ਬੀ.ਸੀ.ਨੇ ਕੈਂਸਰ ਦੇ ਇਲਾਜ ਲਈ ਮਰੀਜ਼ਾਂ ਨੂੰ ਅਮਰੀਕਾ ਭੇਜਣ ਵਾਲਾ ਪ੍ਰੋਗਰਾਮ ਕੀਤਾ ਬੰਦ

ਬ੍ਰਿਟਿਸ਼ ਕੋਲੰਬੀਆ ਦੇ ਕੈਂਸਰ ਦੇ ਮਰੀਜ਼ਾਂ ਨੂੰ ਹੁਣ ਇਲਾਜ ਲਈ ਵਾਸ਼ਿੰਗਟਨ ਦੇ ਬੇਲਿੰਘਮ ਦੇ ਕਲੀਨਿਕ ਲਈ ਰੈਫਰ ਨਹੀਂ ਕੀਤਾ ਜਾਵੇਗਾ। ਇਸ ਦੀ ਘੋਸ਼ਣਾ ਸੂਬੇ ਦੀ ਹੈਲਥ ਮਿਨਿਸਟਰ ਜੋਸੀ ਓਸਬੋਰਨ ਨੇ ਕੀਤੀ। ਉਨ੍ਹਾਂ ਕਿਹਾ ਕਿ ਇਹ ਫੈਸਲਾ ਮੌਜੂਦਾ ਕੈਨੇਡਾ-ਅਮਰੀਕਾ ਵਪਾਰ ਯੁੱਧ ਦਾ ਨਤੀਜਾ ਨਹੀਂ ਹੈ ਸਗੋਂ ਪ੍ਰੋਗਰਾਮ ਵਿਚ ਘਟਦੀ ਭਾਗੀਦਾਰੀ ਅਤੇ ਬੀ. ਸੀ. ਵਿਚ ਇਲਾਜ ਲਈ ਉਡੀਕ ਸਮੇਂ ਵਿਚ ਆਈ ਕਮੀ ਦੇ ਕਾਰਨ ਹਨ।

ਹੈਲਥ ਮਿਨਿਸਟਰ ਨੇ ਕਿਹਾ ਕਿ ਸੂਬਾ ਸਰਕਾਰ ਨੇ ਓਨਕੋਲੋਜਿਸਟ ਦੀ ਭਰਤੀ, ਰੇਡੀਏਸ਼ਨ ਥੈਰੇਪੀ ਅਤੇ ਹਸਪਤਾਲ ਦੀਆਂ ਸਹੂਲਤਾਂ ਵਿਚ ਸੁਧਾਰ ਲਈ ਜੋ ਨਿਵੇਸ਼ ਕੀਤਾ ਉਸ ਨਾਲ ਅਸੀਂ ਉਡੀਕ ਸਮੇਂ ਨੂੰ ਘੱਟ ਕਰਨ ਵਿਚ ਸਮਰਥ ਹੋਏ ਹਾਂ।

ਗੌਰਤਲਬ ਹੈ ਕਿ ਸੂਬਾ ਸਰਕਾਰ ਨੇ ਬੀ. ਸੀ. ਵਿਚ ਇਲਾਜ ਵਿਚ ਦੇਰੀ ਨੂੰ ਦੇਖਦੇ ਹੋਏ 2023 ਵਿਚ ਇੱਕ ਪ੍ਰੋਗਰਾਮ ਸ਼ੁਰੂ ਕੀਤਾ ਸੀ, ਜਿਸ ਤਹਿਤ 1,107 ਕੈਂਸਰ ਦੇ ਮਰੀਜ਼ਾਂ ਨੂੰ ਅਮਰੀਕਾ ਵਿਚ ਸੰਪੂਰਨ ਰੇਡੀਏਸ਼ਨ ਇਲਾਜ ਕਰਵਾਉਣ ਦਾ ਮੌਕਾ ਮਿਲਿਆ ਹੈ। ਓਸਬੋਰਨ ਨੇ ਕਿਹਾ ਕਿ ਮਈ ਦੇ ਅੰਤ ਵਿਚ ਦੋ ਨਿੱਜੀ ਅਮਰੀਕੀ ਕਲੀਨਿਕ ਨਾਲ ਸਮਝੌਤਾ ਖ਼ਤਮ ਹੋਣ ਦੇ ਨਾਲ ਹੀ ਇਹ ਪ੍ਰੋਗਰਾਮ ਸਮਾਪਤ ਹੋ ਜਾਵੇਗਾ।