14.04C Vancouver 14.04C VancouverMar 27, 2024 6:53 PM - The Canadian Press
ਕੈਨੇਡਾ ਭਰ ਵਿਚ ਕਿਰਾਏ ’ਤੇ ਰਹਿ ਰਹੇ ਲੋਕਾਂ ਲਈ ਖੁਸ਼ਖ਼ਬਰੀ ਹੈ। ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਕਿਰਾਏਦਾਰਾਂ ਦੀ ਪ੍ਰੋਟੈਕਸ਼ਨ ਅਤੇ ਘਰ ਦੇ ਮਾਲਕ ਬਣਨ ਲਈ ਨਵੇਂ ਕਦਮਾਂ ਦੀ ਘੋਸ਼ਣਾ ਕੀਤੀ ਹੈ, ਜਿਸ ਲਈ ਆਉਣ ਵਾਲੇ ਬਜਟ ਵਿਚ ਕੈਨੇਡੀਅਨ ਕਿਰਾਏਦਾਰਾਂ ਦੇ ਅਧਿਕਾਰਾਂ ਦਾ ਬਿੱਲ ਅਤੇ ਕਿਰਾਏਦਾਰ ਸੁਰੱਖਿਆ ਫੰਡ ਦੀ ਸਥਾਪਨਾ ਕੀਤੀ ਜਾਵੇਗੀ।
ਇਸ ਤੋਂ ਇਲਾਵਾ ਕ੍ਰੈਡਿਟ ਸਕੋਰ ਲਈ ਹੁਣ ਰੈਂਟਲ ਹਿਸਟਰੀ ਵੀ ਮੰਨੀ ਜਾਵੇਗੀ, ਜਿਸ ਲਈ ਸਰਕਾਰ ਕੈਨੇਡੀਅਨ ਮੋਰਟਗੇਜ ਚਾਰਟਰ ਵਿਚ ਸੋਧ ਕਰਨ ਜਾ ਰਹੀ ਹੈ, ਇਸ ਨਾਲ ਕਿਰਾਏ ’ਤੇ ਰਹਿੰਦੇ ਲੋਕਾਂ ਨੂੰ ਨਵਾਂ ਘਰ ਹਾਸਲ ਕਰਨ ਲਈ ਲੋਨ ਮਿਲਣ ਵਿਚ ਆਸਾਨੀ ਹੋਵੇਗੀ। ਇਸ ਸੰਬੰਧੀ ਵੈਨਕੂਵਰ ਵਿਚ ਪ੍ਰੈਸ ਕਾਨਫਰੰਸ ਕੀਤੀ ਗਈ।
ਟਰੂਡੋ ਨੇ ਇਹ ਵੀ ਕਿਹਾ ਕਿ ਸਰਕਾਰ ਬਜਟ ਵਿਚ ਨਵਾਂ ਕਾਨੂੰਨੀ ਸਹਾਇਤਾ ਫੰਡ ਵੀ ਸ਼ੁਰੂ ਕਰਨ ਜਾ ਰਹੀ ਹੈ ਜੋ ਕਿਰਾਏਦਾਰਾਂ ਨੂੰ ਗਲਤ ਤਰੀਕੇ ਨਾਲ ਵਧ ਰਹੇ ਕਿਰਾਏ ਅਤੇ ਮਾੜੇ ਮਕਾਨ ਮਾਲਕ ਤੋਂ ਬਚਾਏਗਾ। ਗੌਰਤਲਬ ਹੈ ਕਿ ਇਸ ਸਾਲ ਦਾ ਫੈਡਰਲ ਬਜਟ 16 ਅਪ੍ਰੈਲ ਨੂੰ ਪੇਸ਼ ਕੀਤਾ ਜਾਵੇਗਾ ਅਤੇ ਇਹ ਮੁੱਖ ਤੌਰ ’ਤੇ ਹਾਊਸਿੰਗ ’ਤੇ ਕੇਂਦਰਿਤ ਹੋਵੇਗਾ।
