15.9C Vancouver 15.9C VancouverDec 10, 2025 7:44 PM - Connect Newsroom - Ramandeep Kaur with files from The Canadian Press
ਕਿਊਬੈਕ ਵਿਚ ਲਿਬਰਲ ਪਾਰਟੀ ਇਸ ਸਮੇਂ ਵੱਡੇ ਸਿਆਸੀ ਸੰਕਟ ਵਿਚ ਘਿਰ ਗਈ ਹੈ। ਸੂਬੇ ਦੀ ਭ੍ਰਿਸ਼ਟਾਚਾਰ ਵਿਰੋਧੀ ਯੂਨਿਟ ਨੇ ਪਾਰਟੀ ਖ਼ਿਲਾਫ਼ ਜਾਂਚ ਸ਼ੁਰੂ ਕੀਤੀ ਹੈ। ਰਿਪੋਰਟਸ ਮੁਤਾਬਕ, ਜਾਂਚ ਦਾ ਮੁੱਖ ਕਾਰਨ ਲੀਡਰਸ਼ਿਪ ਦੌੜ ਨਾਲ ਸਬੰਧਤ ਦੋਸ਼ ਹਨ, ਜਿਸ ਵਿਚ ਪਾਬਲੋ ਰੋਡਰਿਗੇਜ਼ ਲੀਡਰ ਬਣੇ ਸਨ, ਜੋ ਕਿ ਫੈਡਰਲ ਸਰਕਾਰ ਵਿਚ ਟ੍ਰਾਂਸਪੋਰਟ ਮਿਨਿਸਟਰ ਵੀ ਰਹਿ ਚੁੱਕੇ ਹਨ।
ਦੋਸ਼ ਹੈ ਕਿ ਲੀਡਰਸ਼ਿਪ ਦੌੜ ਦੌਰਾਨ ਕੁਝ ਮੈਂਬਰਾਂ ਨੂੰ ਰੋਡਰਿਗੇਜ਼ ਦਾ ਸਮਰਥਨ ਕਰਨ ਬਦਲੇ ਨਕਦ ਇਨਾਮ ਦੀ ਪੇਸ਼ਕਸ਼ ਕੀਤੀ ਗਈ ਸੀ। ਇਸ ਵਿਚ ਕਥਿਤ ਤੌਰ 'ਤੇ ਵਿਧਾਨ ਸਭਾ ਦੇ ਫੰਡਾਂ ਨੂੰ ਗੈਰ-ਕਾਨੂੰਨੀ ਢੰਗ ਨਾਲ ਪਾਰਟੀ ਦੇ ਉਦੇਸ਼ਾਂ ਲਈ ਵਰਤਣ ਦੇ ਦੋਸ਼ ਸ਼ਾਮਲ ਹਨ। ਰੋਡਰਿਗੇਜ਼ ਨੇ ਜਾਂਚ ਦਾ ਸਵਾਗਤ ਕਰਦੇ ਹੋਏ ਸੋਸ਼ਲ ਮੀਡੀਆ 'ਤੇ ਲਿਖਿਆ ਕਿ ਪਾਰਟੀ ਪੂਰਾ ਸਹਿਯੋਗ ਕਰੇਗੀ।
ਉਹਨਾਂ ਕਿਹਾ ਕਿ ਇਹ ਮਹੱਤਵਪੂਰਨ ਹੈ ਕਿ ਅਸੀਂ ਇਸ ਮਾਮਲੇ ਦੀ ਤਹਿ ਤੱਕ ਜਾਈਏ ਅਤੇ ਜੇ ਕਿਸੇ ਨੇ ਕੋਈ ਗੈਰ-ਕਾਨੂੰਨੀ ਕੰਮ ਕੀਤਾ ਹੈ ਤਾਂ ਸੱਚ ਸਾਹਮਣੇ ਆਉਣਾ ਚਾਹੀਦਾ ਹੈ ਅਤੇ ਲੀਡਰ ਵਜੋਂ ਮੈਂ ਬਿਨਾਂ ਝਿਜਕ ਕਾਰਵਾਈ ਕਰਾਂਗਾ। ਰੋਡਰਿਗੇਜ਼ ਨੇ ਇਹ ਵੀ ਦੱਸਿਆ ਕਿ ਉਨ੍ਹਾਂ ਨੇ ਲੀਡਰਸ਼ਿਪ ਦੌੜ ਦੇ ਦੋਸ਼ਾਂ ਦੀ ਜਾਂਚ ਲਈ ਇੱਕ ਸੇਵਾਮੁਕਤ ਜੱਜ ਨੂੰ ਨਿਯੁਕਤ ਕੀਤਾ ਹੈ, ਜਿਸ ਦੀ ਰਿਪੋਰਟ ਜਨਵਰੀ 2026 ਦੇ ਅਖੀਰ ਤੱਕ ਆਉਣ ਦੀ ਉਮੀਦ ਹੈ।
