ਮਾਰਚ ਵਿੱਚ ਨੌਕਰੀਆਂ ਵਿੱਚ ਭਾਰੀ ਕਮੀ ਨੇ ਕੈਨੇਡੀਅਨ ਅਰਥਵਿਵਸਥਾ ਨੂੰ ਕੀਤਾ ਪ੍ਰਭਾਵਿਤ

ਕੈਨੇਡੀਅਨ ਅਰਥਵਿਵਸਥਾ ਨੇ ਮਾਰਚ ਵਿਚ 2022 ਤੋਂ ਬਾਅਦ ਨੌਕਰੀਆਂ ਵਿਚ ਸਭ ਤੋਂ ਵੱਡੀ ਗਿਰਾਵਟ ਦਰਜ ਕੀਤੀ ਹੈ। ਸਟੈਟਿਸਟਿਕਸ ਕੈਨੇਡਾ ਨੇ ਸ਼ੁੱਕਰਵਾਰ ਨੂੰ ਰਿਪੋਰਟ ਜਾਰੀ ਕਰਦਿਆਂ ਦੱਸਿਆ ਕਿ ਪਿਛਲੇ ਮਹੀਨੇ 33,000 ਨੌਕਰੀਆਂ ਖ਼ਤਮ ਹੋਈਆਂ, ਜਿਸ ਨਾਲ ਬੇਰੁਜ਼ਗਾਰੀ ਦਰ 0.1 ਫੀਸਦੀ ਅੰਕ ਵੱਧ ਕੇ 6.7 ਫੀਸਦੀ 'ਤੇ ਪਹੁੰਚ ਗਈ।

ਰਿਪੋਰਟ ਮੁਤਾਬਕ, ਟੈਰਿਫ ਨੂੰ ਲੈ ਕੇ ਬਣੀ ਅਨਿਸ਼ਚਿਤਤਾ ਨੇ ਨਵੀਂ ਭਰਤੀ ਨੂੰ ਪ੍ਰਭਾਵਿਤ ਕੀਤਾ ਅਤੇ ਕੁਝ ਛਾਂਟੀ ਨੂੰ ਬੜ੍ਹਾਵਾ ਦਿੱਤਾ। ਰੁਜ਼ਗਾਰ ਵਿਚ ਵੱਡੀ ਗਿਰਾਵਟ ਪ੍ਰਾਈਵੇਟ ਸੈਕਟਰ ਵਿਚ ਦਰਜ ਕੀਤੀ ਗਈ। ਜ਼ਿਆਦਾਤਰ ਅਰਥਸ਼ਾਸਤਰੀਆਂ ਨੇ ਪਹਿਲਾਂ ਹੀ ਸੰਭਾਵਨਾ ਜਤਾਈ ਸੀ ਕਿ ਜੌਬ ਮਾਰਕਿਟ ਮਾਰਚ ਵਿਚ ਕਮਜ਼ੋਰ ਹੋਣ ਦੇ ਸੰਕੇਤ ਦਿਖਾਉਣਾ ਸ਼ੁਰੂ ਕਰ ਦੇਵੇਗੀ ਕਿਉਂਕਿ ਕੰਪਨੀਆਂ ਨੇ ਟੈਰਿਫ ਦੀ ਅਨਿਸ਼ਚਿਤਤਾ ਕਾਰਨ ਨਿਵੇਸ਼ ਅਤੇ ਭਰਤੀ 'ਤੇ ਰੋਕ ਲਗਾ ਦਿੱਤੀ ਸੀ।

ਸਟੈਟਿਸਟਿਕਸ ਕੈਨੇਡਾ ਮੁਤਾਬਕ, ਪਿਛਲੇ ਮਹੀਨੇ ਕੁੱਲ ਮਿਲਾ ਕੇ 1.5 ਮਿਲੀਅਨ ਲੋਕ ਬੇਰੁਜ਼ਗਾਰ ਸਨ, ਜੋ ਮਹੀਨੇ ਦੇ ਆਧਾਰ 'ਤੇ 36,000 ਅਤੇ ਸਾਲ-ਦਰ-ਸਾਲ ਦੇ ਆਧਾਰ 'ਤੇ 167,000 ਵੱਧ ਹਨ। ਇਸ ਤਾਜ਼ਾ ਰਿਪੋਰਟ ਤੋਂ ਬਾਅਦ ਹੁਣ ਅਗਲੀ ਨਜ਼ਰ ਬੈਂਕ ਆਫ ਕੈਨੇਡਾ 'ਤੇ ਹੈ, ਜਿਸ ਵਲੋਂ 16 ਅਪ੍ਰੈਲ ਨੂੰ ਵਿਆਜ ਦਰ ਸਬੰਧੀ ਫੈਸਲਾ ਲਿਆ ਜਾਣਾ ਹੈ।