19.88C Vancouver 19.88C VancouverMar 15, 2020 8:58 PM -
ਅੱਜ ਮੱਧ ਪ੍ਰਦੇਸ਼ ਦੇ ਮੁੱਖ ਮੰਤਰੀ ਕਮਲਨਾਥ ਨੇ ਗਵਰਨਰ ਲਾਲਜੀ ਟੰਡਨ ਨਾਲ ਮੁਲਾਕਾਤ ਕੀਤੀ ਅਤੇ ਕਿਹਾ ਕਿ ਉਹ ਅਸੈਂਬਲੀ ਵਿੱਚ ਆਪਣਾ ਬਹੁਮਤ ਸਾਬਤ ਕਰਨ ਲਈ ਤਿਆਰ ਹਨ ਅਤੇ ਜਲਦ ਹੀ ਸਪੀਕਰ ਨਾਲ ਇਸ ਸਬੰਧ ਵਿਚ ਗੱਲ ਕਰਨਗੇ।
"ਮੈਨੂੰ ਗਵਰਨਰ ਦਾ ਫੋਨ ਆਇਆ, ਉਨ੍ਹਾਂ ਨੇ ਅਸੈਂਬਲੀ ਦੀ ਨਿਰਵਿਘਨ ਕਾਰਵਾਈ ਸੁਨਿਸ਼ਚਿਤ ਕਰਨ ਲਈ ਮੈਨੂੰ ਮਿਲਣ ਲਈ ਬੁਲਾਇਆ ਸੀ। ਮੈਂ ਗਵਰਨਰ ਨੂੰ ਦੱਸਿਆ ਕਿ ਮੈਂ ਕੱਲ੍ਹ ਸਪੀਕਰ ਨਾਲ ਗੱਲ ਕਰੂੰਗਾ। ਇਸ ਦਾ ਫੈਸਲਾ ਸਪੀਕਰ ਵੱਲੋਂ ਲਿਆ ਜਾਣਾ ਹੈ", ਗਵਰਨਰ ਨਾਲ ਹੋਈ ਮੀਟਿੰਗ ਤੋਂ ਬਾਅਦ ਕਮਲਨਾਥ ਨੇ ਰਿਪੋਰਟਰਾਂ ਨੂੰ ਦੱਸਿਆ।
"ਮੈਂ ਗਵਰਨਰ ਨੂੰ ਦੱਸਿਆ ਕਿ ਮੈਂ ਫਲੋਰ ਟੈਸਟ ਲਈ ਤਿਆਰ ਹਾਂ ਅਤੇ ਜਿਨ੍ਹਾਂ ਵਿਧਾਇਕਾਂ ਨੂੰ ਬੰਦੀ ਬਣਾਇਆ ਹੋਇਆ ਹੈ ਉਨ੍ਹਾਂ ਨੂੰ ਛੱਡ ਦਿੱਤਾ ਜਾਣਾ ਚਾਹੀਦਾ ਹੈ। ਮੈਂ ਕੱਲ ਸਪੀਕਰ ਨਾਲ ਇਸ ਬਾਰੇ ਗੱਲ ਕਰਾਂਗਾ।"
ਸਦਨ ਦੀ ਸੋਮਵਾਰ ਲਈ ਤਿਆਰ ਕਾਰਜ ਸੂਚੀ ਵਿੱਚ ਗਵਰਨਰ ਦਾ ਸੰਬੋਧਨ ਅਤੇ ਮੋਸ਼ਨ ਆਫ਼ ਥੈਂਕਸ ਸ਼ਾਮਲ ਹੈ ਪਰ ਇਸ ਵਿੱਚ ਅਜੇ ਤੱਕ ਫਲੋਰ ਟੈਸਟ ਦਾ ਕੋਈ ਜ਼ਿਕਰ ਨਹੀਂ ਹੈ।
ਬੀਜੇਪੀ ਵੱਲੋਂ ਆਪਣੇ ਸਾਰੇ ਮੈਂਬਰਾਂ ਨੂੰ 16 ਮਾਰਚ ਨੂੰ ਅਸੈਂਬਲੀ ਵਿੱਚ ਫਲੋਰ ਟੈਸਟ ਲਈ ਹਾਜ਼ਰ ਰਹਿਣ ਦੀ ਹਦਾਇਤ ਦਿੱਤੀ ਗਈ ਹੈ।
ਰਾਜਨੀਤਿਕ ਅਨਿਸ਼ਚਿਤਤਾ ਦੇ ਚੱਲਦੇ ਬੀਜੇਪੀ ਅਤੇ ਕਾਂਗਰਸ ਨੇ ਆਪਣੇ ਵਿਧਾਇਕਾਂ ਨੂੰ ਸੂਬੇ ਵਿੱਚੋਂ ਬਾਹਰ ਕੱਢ ਕੇ ਲਗਜ਼ਰੀ ਹੋਟਲਾਂ ਵਿੱਚ ਡੱਕਿਆ ਹੋਇਆ ਹੈ।
ਇਹ ਅਨਿਸ਼ਚਿਤਤਾ ਜਯੋਤਿਰਾਦਿੱਤਿਆ ਸਿੰਧੀਆ ਦੇ ਨਾਲ 22 ਵਿਧਾਇਕਾਂ ਵੱਲੋਂ ਕਾਂਗਰਸ ਛੱਡੇ ਜਾਣ ਤੋਂ ਬਾਅਦ ਉਜਾਗਰ ਹੋਈ ਹੈ।
ਕੁਝ ਸਮਾਂ ਪਹਿਲਾਂ ਕਾਂਗਰਸ ਵੱਲੋਂ ਬੀਜੇਪੀ 'ਤੇ ਕਾਂਗਰਸ ਦੇ ਅੱਠ ਵਿਧਾਇਕਾਂ ਨੂੰ ਮਾਨੇਸਰ ਅਤੇ ਬੰਗਲੁਰੂ ਦੇ ਹੋਟਲਾਂ ਵਿੱਚ ਉਨ੍ਹਾਂ ਦੀ ਮਰਜ਼ੀ ਦੇ ਖ਼ਿਲਾਫ਼ ਬੰਦੀ ਬਣਾਉਣ ਦੇ ਆਰੋਪ ਲਗਾਏ ਗਏ ਸਨ।
