ਪੰਜਾਬ ਪੁਲਿਸ ਨੇ ਮੋਹਾਲੀ ਬਲਾਸਟ ਪਿੱਛੇ ਲਖਬੀਰ ਸਿੰਘ ਲੰਡਾ ਨੂੰ ਦੱਸਿਆ ਮੁੱਖ ਸਾਜਿਸ਼ਕਰਤਾ

ਇਸ ਹਫ਼ਤੇ ਮੋਹਾਲੀ ਵਿਚ ਪੰਜਾਬ ਪੁਲਿਸ ਦੇ ਇੰਟੈਲੀਜੈਂਸ ਹੈਡਕੁਆਰਟਰ 'ਤੇ ਹੋਏ ਰਾਕੇਟ-ਗ੍ਰਨੇਡ ਹਮਲੇ ਨੂੰ ਲੈ ਕੇ ਪੰਜਾਬ ਪੁਲਿਸ ਨੇ ਲਖਬੀਰ ਸਿੰਘ ਲੰਡਾ ਨੂੰ ਇਸ ਦਾ ਮੁੱਖ ਸਾਜਿਸ਼ਕਰਤਾ ਕਰਾਰ ਦਿੱਤਾ ਹੈ।

ਪੰਜਾਬ ਪੁਲਿਸ ਦੇ ਡਾਇਰੈਕਟਰ ਜਨਰਲ ਵੀ. ਕੇ. ਭਵਰਾ ਨੇ ਅੱਜ ਪ੍ਰੈੱਸ ਕਾਨਫਰੰਸ ਕੀਤੀ। ਉਨ੍ਹਾਂ ਕਿਹਾ ਕਿ ਲਖਬੀਰ ਸਿੰਘ ਲੰਡਾ ਮੁੱਖ ਸਾਜਿਸ਼ਕਰਤਾ ਹੈ ਅਤੇ ਉਹ ਪੰਜਾਬ ਦੇ ਤਰਨਤਾਰਨ ਜ਼ਿਲ੍ਹੇ ਦਾ ਰਹਿਣ ਵਾਲਾ ਹੈ। ਭਵਰਾ ਨੇ ਕਿਹਾ ਕਿ ਲਖਬੀਰ ਗੈਂਗਸਟਰ ਹੈ ਅਤੇ 2017 ਵਿਚ ਕੈਨੇਡਾ ਸ਼ਿਫਟ ਹੋ ਚੁੱਕਾ ਹੈ। ਡੀ. ਜੀ. ਪੀ. ਨੇ ਲੰਡਾ ਨੂੰ ਹਰਿੰਦਰ ਸਿੰਘ ਰਿੰਦਾ ਦਾ ਨਜ਼ਦੀਕੀ ਦੱਸਦੇ ਕਿਹਾ ਕਿ ਇਸ ਦੇ ਬੱਬਰ ਖਾਲਸਾ ਇੰਟਰਨੈਸ਼ਨਲ ਚੀਫ ਵਧਾਵਾ ਨਾਲ ਰਿਸ਼ਤੇ ਹਨ, ਜੋ ਕਿ ਪਾਕਿਸਤਾਨੀ ਦੀ ਆਈ. ਐੱਸ. ਆਈ. ਦੇ ਇਸ਼ਾਰੇ 'ਤੇ ਚੱਲਦਾ ਹੈ।

ਭਵਰਾ ਨੇ ਕਿਹਾ, ''"ਬੱਬਰ ਖਾਲਸਾ ਇੰਟਰਨੈਸ਼ਨਲ ਅਤੇ ਗੈਂਗਸਟਰ ਨੇ ਪਾਕਿਸਤਾਨ ਦੀ ਆਈ. ਐੱਸ. ਆਈ. ਦੀ ਹਮਾਇਤ ਨਾਲ ਮਿਲ ਕੇ ਇਹ ਬਲਾਸਟ ਕੀਤਾ। ਲੰਡਾ ਦੇ ਮੁੱਖ ਸਾਥੀਆਂ ਵਿਚੋਂ ਇੱਕ ਨਿਸ਼ਾਨ ਸਿੰਘ ਹੈ। ਉਹ ਵੀ ਤਰਨਤਾਰਨ ਦਾ ਹੈ ਅਤੇ ਪੁਲਿਸ ਨੇ ਉਸ ਨੂੰ ਫੜ੍ਹ ਲਿਆ ਹੈ। ਉਸ ਨੂੰ ਕੁਝ ਦਿਨ ਪਹਿਲਾਂ ਫਰੀਦਕੋਟ ਪੁਲਿਸ ਨੇ ਗ੍ਰਿਫਤਾਰ ਕੀਤਾ ਸੀ।"

ਡੀ. ਜੀ. ਪੀ. ਨੇ ਕਿਹਾ, "ਲੰਡਾ ਤੋਂ ਇਲਾਵਾ ਨਿਸ਼ਾਨ ਤੇ ਉਸ ਦੇ ਦੋ ਸਾਥੀ ਬਲਜਿੰਦਰ ਰੈਂਬੋ ਅਤੇ ਚੜ੍ਹੜ ਸਿੰਘ ਵੀ ਇਸ ਸਾਜ਼ਿਸ਼ ਵਿਚ ਸ਼ਾਮਲ ਹਨ। ਬਲਜਿੰਦਰ ਰੈਂਬੋ ਵੀ ਤਰਨਤਾਰਨ ਜ਼ਿਲ੍ਹੇ ਦਾ ਹੈ, ਉਸ ਕੋਲੋਂ ਏ. ਕੇ.-47 ਬਰਾਮਦ ਹੋਈ ਹੈ।" ਉਨ੍ਹਾਂ ਕਿਹਾ ਕਿ ਅਗਲੇਰੀ ਜਾਂਚ ਕੀਤੀ ਜਾ ਰਹੀ ਹੈ।