ਫੈਡਰਲ ਹੈਲਥ ਮਨਿਸਟਰ ਮੁਤਾਬਕ ਕਰੋਨਾਵਾਇਰਸ ਵਾਸਤੇ ਕੈਨੇਡਾ ਵਿੱਚ ਕੁਝ ਵਿਅਕਤੀ ਨਿਗਰਾਨੀ ਹੇਠ

ਫੈਡਰਲ ਹੈਲਥ ਮਨਿਸਟਰ ਪੈੱਟੀ ਹਾਇਡੁ (Federal Health Minister Patty Hajdu) ਮੁਤਾਬਕ ਚੀਨ ਤੋਂ ਕੈਨੇਡਾ ਆਏ ਕੁਝ ਵਿਅਕਤੀਆਂ ਨੂੰ ਕਰੋਨਾਵਾਇਰਸ ਵਾਸਤੇ ਨਿਗਰਾਨੀ ਹੇਠ ਰੱਖਿਆ ਗਿਆ ਹੈ।

ਹਾਇਡੁ ਨੇ ਕਿਹਾ ਕਿ 5 ਤੋਂ 6 ਵਿਅਕਤੀ ਜਿਨ੍ਹਾਂ ਵਿੱਚੋਂ ਇੱਕ ਕਯੂਬੈਕ ਵਿੱਚ ਅਤੇ ਇੱਕ ਵੈਨਕੂਵਰ ਵਿੱਚ ਹੈ ਨਿਗਰਾਨੀ ਅਧੀਨ ਹਨ। ਉਨ੍ਹਾਂ ਇਸ ਗੱਲ ਉੱਤੇ ਜ਼ੋਰ ਦਿੱਤਾ ਕਿ ਕੈਨੇਡੀਅਨ ਲੋਕਾਂ ਨੂੰ ਇਹ ਵਾਇਰਸ ਹੋਣ ਦਾ ਖ਼ਤਰਾ ਬਹੁਤ ਘੱਟ ਹੈ ਅਤੇ ਕੈਨੇਡਾ ਵਿੱਚ ਕਰੋਨਾਵਾਇਰਸ ਦੇ ਕੋਈ ਵੀ ਕੇਸ ਸਾਹਮਣੇ ਨਹੀਂ ਆਏ ਹਨ।

ਚੀਨ ਵਿੱਚ ਇਸ ਵਾਇਰਸ ਨਾਲ 500 ਵਿਅਕਤੀਆਂ ਦੇ ਪੀੜਤ ਹੋਣ ਦੀ ਖ਼ਬਰ ਹੈ ਅਤੇ 17 ਵਿਅਕਤੀ ਮਾਰੇ ਗਏ ਹਨ।

ਇਸ ਨੂੰ ਫੈਲਣ ਤੋਂ ਬਚਾਉਣ ਲਈ ਚੀਨ ਦੇ ਸ਼ਹਿਰ ਵੂਹਾਨ ਨੂੰ ਦੋ ਹੋਰ ਸ਼ਹਿਰਾਂ ਸਮੇਤ ਸਿਹਤ ਅਧਿਕਾਰੀਆਂ ਵੱਲੋਂ ਕੁਰਾਟੀਨ (quarantine) ਅੰਦਰ ਰੱਖਿਆ ਗਿਆ ਹੈ।

ਵਰਲਡ ਹੈਲਥ ਆਰਗੇਨਾਈਜ਼ੇਸ਼ਨ (World Health Organization) ਵੱਲੋਂ ਇਹ ਵਿਚਾਰ ਕੀਤਾ ਜਾ ਰਿਹਾ ਹੈ ਕਿ ਕਰੋਨਾਵਾਇਰਸ ਕਾਰਨ ਗਲੋਬਲ ਹੈਲਥ ਐਮਰਜੈਂਸੀ (global health emergency) ਲਾਗੂ ਕਰਨੀ ਹੈ ਜਾਂ ਨਹੀਂ।

ਹਾਇਡੁ ਨੇ ਕਿਹਾ ਕਿ ਜਿੱਥੇ ਇਸ ਸਬੰਧ ਵਿੱਚ ਇਹਤਿਆਤ ਵਰਤਣੀ ਜ਼ਰੂਰੀ ਹੈ ਉੱਥੇ ਹੀ ਕੈਨੇਡਾ ਦੇ ਲੋਕਾਂ ਨੂੰ ਘਬਰਾਉਣ ਦੀ ਲੋੜ ਨਹੀਂ ਕਿਉਂਕਿ ਕੈਨੇਡਾ ਵੱਲੋਂ ਆਪਣੇ ਅੰਤਰਰਾਸ਼ਟਰੀ ਸਾਥੀਆਂ ਨਾਲ ਮਿਲ ਕੇ ਸਥਿਤੀ ਨਾਲ ਨਜਿੱਠਣ ਲਈ ਵਾਜਬ ਕਦਮ ਚੁੱਕੇ ਜਾ ਰਹੇ ਹਨ। ਬਾਹਰਲੇ ਮੁਲਕਾਂ ਤੋਂ ਕੈਨੇਡਾ ਆ ਰਹੇ ਲੋਕਾਂ ਨੂੰ ਫਲੂ ਵਰਗੀਆਂ ਨਿਸ਼ਾਨੀਆਂ ਉੱਤੇ ਧਿਆਨ ਦੇਣਾ ਜ਼ਰੂਰ ਦੇਣਾ ਚਾਹੀਦਾ ਹੈ।