ਰਾਜਸਥਾਨ: ਰਾਜ ਭਵਨ ਦੇ ਬਾਹਰ ਕਾਂਗਰਸੀ ਵਿਧਾਇਕਾਂ ਦਾ ਧਰਨਾ, ਮੁੱਖ ਮੰਤਰੀ ਗਹਿਲੋਤ ਨੇ ਚੁੱਕੇ ਰਾਜਪਾਲ ਦੇ ਫ਼ੈਸਲੇ 'ਤੇ ਸਵਾਲ

ਰਾਜਸਥਾਨ ਦੇ ਮੁੱਖ ਮੰਤਰੀ ਅਸ਼ੋਕ ਗਹਿਲੋਤ ਨੇ ਅੱਜ ਸੂਬੇ ਦੇ ਰਾਜਪਾਲ ਕਲਰਾਜ ਮਿਸ਼ਰਾ ਨਾਲ ਮੁਲਾਕਾਤ ਕੀਤੀ ਅਤੇ ਬਾਅਦ ਵਿੱਚ ਕਈ ਵਿਧਾਇਕਾਂ ਦੇ ਨਾਲ ਧਰਨਾ ਵੀ ਦਿੱਤਾ।

ਮੁਲਾਕਾਤ ਤੋਂ ਬਾਅਦ ਧਰਨੇ 'ਤੇ ਬੈਠਣ ਦੌਰਾਨ ਉਨ੍ਹਾਂ ਕਿਹਾ ਕਿ ਜੇਕਰ ਉੱਤੋਂ ਦਬਾਅ ਨਾ ਹੁੰਦਾ ਤਾਂ ਰਾਜਪਾਲ ਨੇ ਵਿਧਾਨ ਸਭਾ ਸੈਸ਼ਨ ਨੂੰ ਨਹੀਂ ਰੋਕਣਾ ਸੀ।

ਰਾਜ ਭਵਨ ਦੇ ਬਾਹਰ ਕਾਂਗਰਸੀ ਵਿਧਾਇਕਾਂ ਨੇ ਮੁੱਖ ਮੰਤਰੀ ਦੇ ਹੱਕ 'ਚ ਨਾਅਰੇਬਾਜ਼ੀ ਕੀਤੀ।

ਮੁੱਖ ਮੰਤਰੀ ਅਸ਼ੋਕ ਗਹਿਲੋਤ ਨੇ ਕਿਹਾ, "ਰਾਜਪਾਲ ਹੀ ਸਾਡੇ ਸੰਵਿਧਾਨਿਕ ਮੁਖੀ ਹਨ। ਮੈਨੂੰ ਇਹ ਕਹਿਣ 'ਚ ਕੋਈ ਝਿਜਕ ਨਹੀਂ ਹੈ ਕਿ, ਉਨ੍ਹਾਂ ਬਿਨਾ ਕਿਸੇ ਦਬਾਅ ਦੇ ਸੈਸ਼ਨ ਨੂੰ ਨਹੀਂ ਰੋਕਿਆ ਹੋ ਸਕਦਾ। ਉਨ੍ਹਾਂ ਕੱਲ ਹੀ ਫੈਸਲਾ ਕਿਉਂ ਨਹੀਂ ਲਿਆ ? ਅਸੀਂ ਉਨ੍ਹਾਂ ਨੂੰ ਫਿਰ ਤੋਂ ਬੇਨਤੀ ਕੀਤੀ ਹੈ ਕਿ, ਇਸ ਬਾਰੇ ਜਲਦੀ ਹੀ ਫੈਸਲਾ ਲਿਆ ਜਾਵੇ। ਲੋਕ ਉਡੀਕ ਕਰ ਰਹੇ ਹਨ। ਮੈਨੂੰ ਯਕੀਨ ਹੈ ਕਿ ਰਾਜਪਾਲ ਬਿਨਾ ਕਿਸੇ ਦਬਾਅ ਹੇਠ ਆਏ ਆਪਣਾ ਫੈਸਲਾ ਲੈ ਸਕਣਗੇ। ਸਾਨੂੰ ਉਮੀਦ ਹੈ ਕਿ, ਅਸੈਂਬਲੀ ਸੈਸ਼ਨ ਹੋਵੇ। ਇਸੇ ਕਾਰਨ ਅਸੀਂ ਧਰਨਾ ਦੇ ਰਹੇ ਹਾਂ। ਜਦ ਸਾਨੂੰ ਚਿੱਠੀ ਮਿਲ ਜਾਵੇਗੀ, ਤਾਂ ਅਸੀਂ ਅੱਗੇ ਦੇ ਕਿਸੇ ਫੈਸਲੇ ਬਾਰੇ ਸੋਚ ਸਕਾਂਗੇ।"