ ਵਿਚ ਦਿਸਣਗੇ। ਸਰਕਾਰੀ ਏਜੰਸੀ ਆਗੂਆਂ ਦੀ ਬਹਿਸ ਕਮਿਸ਼ਨ ਨੇ ਸੋਮਵਾਰ ਨੂੰ ਘੋਸ਼ਣਾ ਕੀਤੀ ਹੈ ਕਿ ਉਮੀਦਵਾਰਾਂ ਨੂੰ ਅਪ੍ਰੈਲ ਦੇ ਮਿਡ ਵਿਚ ਦੋ ਡਿਬੇਟ ਲਈ ਸੱਦਾ ਦਿੱਤਾ ਜਾਵੇਗਾ।

ਇਸ ਤਹਿਤ ਪਹਿਲੀ ਫ੍ਰੈਂਚ ਡਿਬੇਟ ਮਾਂਟਰੀਅਲ ਵਿਚ 16 ਅਪ੍ਰੈਲ ਦੀ ਰਾਤ ਨੂੰ ਕਰਵਾਈ ਜਾਵੇਗੀ ਅਤੇ ਦੂਜੀ ਇੰਗਲਿਸ਼ ਡਿਬੇਟ ਵੀ ਮਾਂਟਰੀਅਲ ਵਿਚ ਹੀ 17 ਅਪ੍ਰੈਲ ਨੂੰ ਰੱਖੀ ਜਾਵੇਗੀ। ਗੌਰਤਲਬ ਹੈ ਕਿ ਫੈਡਰਲ ਚੋਣਾਂ ਵਿਚ ਤਿੰਨ ਪ੍ਰਮੁੱਖ ਪਾਰਟੀਆਂ ਤੋਂ ਇਲਾਵਾ ਗ੍ਰੀਨ ਪਾਰਟੀ, ਬਲਾਕ ਕਿਊਬੇਕੋਇਸ ਵੀ ਮੈਦਾਨ ਵਿਚ ਹਨ।

ਲਿਬਰਲ ਲੀਡਰ ਮਾਰਕ ਕਾਰਨੀ ਨੇ ਅੱਜ ਨਿਊਫਾਊਂਡਲੈਂਡ ਵਿਚ ਲੋਕਾਂ ਨੂੰ ਸੰਬੋਧਨ ਦੌਰਾਨ ਟਰੰਪ ਅਤੇ ਪੌਲੀਐਵ ਨੂੰ ਇੱਕੋ ਸਿੱਕੇ ਦੇ ਦੋ ਪਹਿਲੂ ਕਰਾਰ ਦਿੱਤਾ, ਉਨ੍ਹਾਂ ਕਿਹਾ ਕਿ ਰਾਸ਼ਟਰਪਤੀ ਟਰੰਪ ਦੀ ਯੋਜਨਾ ਫੁਟ ਪਾ ਕੇ ਜਿੱਤਣਾ ਹੈ, ਠੀਕ ਇਸੇ ਤਰ੍ਹਾਂ ਪੌਲੀਐਵ ਦੀ ਯੋਜਨਾ ਵੰਡਣ ਅਤੇ ਜਿੱਤਣ ਦੀ ਹੈ।