ਸੀਕ੍ਰੇਟ ਸਰਵਿਸ ਦੀ ਮੁਖੀ ਕਿੰਬਰਲੀ ਚੀਟਲ ਨੇ ਦਿੱਤਾ ਅਸਤੀਫ਼ਾ

ਅਮਰੀਕਾ ਦੇ ਸਾਬਕਾ ਰਾਸ਼ਟਰਪਤੀ ਡੋਨਲਡ ਟਰੰਪ ’ਤੇ ਹੋਈ ਗੋਲੀਬਾਰੀ ਤੋਂ ਬਾਅਦ ਨਿਸ਼ਾਨੇ ’ਤੇ ਆਈ ਸੀਕ੍ਰੇਟ ਸਰਵਿਸ ਦੀ ਮੁਖੀ ਕਿੰਬਰਲੀ ਚੀਟਲ ਨੇ ਆਖਰਕਾਰ ਅਸਤੀਫਾ ਦੇ ਦਿੱਤਾ ਹੈ। ਬੀਤੇ ਕੱਲ੍ਹ ਹੀ ਉਨ੍ਹਾਂ ਨੇ ਅਸਤੀਫਾ ਦੇਣ ਤੋਂ ਇਨਕਾਰ ਕੀਤਾ ਸੀ। ਮੁਖੀ ਕਿੰਬਰਲੀ ਚੀਟਲ ਤੋਂ ਪ੍ਰਤੀਨਿਧੀ ਸਦਨ ਦੀ ਕਮੇਟੀ ਨੇ ਸੋਮਵਾਰ 6 ਘੰਟੇ ਤੱਕ ਪੁੱਛਗਿੱਛ ਕੀਤੀ ਸੀ ਅਤੇ ਇਸ ਦੌਰਾਨ ਉਨ੍ਹਾਂ ਟਰੰਪ ਦੀ

ਸੁਰੱਖਿਆ ਵਿਚ ਹੋਈ ਅਸਫਲਤਾ ਦੀ ਪੂਰੀ ਜ਼ਿੰਮੇਵਾਰੀ ਲਈ ਸੀ। ਚੀਟਲ ਨੇ ਆਪਣੇ ਅਸਤੀਫੇ ਵਿਚ ਲਿਖਿਆ ਕਿ ਨੌਕਰੀ ਛੱਡਣ ਦਾ ਫੈਸਲਾ ਕਾਫ਼ੀ ਮੁਸ਼ਕਲ ਸੀ ਅਤੇ ਇਹ ਕਦਮ ਉਨ੍ਹਾਂ ਨੇ ਬੜੇ ਭਰੇ ਮਨ ਨਾਲ ਉਠਾਇਆ ਹੈ।

ਉਥੇ ਹੀ ਰਾਸ਼ਟਰਪਤੀ ਬਾਈਡਨ ਨੇ ਇਸ ’ਤੇ ਪ੍ਰਤੀਕਿਰਿਆ ਦਿੰਦੇ ਇੱਕ ਬਿਆਨ ਵਿਚ ਕਿਹਾ ਕਿ ਉਹ 13 ਜੁਲਾਈ ਨੂੰ ਟਰੰਪ ’ਤੇ ਹੋਏ ਹਮਲੇ ਦੀ ਇੰਡੀਪੈਂਡਡ ਜਾਂਚ ਰਿਪੋਰਟ ਦਾ ਇੰਤਜ਼ਾਰ ਕਰ ਰਹੇ ਹਨ।

ਇਸ ਦੇ ਨਾਲ ਹੀ ਉਨ੍ਹਾਂ ਚੀਟਲ ਦੇ ਅਸਤੀਫੇ ’ਤੇ ਕਿਹਾ ਕਿ ਸੀਕ੍ਰੇਟ ਸਰਵਿਸ ਦੀ ਮੁਖੀ ਰਹਿੰਦੇ ਹੋਏ ਉਨ੍ਹਾਂ ਆਪਣੇ ਪੂਰੇ ਕਰੀਅਰ ਵਿਚ ਬਿਨਾਂ ਸਵਾਰਥ ਦੇਸ਼ ਦੀ ਸੇਵਾ ਕੀਤੀ, ਜਿਸ ਲਈ ਉਹ ਉਨ੍ਹਾਂ ਦਾ ਧੰਨਵਾਦ ਕਰਦੇ ਹਨ ਅਤੇ ਜਲਦ ਹੀ ਨਵੇਂ ਚੀਫ ਦੀ ਨਿਯੁਕਤੀ ਕਰਨਗੇ।