ਬਰੈਂਪਟਨ 'ਚ ਪੰਜਾਬੀ ਭਰਾਵਾਂ 'ਤੇ ਗੋਲੀਬਾਰੀ; ਇਕ ਦੀ ਮੌਤ, ਇਕ ਹਸਪਤਾਲ 'ਚ ਦਾਖ਼ਲ

ਓਨਟਾਰੀਓ ਤੋਂ ਮੰਦਭਾਗੀ ਖ਼ਬਰ ਸਾਹਣੇ ਆਈ ਹੈ, ਜਿੱਥੇ ਦੋ ਪੰਜਾਬੀ ਨੌਜਵਾਨਾਂ ’ਤੇ ਗੋਲੀ ਚੱਲੀ ਹੈ। ਇਹ ਘਟਨਾ ਬਰੈਂਪਟਨ ਵਿਚ ਬੁੱਧਵਾਰ ਰਾਤ ਵਾਪਰੀ। ਪੀੜਤ ਦੋਵੇਂ ਭਰਾ ਸਨ, ਜਿਨ੍ਹਾਂ ਵਿਚੋਂ ਇੱਕ ਦੀ ਮੌਤ ਹੋ ਗਈ, ਜਦੋਂ ਕਿ ਦੂਜਾ ਹਸਪਤਾਲ ਦਾਖ਼ਲ ਹੈ।

ਪੀਲ ਪੁਲਿਸ ਮੁਤਾਬਕ, ਉਨ੍ਹਾਂ ਨੂੰ ਬੁੱਧਵਾਰ ਰਾਤ ਕਰੀਬ 11.30 ਵਜੇ ਗੋਰਵੇ ਅਤੇ ਮੇਫੀਲਡ ਰੋਡ ਨੇੜੇ ਓਡੀਓਨ ਸਟ੍ਰੀਟ ’ਤੇ ਗੋਲੀਬਾਰੀ ਦੀ ਰਿਪੋਰਟ ਮਿਲੀ। ਪੁਲਿਸ ਦਾ ਮੰਨਣਾ ਹੈ ਕਿ ਇਹ ਟਾਰੇਗਟਿਡ ਸੀ।

ਇਨਵੈਸਟੀਗੇਟਰਸ ਵਲੋਂ ਇਸ ਹਮਲੇ ਵਿਚ ਸ਼ਾਮਲ ਚਿਟੇ ਰੰਗ ਦੀ ਚਾਰ ਦਰਵਾਜ਼ੇ ਵਾਲੀ ਸੇਡਾਨ ਦੀ ਤਲਾਸ਼ ਕੀਤੀ ਜਾ ਰਹੀ ਹੈ, ਜਿਸ ਵਿਚ ਆਏ ਸ਼ੱਕੀਆਂ ਨੇ ਗੋਲੀਆਂ ਚਲਾਈਆਂ ਸਨ। ਮੀਡੀਆ ਰਿਪੋਰਟ ਵਿਚ ਪੀੜਤਾਂ ਦੇ ਪੰਜਾਬ ਦੇ ਜ਼ਿਲ੍ਹਾ ਤਰਨਤਾਰਨ ਨਾਲ ਸਬੰਧਤ ਹੋਣ ਦੀ ਜਾਣਕਾਰੀ ਸਾਹਮਣੇ ਆਈ ਹੈ ਅਤੇ ਇਨ੍ਹਾਂ ਦੀ ਪਛਾਣ ਪ੍ਰਿਤਪਾਲ ਸਿੰਘ ਅਤੇ ਖੁਸ਼ਵੰਤ ਸਿੰਘ ਵਜੋਂ ਹੋਈ ਹੈ।

ਸੋਸ਼ਲ ਮੀਡੀਆ ’ਤੇ ਸਰਕੂਲੇਟ ਹੋਈ ਵੀਡੀਓ ਵਿਚ ਦੇਖਿਆ ਜਾ ਸਕਦਾ ਹੈ ਕਿ ਦੋਵੇਂ ਭਰਾ ਆਪਣੀ ਗੱਡੀ ਤੋਂ ਬਰਫ ਹਟਾ ਰਹੇ ਸਨ ਜਦੋਂ ਇੱਕ ਸਫੈਦ ਕਾਰ ਉਨ੍ਹਾਂ ਕੋਲ ਰੁਕਦੀ ਹੈ ਅਤੇ ਸ਼ੂਟਰ ਗੋਲੀ ਚਲਾਉਂਦਾ ਹੈ। ਮ੍ਰਿਤਕ ਪ੍ਰਿਤਪਾਲ ਸਿੰਘ 6-7 ਮਹੀਨੇ ਪਹਿਲਾਂ ਹੀ ਆਪਣੇ ਵੱਡੇ ਭਰਾ ਖੁਸ਼ਵੰਤ ਕੋਲ ਬਰੈਂਪਟਨ ਆਇਆ ਸੀ।