17.29C Vancouver 17.29C VancouverFeb 3, 2022 10:55 PM - Connect News
ਬੀ.ਸੀ. ਦੇ ਪਿਟ-ਮੈਡੋਸ ਵਿੱਚ ਇੱਕ ਮਾਰਸ਼ਲ ਆਰਟਸ ਇੰਸਟਰਕਟਰ 'ਤੇ ਜਿਨਸੀ ਸ਼ੋਸ਼ਣ ਦੇ ਦੋਸ਼ ਲੱਗੇ ਹਨ।
ਪੁਲਿਸ ਦਾ ਕਹਿਣਾ ਹੈ ਕਿ ਇੰਸਟਰਕਟਰ ਨੇ ਆਪਣੇ ਇੱਕ ਸਟੂਡੈਂਟ ਨੂੰ ਜਿਨਸੀ ਸ਼ੋਸ਼ਣ ਦਾ ਨਿਸ਼ਾਨਾ ਬਣਾਇਆ।
ਅੱਜ ਦਿੱਤੀ ਜਾਣਕਾਰੀ ਦੌਰਾਨ ਆਰ.ਸੀ.ਐਮ.ਪੀ. ਦਾ ਕਹਿਣਾ ਸੀ ਕਿ ਪਤਝੜ ਦੌਰਾਨ ਸ਼ੁਰੂ ਹੋਈ ਜਾਂਚ ਤੋਂ ਬਾਅਦ ਬੀਤੇ ਮਹੀਨੇ ਇਸ ਇੰਸਟਰਕਟਰ ਖਿਲਾਫ ਦੋਸ਼ ਤੈਅ ਕੀਤੇ ਗਏ ਸਨ।
ਪੁਲਿਸ ਨੇ ਦੱਸਿਆ ਕਿ ਅਕਤੂਬਰ ਮਹੀਨੇ 'ਚ ਸ਼ਿਕਾਇਤ ਮਿਲੀ ਸੀ ਕਿ ਇੱਕ ਇੰਸਟਰਕਟਰ ਨੇ ਆਪਣੀ ਵਿਦਿਆਰਥਣ ਨੂੰ ਕਈ ਸਾਲ ਤੋਂ ਜਿਨਸੀ ਸ਼ੋਸ਼ਣ ਦਾ ਸ਼ਿਕਾਰ ਬਣਾਇਆ ਸੀ।
ਕਥਿਤ ਤੌਰ 'ਤੇ ਜਿਨਸੀ ਸ਼ੋਸ਼ਣ ਦੀ ਸ਼ੁਰੂਆਤ ਸਾਲ 2016 ਦੇ ਟਰੇਨਿੰਗ ਸੈਸ਼ਨਸ ਦੌਰਾਨ ਹੋਈ ਸੀ।
ਪੁਲਿਸ ਨੇ ਗਵਾਹਾਂ ਦੇ ਬਿਆਨ ਲਏ ਤਾਂ ਪਤਾ ਲੱਗਿਆ ਕਿ ਇੰਸਟਰਕਟਰ ਦੇ ਕੁਝ ਹੋਰ ਜਿੰਮ ਮੈਂਬਰਾਂ ਨਾਲ ਵੀ ਸੰਬੰਧ ਸਨ।
ਜਾਂਚ ਤੋਂ ਬਾਅਦ ਕੋਕਟਲਮ 'ਚ ਰਹਿਣ ਵਾਲੇ ਡਾਨੇਆਲ ਬਾਹਰਾਮਫਰ ਖਿਲਾਫ ਜਿਨਸੀ ਸ਼ੋਸ਼ਣ ਦੇ 2 ਦੋਸ਼ ਲੱਗੇ ਹਨ।
ਪੁਲਿਸ ਨੇ ਦੱਸਿਆ ਕਿ 34 ਸਾਲਾ ਵਿਅਕਤੀ ਨੂੰ ਡੈਨੀਅਲ ਗੋਲਕਰ ਵਜੋਂ ਵੀ ਜਾਣਿਆ ਜਾਂਦਾ ਹੈ।
ਪੁਲਿਸ ਨੇ ਦੱਸਿਆ ਕਿ ਦੋਸ਼ਾਂ ਦਾ ਸਾਹਮਣਾ ਕਰ ਰਹੇ ਵਿਅਕਤੀ ਦੀ ਪਛਾਣ ਇਸਲਈ ਸਾਂਝੀ ਕੀਤੀ ਗਈ ਹੈ ਤਾਂ ਜੋ ਕੋਈ ਹੋਰ ਪੀੜਤ ਵੀ ਉਸ ਬਾਰੇ ਜਾਣਕਾਰੀ ਦੇ ਸਕੇ।
