ਤੇਜ਼ ਹਵਾਵਾਂ ਕਾਰਨ ਬੀ.ਸੀ. ਵਿੱਚ ਲਗਭਗ ਇੱਕ ਲੱਖ ਬੀ.ਸੀ. ਹਾਈਡ੍ਰੋ ਗਾਹਕਾਂ ਦੀ ਬਿਜਲੀ ਗੁੱਲ

ਬੀ. ਸੀ. ਦੇ ਲੋਅਰ ਮੇਨਲੈਂਡ ਅਤੇ ਫਰੇਜ਼ਰ ਵੈਲੀ ਵਿਚ ਬੁੱਧਵਾਰ ਸਵੇਰੇ ਤੇਜ਼ ਹਵਾਵਾਂ ਅਤੇ ਮੀਂਹ ਕਾਰਨ 100,000 ਤੋਂ ਵੱਧ ਬੀ.ਸੀ. ਹਾਈਡ੍ਰੋ ਗਾਹਕਾਂ ਦੀ ਬਿਜਲੀ ਗੁੱਲ ਹੋ ਗਈ। ਕ੍ਰਾਊਨ ਕਾਰਪੋਰੇਸ਼ਨ ਦਾ ਕਹਿਣਾ ਹੈ ਕਿ ਇਹ ਇਸ ਹਫ਼ਤੇ ਮੌਸਮ ਨਾਲ ਸਬੰਧਤ ਬਿਜਲੀ ਆਊਟੇਜ ਦੀ ਤੀਜੀ ਵੱਡੀ ਘਟਨਾ ਹੈ। ਇਨਵਾਇਰਮੈਂਟ ਕੈਨੇਡਾ ਵਲੋਂ ਇਸ ਖੇਤਰ ਵਿਚ 80 ਕਿਲੋਮੀਟਰ ਪ੍ਰਤੀ ਘੰਟੇ ਦੀ ਰਫ਼ਤਾਰ ਨਾਲ ਹਵਾਵਾਂ ਚੱਲਣ ਦੀ ਚਿਤਾਵਨੀ ਦਿੱਤੀ ਗਈ ਸੀ।

ਏਜੰਸੀ ਦਾ ਕਹਿਣਾ ਸੀ ਕਿ ਚਿਲੀਵੈਕ ਅਤੇ ਹੋਪ ਸਮੇਤ ਫਰੇਜ਼ਰ ਵੈਲੀ ਦੇ ਸੈਂਟਰਲ ਅਤੇ ਪੂਰਬੀ ਹਿੱਸਿਆਂ ਵਿਚ ਹਵਾਵਾਂ 100 ਕਿਲੋਮੀਟਰ ਪ੍ਰਤੀ ਘੰਟਾ ਤੱਕ ਪਹੁੰਚ ਸਕਦੀਆਂ ਹਨ। ਸੋਮਵਾਰ ਨੂੰ ਚਿਲੀਵੈਕ ਵਿਚ ਇੱਕ ਲੋਕਲ ਪਾਰਕ ਵਿਚ ਇੱਕ ਔਰਤ ਦੀ ਦਰੱਖਤ ਡਿੱਗਣ ਨਾਲ ਮੌਤ ਹੋ ਗਈ ਸੀ।

ਬੀ.ਸੀ. ਹਾਈਡ੍ਰੋ ਮੁਤਾਬਕ, ਲੋਅਰ ਮੇਨਲੈਂਡ ਅਤੇ ਸਨਸ਼ਾਈਨ ਕੋਸਟ ਵਿਚ ਅੱਜ 90,000 ਤੋਂ ਵੱਧ ਗਾਹਕਾਂ ਦੀ ਬਿਜਲੀ ਪ੍ਰਭਾਵਿਤ ਹੋਈ ਹੈ, ਜਦੋਂ ਕਿ ਵੈਨਕੂਵਰ ਆਈਲੈਂਡ ਵਿਚ 11,000 ਤੋਂ ਵੱਧ ਪਰਿਵਾਰ ਹਨੇਰੇ ਵਿਚ ਸਨ। ਗੌਰਤਲਬ ਹੈ ਕਿ ਬੀ. ਸੀ. ਸਾਊਥ ਕੋਸਟ ਦਾ ਜ਼ਿਆਦਾਤਰ ਹਿੱਸਾ ਫਲੱਡ ਵਾਚ ਵਿਚ ਹੈ ਭਾਵ ਨਦੀਆਂ ਦਾ ਪਾਣੀ ਕਿਨਾਰੇ ਤੱਕ ਪਹੁੰਚ ਸਕਦਾ ਹੈ। ਉਥੇ ਹੀ, ਹੋਪ ਦੇ ਸਾਊਥ ਈਸਟ ਵਿਚ ਹਾਈਵੇਅ 3 ਦਾ 60 ਕਿਲੋਮੀਟਰ ਹਿੱਸਾ ਅਜੇ ਵੀ ਬੰਦ ਹੈ।