9.97C Vancouver 9.97C VancouverMay 20, 2021 2:54 PM -
ਪੰਜਾਬ ਦੇ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਵੱਲੋਂ ਅੱਜ ਵੀਰਵਾਰ ਨੂੰ ਮਿਸ਼ਨ ਫ਼ਤਹਿ ਦੇ ਤਹਿਤ, ਘਰ ਵਿੱਚ ਇਕਾਂਤਵਾਸ ਕਰ ਰਹੇ ਲੋਕਾਂ ਲਈ ਵਟਸਐਪ ਚੈਟਬੋਟ ਨਾਂ ਦਾ ਇੱਕ ਕੋਵਿਡ ਕੇਅਰ ਪ੍ਰੋਗਰਾਮ ਨੂੰ ਲੌਂਚ ਕੀਤਾ ਗਿਆ ਹੈ।
ਇਸ ਵਟਸਐਪ ਚੈਟਬੋਟ ਵਿੱਚ ਬੈਡ ਮੁੱਹਈਆ ਹੋਣ ਦੀ ਥਾਂ, ਵੈਕਸੀਨ ਸੈਂਟਰ ਅਤੇ ਹੋਰ ਵੀ ਜਾਣਕਾਰੀ ਸਾਂਝੀ ਕੀਤੀ ਜਾਵੇਗੀ|
ਤਿੰਨ ਭਾਸ਼ਾਵਾਂ- ਅੰਗਰੇਜ਼ੀ, ਪੰਜਾਬੀ ਅਤੇ ਹਿੰਦੀ ਵਿੱਚ ਮੌਜੂਦ ਇਹ ਚੈਟਬੋਟ ਘਰ ਵਿੱਚ ਇਕਾਂਤਵਾਸ ਕਰ ਰਹੇ ਕੋਵਿਡ ਦੇ ਮਰੀਜ਼ਾਂ ਦੀ ਮਾਹਿਰਾਂ ਵੱਲੋਂ ਨਿਗਰਾਨੀ ਕਰਨ ਵਿੱਚ ਮਦਦ ਕਰੇਗੀ, ਜੋ ਚੈਟਬੋਟ ਵਿਚਲੀ ਮਰੀਜ਼ਾਂ ਦੀ ਜਾਣਕਾਰੀ ਮੁਤਾਬਕ, ਉਨ੍ਹਾਂ ਦੇ ਇਲਾਜ ਲਈ ਉਨ੍ਹਾਂ ਨੂੰ ਸਲਾਹ ਦੇਣਗੇ।
ਸੂਬੇ ਵਿਚਲੇ ਕੋਵਿਡ ਦੇ ਹਾਲਾਤ 'ਤੇ ਚਰਚਾ ਕਰਨ ਲਈ ਕੀਤੀ ਗਈ ਇੱਕ ਉੱਚ ਪੱਧਰ ਦੀ ਵਰਚੁਅਲ ਬੈਠਕ ਦੀ ਪ੍ਰਧਾਨਗੀ ਕਰਦਿਆਂ, ਮੁੱਖ ਮੰਤਰੀ ਵੱਲੋਂ ਕੁਝ ਚਿਰ ਪਹਿਲਾਂ ਲੌਂਚ ਕੀਤੀ ਗਈ ਭੋਜਨ ਹੈਲਪਲਾਈਨ ਦੇ ਕੰਮ ਦੀ ਵੀ ਸਮੀਖਿਆ ਕੀਤੀ ਗਈ।
ਇਸ ਹੈਲਪਲਾਈਨ ਜ਼ਰੀਏ ਪੰਜਾਬ ਪੁਲਿਸ ਵੱਲੋਂ ਹੁਣ ਤੱਕ ਇੱਕ ਹਫ਼ਤੇ ਵਿੱਚ 3000 ਤੋਂ ਵੀ ਵੱਧ ਭੋਜਨ ਦੇ ਪੈਕੇਟ, ਜਿਨ੍ਹਾਂ ਵਿੱਚ 2721 ਪੱਕੇ ਹੋਏ ਭੋਜਨ ਦੇ ਅਤੇ 280 ਕੱਚੀ ਰਸਦ ਦੇ ਪੈਕੇਟ ਸਨ, ਕੋਵਿਡ ਪ੍ਰਭਾਵਿਤ ਪਰਿਵਾਰਾਂ ਦੇ ਘਰਾਂ ਤੱਕ ਪਹੁੰਚਾਏ ਜਾ ਚੁੱਕੇ ਹਨ।
ਪੰਜਾਬ ਪੁਲਿਸ ਦੀ ਇਸ ਪਹਿਲਕਦਮੀ ਦੀ ਸ਼ਲਾਘਾ ਕਰਦਿਆਂ, ਮੁੱਖ ਮੰਤਰੀ ਨੇ ਸਾਰੇ ਪ੍ਰਭਾਵਿਤ ਨਾਗਰਿਕਾਂ ਨੂੰ ਮੁਫ਼ਤ ਖਾਣੇ ਲਈ 112 ਜਾਂ 181 ਡਾਇਲ ਕਰਨ ਲਈ ਅਰਜ਼ ਕੀਤੀ, ਇਸ ਨਾਲ ਉਹ ਇਸ ਪੱਕਾ ਕਰਨਾ ਚਾਹੁੰਦੇ ਹਨ ਕਿ ਸੂਬੇ ਵਿੱਚ ਕੋਈ ਵੀ ਇਸ ਮੁਸ਼ਕਿਲ ਵੇਲੇ ਵਿੱਚ ਭੁੱਖਾ ਨਾ ਸੌਂਵੇਂ।
ਪੰਜਾਬ ਦੇ ਡੀਜੀਪੀ ਦਿਨਕਰ ਗੁਪਤਾ ਨੇ ਆਖਿਆ,"ਪੁਲਿਸ ਮਹਿਕਮੇ ਵੱਲੋਂ 24 ਘੰਟਿਆਂ ਤੋਂ ਵੀ ਘੱਟ ਸਮੇਂ ਵਿੱਚ ਕੋਵਿਡ ਕੈਂਟੀਨਾਂ ਬਣਾਈਆਂ ਗਈਆਂ ਹਨ, ਜਿਹਨਾਂ ਵਿੱਚ ਇਸ ਸਕੀਮ ਸ਼ੁਰੂ ਹੋਣ ਦੇ ਪਹਿਲੇ ਦਿਨ ਹੀ 120 ਤੋਂ ਵੀ ਵੱਧ ਪੱਕੇ/ਅਣਪੱਕੇ ਖਾਣੇ ਦੇ ਪੈਕੇਟ ਡਿਲਿਵਰ ਕੀਤੇ ਗਏ ਸਨ।"
ਗੁਪਤਾ ਨੇ ਅੱਗੇ ਦੱਸਿਆ ਕਿ 14 ਮਈ ਤੋਂ 20 ਮਈ ਤੱਕ ਭੋਜਨ ਹੈਲਪਲਾਈਨ 'ਤੇ ਖਾਣੇ ਲਈ ਕੁਲ 385 ਕਾਲਾਂ ਆ ਚੁੱਕੀਆਂ ਹਨ।
ਉਨ੍ਹਾਂ ਵੱਖੋ-ਵੱਖਰੇ ਕਿੱਸੇ ਦੱਸਦਿਆਂ ਕਿਹਾ,"ਪਠਾਨਕੋਟ ਪੁਲਿਸ ਨੂੰ ਝੁੱਗੀ ਵਿੱਚ ਰਹਿੰਦੀ ਇੱਕ ਔਰਤ ਦੀ ਕਾਲ ਆਈ, ਜਿਸਨੇ ਆਖਿਆ ਕਿ ਉਨ੍ਹਾਂ ਕੋਲ ਰਾਸ਼ਨ ਖਰੀਦਣ ਲਈ ਕੋਈ ਪੈਸੇ ਨਹੀਂ ਹੈ। ਪੁਲਿਸ ਦੀ ਟੀਮ ਵੱਲੋਂ ਫ਼ੌਰਨ ਹੀ ਉੱਥੇ ਰਹਿ ਰਹੇ 25 ਮੈਂਬਰਾਂ ਨੂੰ ਰਸਦ ਪਹੁੰਚਾਈ ਗਈ।"
ਗੁਪਤਾ ਵੱਲੋਂ ਦੱਸੇ ਇੱਕ ਹੋਰ ਹੁਸ਼ਿਆਰਪੁਰ ਦੇ ਕਿੱਸੇ ਮੁਤਾਬਕ, ਟਾਂਡਾ ਇਲਾਕੇ ਦੇ ਇੱਕ ਦਿਹਾੜੀਦਾਰ ਪਰਿਵਾਰ ਦੀ ਗੁਜ਼ਾਰਿਸ਼ 'ਤੇ ਡੀਐੱਸਪੀ ਗੁਰਪ੍ਰੀਤ ਸਿੰਘ ਵੱਲੋਂ ਆਪ ਪੀੜਤ ਪਰਿਵਾਰ ਕੋਲ ਜਾ ਕੇ ਫ਼ਲ, ਦੁੱਧ ਅਤੇ ਬਰੈਡ ਦਾ ਨਾਸ਼ਤਾ ਦਿੱਤਾ ਗਿਆ।
ਗੁਪਤਾ ਨੇ ਅੱਗੇ ਦੱਸਿਆ ਕਿ ਪਰਿਵਾਰ ਦੀ ਹਾਲਤ ਜਾਨਣ ਤੋਂ ਬਾਅਦ ਉੱਥੋਂ ਦੇ ਸਰਪੰਚ ਨੇ ਆਪ ਪਰਿਵਾਰ ਦੀ ਦੇਖਭਾਲ ਦੀ ਜਿੰਮੇਵਾਰੀ ਲਈ|
ਪੰਜਾਬ ਪੁਲਿਸ ਨੇ ਅੰਮ੍ਰਿਤਸਰ ਵਿੱਚ ਇੱਕ 40 ਸਾਲਾ ਔਰਤ ਦੀ ਮਦਦ ਵੀ ਕੀਤੀ, ਜਿਸਦਾ ਪਤੀ,ਪੁੱਤਰ ਅਤੇ ਧੀ ਕੋਵਿਡ-19 ਪੌਜ਼ਿਟਿਵ ਸਨ।
ਪੁਲਿਸ ਮਹਿਕਮੇ ਵੱਲੋਂ ਪੀੜਤ ਪਰਿਵਾਰਾਂ ਦੇ ਹਾਲ ਦੀ ਪੂਰੀ ਪੜਤਾਲ ਕੀਤੀ ਜਾ ਰਹੀ ਹੈ, ਕਿ ਕੀਤੇ ਉਨ੍ਹਾਂ ਨੂੰ ਕੋਈ ਹੋਰ ਜ਼ਰੂਰੀ ਲੋੜ ਤਾਂ ਨਹੀਂ।
ਜ਼ਿਕਰਯੋਗ ਹੈ ਕਿ ਡੀਜੀਪੀ ਮੁਤਾਬਕ, ਸਭ ਤੋਂ ਵੱਧ ਕਾਲਾਂ ਅੰਮ੍ਰਿਤਸਰ, ਲੁਧਿਆਣਾ, ਪਟਿਆਲਾ ਅਤੇ ਬਠਿੰਡਾ ਤੋਂ ਆਈਆਂ ਹਨ।
