13.99C Vancouver 13.99C VancouverJul 15, 2024 5:13 PM - The Canadian Press
ਕਿਊਬੈਕ ਆਰ.ਸੀ.ਐੱਮ.ਪੀ. ਨੇ ਲਾਨੌਡੀਏਰ ਖੇਤਰ ਅਤੇ ਸ਼ੇਰਬਰੂਕ ਵਿਚ ਤਲਾਸ਼ੀ ਮੁਹਿੰਮ ਦੌਰਾਨ ਇੱਕ ਗ੍ਰੈਂਡ ਪਿਆਨੋ ਵਿਚ ਲੁਕਾਈ ਗਈ 62.7 ਕਿਲੋ ਕੋਕੀਨ ਜ਼ਬਤ ਕੀਤੀ ਹੈ। ਕਿਊਬੈਕ ਪੁਲਿਸ ਨੇ ਕਿਹਾ ਕਿ ਅਮਰੀਕਾ ਦੀ ਹੋਮਲੈਂਡ ਸਕਿਓਰਿਟੀ ਇਨਵੈਸਟੀਗੇਸ਼ਨ ਏਜੰਸੀ ਤੋਂ ਮਿਲੀ ਸੂਚਨਾ ਦੇ ਆਧਾਰ ’ਤੇ ਉਸ ਨੇ 12 ਜੁਲਾਈ ਨੂੰ ਸਰਚ ਓਪਰੇਸ਼ਨ ਚਲਾਇਆ ਅਤੇ ਚਾਰ ਲੋਕਾਂ ਨੂੰ ਗ੍ਰਿਫਤਾਰ ਕੀਤਾ।
ਇਹ ਮੁਲਜ਼ਮ ਡਰੱਗਜ਼ ਦੇ ਇੰਪੋਰਟ ਅਤੇ ਤਸਕਰੀ ਦੀ ਸਾਜ਼ਸ਼ ਵਿਚ ਸ਼ਾਮਲ ਸਨ। ਕਿਊਬੈਕ ਪੁਲਿਸ ਨੇ ਕਿਹਾ ਕਿ ਮੁਲਜ਼ਮਾਂ ਕੋਲੋਂ $10,000 ਕੈਸ਼ ਦੇ ਨਾਲ-ਨਾਲ ਕਈ ਸਾਰੇ ਇਲੈਕਟ੍ਰਾਨਿਕ ਉਪਕਰਨ ਵੀ ਜ਼ਬਤ ਕੀਤੇ ਗਏ।
ਗ੍ਰਿਫਤਾਰ ਕੀਤੇ ਗਏ ਮੁਲਜ਼ਮਾਂ ਵਿਚ ਇੱਕ ਦੀ ਉਮਰ 26 ਸਾਲ, ਦੂਜੇ ਦੀ 52 ਸਾਲ, ਤੀਜੇ ਮੁਲਜ਼ਮ ਦੀ ਉਮਰ 37 ਸਾਲ ਅਤੇ ਚੌਥੇ ਮੁਲਜ਼ਮ ਦੀ ਉਮਰ 28 ਸਾਲ ਦੀ ਹੈ। ਇਹ ਚਾਰੋ ਕਿਊਬੈਕ ਨਾਲ ਸਬੰਧਤ ਹਨ।
ਕਿਊਬੈਕ ਆਰ.ਸੀ.ਐੱਮ.ਪੀ. ਨੇ ਕਿਹਾ ਕਿ ਇਨ੍ਹਾਂ ਦੀ ਕੋਰਟ ਵਿਚ ਪੇਸ਼ੀ 17 ਜੁਲਾਈ ਨੂੰ ਹੋਵੇਗੀ ਅਤੇ ਉਦੋਂ ਤੱਕ ਇਹ ਜੇਲ੍ਹ ਵਿਚ ਰਹਿਣਗੇ। ਇਨ੍ਹਾਂ ਚਾਰੋ ਮੁਲਜ਼ਮਾਂ ਨੂੰ ਕੋਕੀਨ ਇੰਪੋਰਟ ਕਰਨ ਅਤੇ ਇਸ ਨੂੰ ਤਸਕਰੀ ਦੇ ਮਕਸਦ ਨਾਲ ਲੁਕਾ ਕੇ ਰੱਖਣ ਅਤੇ ਸਾਜ਼ਸ਼ ਦੇ ਦੋਸ਼ਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ।
