20.26C Vancouver 20.26C VancouverJul 27, 2021 9:21 AM -
ਵਿਰੋਧੀ ਧਿਰ ਦੇ ਹੰਗਾਮੇ ਦੇ ਦੌਰਾਨ, ਰਾਜ ਸਭਾ ਦੇ ਮੁਖੀ ਐੱਮ ਵੈਂਕਈਆ ਨਾਇਡੂ ਨੇ ਅੱਜ ਮੰਗਲਵਾਰ ਨੂੰ ਸਦਨ ਦੀ ਕਾਰਵਾਈ ਵਿੱਚ ਲਗਾਤਾਰ ਆ ਰਹੀਆਂ ਰੁਕਾਵਟਾਂ ਦਾ ਮੁੱਦਾ ਚੁੱਕਿਆ ਹੈ।
ਏਵਾਨ (ਹਾਊਸ) ਨੂੰ ਸੰਬੋਧਨ ਕਰਦਿਆਂ, ਐੱਮ ਵੈਂਕਈਆ ਨਾਇਡੂ ਨੇ ਆਖਿਆ,"ਮੈਂ, ਮਿਲੀਆਂ ਮੀਡੀਆ ਰਿਪੋਰਟਾਂ ਤੋਂ ਪ੍ਰੇਸ਼ਾਨ ਹਾਂ ਕਿ ਏਵਾਨ ਦੇ ਕੁਝ ਹਿੱਸੇ, ਰਹਿੰਦੇ ਇਜਲਾਸ ਦੌਰਾਨ ਇਸਦੀ ਕਾਰਵਾਈ ਨਾ ਹੋਣ ਦੇਣ ਲਈ ਦ੍ਰਿੜ ਹਨ। ਪਾਰਲੀਮੈਂਟ ਕਾਨੂੰਨ ਬਣਾਉਣ ਅਤੇ ਜਨਤਕ ਮੁੱਦਿਆਂ 'ਤੇ ਚਰਚਾ ਕਰਨ ਲਈ ਹੁੰਦੀ ਹੈ।"
ਨਾਇਡੂ ਨੇ ਅੱਗੇ ਆਖਿਆ,"ਪਾਰਟੀ ਲੀਡਰਾਂ ਨੇ ਮੇਰੇ ਕੋਲ ਮੁੱਦਿਆਂ 'ਤੇ ਚਰਚਾ ਦੀ ਮੌਜੂਦਾ ਤਰਸਯੋਗ ਹਾਲਤ ਅਤੇ ਜਨਤਾ ਨਾਲ ਜੁੜੇ ਮੁੱਦਿਆਂ 'ਤੇ ਚਰਚਾ ਨਾ ਕਰਨ ਦਾ ਮੁੱਦਾ ਚੁੱਕਿਆ ਹੈ। ਮੈਂ ਤੁਹਾਨੂੰ ਸਾਰਿਆਂ ਨੂੰ ਇਸ ਰੱਵਈਏ 'ਤੇ ਮੁੜ ਵਿਚਾਰ ਕਰਨ ਦੀ ਅਪੀਲ ਕਰਦਾ ਹਾਂ।"
ਦੱਸਣਯੋਗ ਹੈ ਕਿ ਵਿਰੋਧੀ ਧਿਰ ਦੇ ਹੰਗਾਮੇ ਕਰਕੇ ਰਾਜ ਸਭਾ ਦੀ ਕਾਰਵਾਈ, ਅੱਜ ਮੰਗਲਵਾਰ ਨੂੰ ਦੁਪਹਿਰ 12 ਵਜੇ ਤੱਕ ਮੁਲਤਵੀ ਕਰਨੀ ਪਈ।
ਦਰਅਸਲ, ਜਿਵੇਂ ਹੀ ਮਾਨਸੂਨ ਇਜਲਾਸ ਦੇ ਛੇਵੇਂ ਦਿਨ ਦੀ ਕਾਰਵਾਈ ਸ਼ੁਰੂ ਹੋਈ, ਵਿਰੋਧੀ ਪਾਰਟੀਆਂ ਨੇ 'ਪੈਗੈਸਸ ਪ੍ਰੌਜੈਕਟ' ਦੀਆਂ ਮੀਡੀਆ ਰਿਪੋਰਟਾਂ ਦੇ ਮੁੱਦੇ 'ਤੇ ਨਾਅਰੇ ਲਾਉਣੇ ਸ਼ੁਰੂ ਕਰ ਦਿੱਤੇ।
ਸੋਮਵਾਰ ਨੂੰ, ਸਰਕਾਰ ਵੱਲੋਂ ਉਤਲੇ ਏਵਾਨ ਵਿੱਚ ਵਿਧਾਨਿਕ ਏਜੰਡੇ ਬਾਰੇ ਗੱਲ ਕਰਨ 'ਤੇ ਹੀ ਪੰਜ ਵਾਰ ਕਾਰਵਾਈ ਮੁਲਤਵੀ ਕੀਤੀ ਗਈ।
ਹਾਊਸ ਦੀ ਕਾਰਵਾਈ ਦੁਪਹਿਰ 12 ਵਜੇ, 2 ਵਜੇ, 3 ਵਜੇ, 4 ਵਜੇ ਅਤੇ 5 ਵਜੇ ਮੁਲਤਵੀ ਕੀਤੀ ਗਈ।
ਜ਼ਿਕਰਯੋਗ ਹੈ ਕਿ ਬੀਤੇ ਹਫ਼ਤੇ ਸ਼ੁਰੂ ਹੋਏ ਪਾਰਲੀਮੈਂਟ ਦੇ ਮਾਨਸੂਨ ਇਜਲਾਸ ਦੀ ਸ਼ੁਰੂਆਤ ਤੋਂ ਹੀ, ਦੋਵਾਂ ਏਵਾਨਾਂ ਦੀ ਕਾਰਵਾਈ ਦੌਰਾਨ ਵਿਰੋਧੀ ਧਿਰ ਵੱਲੋਂ ਆਪਣੀਆਂ ਮੰਗਾਂ ਨੂੰ ਲੈਕੇ ਰੋਹ ਵਿਖਾਵਾ ਕੀਤਾ ਜਾ ਰਿਹਾ ਹੈ।
