ਕੈਨੇਡਾ ਨੇ ਜਨਸੰਖਿਆ ਵਿਚ ਵਾਧੇ ਦਾ ਇੱਕ ਨਵਾਂ ਰਿਕਾਰਡ ਕੀਤਾ ਦਰਜ

ਕੈਨੇਡਾ ਨੇ ਜਨਸੰਖਿਆ ਵਿਚ ਵਾਧੇ ਦਾ ਇੱਕ ਨਵਾਂ ਰਿਕਾਰਡ ਦਰਜ ਕੀਤਾ ਹੈ। ਸਟੈਟਿਸਟਿਕਸ ਕੈਨੇਡਾ ਵਲੋਂ ਬੁੱਧਵਾਰ ਨੂੰ ਜਾਰੀ ਰਿਪੋਰਟ ਅਨੁਸਾਰ, ਪਿਛਲੇ ਸਾਲ ਕੈਨੇਡਾ ਦੀ ਜਨਸੰਖਿਆ ਵਿਚ 1.3 ਮਿਲੀਅਨ ਦਾ ਵਾਧਾ ਹੋਇਆ, ਜੋ ਕਿ ਐਸਟੋਨੀਆ ਦੀ ਆਬਾਦੀ ਦੇ ਬਰਾਬਰ ਦਾ ਵਾਧਾ ਹੈ।

ਇਸ ਵਾਧੇ ਨਾਲ ਕੈਨੇਡਾ ਦੀ ਆਬਾਦੀ 40.8 ਮਿਲੀਅਨ ਹੋ ਗਈ ਹੈ। 1957 ਤੋਂ ਬਾਅਦ ਇਹ ਕਿਸੇ ਸਾਲ ਵਿਚ ਸਭ ਤੋਂ ਤੇਜ਼ ਵਾਧਾ ਹੈ। 1 ਜਨਵਰੀ 2024 ਨੂੰ ਕੈਨੇਡਾ ਦੀ ਆਬਾਦੀ 40,769,890 ਦਰਜ ਕੀਤੀ ਗਈ।

ਸਟੈਟਿਸਟਿਕਸ ਕੈਨੇਡਾ ਦਾ ਕਹਿਣਾ ਹੈ ਕਿ ਆਬਾਦੀ ਵਿਚ ਜ਼ਿਆਦਾਤਰ ਵਾਧਾ ਪਿਛਲੇ ਸਾਲ ਅਸਥਾਈ ਇਮੀਗ੍ਰੇਸ਼ਨ ਕਾਰਨ ਹੋਇਆ। ਫੈਡਰਲ ਏਜੰਸੀ ਨੇ ਕਿਹਾ ਕਿ ਅਸਥਾਈ ਇਮੀਗ੍ਰੇਸ਼ਨ ਤੋਂ ਬਿਨਾਂ ਕੈਨੇਡਾ ਦੀ ਆਬਾਦੀ ਦੀ ਵਾਧਾ ਦਰ 1.2 ਫੀਸਦੀ ਹੋਣੀ ਸੀ, ਜੋ ਹੁਣ 3.2 ਫੀਸਦੀ ਦਰ ਨਾਲ ਵਧੀ ਹੈ। ਹਾਲਾਂਕਿ, ਸਰਕਾਰ ਵਲੋਂ ਅਸਥਾਈ ਇਮੀਗ੍ਰੇਸ਼ਨ ਨੂੰ ਘਟਾਉਣ ਲਈ ਲਏ ਗਏ ਫੈਸਲੇ ਨਾਲ ਭਵਿੱਖ ਵਿਚ ਆਬਾਦੀ ਵਿਚ ਵਾਧਾ ਸਲੌ ਹੋਣ ਦੀ ਉਮੀਦ ਹੈ।

ਕੈਨੇਡਾ ਪਹਿਲੀ ਵਾਰ ਨਵੇਂ ਆਉਣ ਵਾਲੇ ਅਸਥਾਈ ਨਿਵਾਸੀ ਦੀ ਗਿਣਤੀ ਲਈ ਲਿਮਟ ਸੈੱਟ ਕਰਨ ਜਾ ਰਿਹਾ ਹੈ। ਇਮੀਗ੍ਰੇਸ਼ਨ ਮਿਨਿਸਟਰ ਮਾਰਕ ਮਿਲਰ ਟਾਰਗੈਟ ਨੂੰ ਨਿਰਾਧਰਤ ਕਰਨ ਲਈ ਮਈ ਵਿਚ ਸੂਬਾ ਸਰਕਾਰਾਂ ਨਾਲ ਮੀਟਿੰਗ ਕਰਨਗੇ। ਪਹਿਲੀ ਲਿਮਟ ਸਤੰਬਰ ਵਿਚ ਤੈਅ ਕੀਤੀ ਜਾਵੇਗੀ। ਇਹ ਇੰਟਰਨੈਸ਼ਨਲ ਸਟੂਡੈਂਟਸ ਦੇ ਨਾਲ-ਨਾਲ ਵਿਦੇਸ਼ੀ ਕਾਮਿਆਂ ਅਤੇ ਸ਼ਰਣ ਦੇ ਦਾਅਵੇਦਾਰਾਂ ’ਤੇ ਵੀ ਲਾਗੂ ਹੋਵੇਗੀ।