ਜਨਵਰੀ ਵਿਚ ਕੈਨੇਡਾ ਦੀ ਸਾਲਾਨਾ ਮਹਿੰਗਾਈ ਦਰ ਵਿਚ ਹੋਇਆ ਵਾਧਾ: ਸਟੈਟਿਸਟਿਕਸ ਕੈਨੇਡਾ

ਕੈਨੇਡਾ ਦੀ ਮਹਿੰਗਾਈ ਦਰ ਵਿਚ ਉਛਾਲ ਦਰਜ ਹੋਇਆ ਹੈ। ਸਟੈਟਿਸਟਿਕਸ ਕੈਨੇਡਾ ਦੀ ਮੰਗਲਵਾਰ ਜਾਰੀ ਰਿਪੋਰਟ ਮੁਤਾਬਕ, ਜਨਵਰੀ ਵਿਚ ਕੈਨੇਡਾ ਦੀ ਸਾਲਾਨਾ ਮਹਿੰਗਾਈ ਦਰ 1.9 ਫੀਸਦੀ ’ਤੇ ਪਹੁੰਚ ਗਈ, ਇਹ ਪਹਿਲਾ ਪੂਰਾ ਮਹੀਨਾ ਹੈ ਜਿਸ ਵਿਚ ਜੀ.ਐਸ.ਟੀ. ਛੋਟ ਲਾਗੂ ਸੀ। ਇਸ ਤੋਂ ਪਹਿਲਾਂ ਦਸੰਬਰ ਵਿਚ ਸਾਲਾਨਾ ਮਹਿੰਗਾਈ ਦਰ 1.8 ਫੀਸਦੀ ਦਰਜ ਕੀਤੀ ਗਈ ਸੀ।

ਗੌਰਤਲਬ ਹੈ ਕਿ ਮਹਿੰਗਾਈ ਵਿਚ ਇਹ ਹਲਕਾ ਵਾਧਾ ਉਦੋਂ ਆਇਆ ਹੈ ਜਦੋਂ ਕੈਨੇਡਾ ’ਤੇ ਟਰੰਪ ਦੇ ਟੈਰਿਫ ਦਾ ਖ਼ਤਰਾ ਮੰਡਰਾ ਰਿਹਾ ਹੈ। ਮੁਦਰਾ ਬਾਜ਼ਾਰ ਵਲੋਂ ਮਹਿੰਗਾਈ ਦੀ ਤਾਜ਼ਾ ਰਿਪੋਰਟ ਤੋਂ ਬਾਅਦ 12 ਮਾਰਚ ਨੂੰ 25 ਬੇਸਿਸ ਪੁਆਇੰਟ ਰੇਟ ਵਿੱਚ ਕਟੌਤੀ ਦੀ 44 ਫੀਸਦੀ ਸੰਭਾਵਨਾ ਜਤਾਈ ਜਾ ਰਹੀ ਹੈ ਪਰ ਜੇ ਰਾਸ਼ਟਰਪਤੀ ਡੋਨਲਡ ਟਰੰਪ ਮਾਰਚ ਦੇ ਸ਼ੁਰੂ ਤੋਂ ਕੈਨੇਡੀਅਨ ਆਯਾਤ ’ਤੇ ਟੈਰਿਫ ਲਗਾਉਣ ਦਾ ਫੈਸਲਾ ਕਰਦੇ ਹਨ ਤਾਂ ਬਾਜ਼ਾਰ ਦੇ ਅੰਦਾਜ਼ੇ ਇਸ ਅਨੁਸਾਰ ਬਦਲ ਸਕਦੇ ਹਨ।

ਦੱਸ ਦੇਈਏ ਕਿ ਬੈਂਕ ਆਫ ਕੈਨੇਡਾ ਹੁਣ ਤੱਕ ਲਗਾਤਾਰ 6 ਵਾਰ ਵਿਆਜ ਦਰਾਂ ਵਿਚ ਕਟੌਤੀ ਕਰ ਚੁੱਕਾ ਹੈ, 29 ਜਨਵਰੀ ਦੀ ਪਿਛਲੀ ਬੈਠਕ ਵਿਚ ਸੈਂਟਰਲ ਬੈਂਕ ਨੇ 25-ਬੇਸਿਸ ਪੁਆਇੰਟ ਦੀ ਕਟੌਤੀ ਕੀਤੀ ਸੀ ਅਤੇ ਗਵਰਨਰ ਟਿਫ ਮੈਕਲੇਮ ਨੇ ਚਿਤਾਵਨੀ ਦਿੱਤੀ ਸੀ ਕਿ ਟੈਰਿਫ ਵਾਰ ਨਾਲ ਕੈਨੇਡਾ ਦੀ ਆਰਥਿਕਤਾ ਨੂੰ ਭਾਰੀ ਨੁਕਸਾਨ ਪਹੁੰਚੇਗਾ ਅਤੇ ਮਹਿੰਗਾਈ ਵੀ ਵਧੇਗੀ।