ਸਰੀ ਪੁਲਿਸ ਵੱਲੋਂ ਨੌਜਵਾਨਾਂ ਦੀ ਸੁਰੱਖਿਆ ਲਈ S.O.A.R. ਪ੍ਰੋਗਰਾਮ ਦੀ ਕੀਤੀ ਗਈ ਸ਼ੁਰੂਆਤ

ਸਰੀ ਪੁਲਿਸ ਵੱਲੋਂ ਨੌਜਵਾਨਾਂ ਦੀ ਸੁਰੱਖਿਆ ਅਤੇ ਉਨ੍ਹਾਂ ਨੂੰ ਸਮਾਜਿਕ ਚੁਣੌਤੀਆਂ ਪ੍ਰਤੀ ਸੂਝਵਾਨ ਬਣਾਉਣ ਲਈ ਇੱਕ ਵਿਸ਼ੇਸ਼ ਮੁਹਿੰਮ S.O.A.R. ਯਾਨੀ Strength, Opportunity, Autonomy, Resilience ਦੀ ਸ਼ੁਰੂਆਤ ਕੀਤੀ ਗਈ ਹੈ। ਇਹ ਐਲਾਨ ਬੱਚਿਆਂ ਅਤੇ ਨੌਜਵਾਨਾਂ ਦੇ ਜਿਨਸੀ ਸ਼ੋਸ਼ਣ ਨੂੰ ਰੋਕਣ ਦੇ ਜਾਗਰੂਕਤਾ ਹਫ਼ਤੇ ਦੇ ਮੌਕੇ 'ਤੇ ਕੀਤਾ ਗਿਆ ਹੈ, ਜੋ 9 ਤੋਂ 15 ਮਾਰਚ ਤੱਕ ਚੱਲੇਗਾ।

ਐਸ.ਪੀ.ਐਸ. ਮੁਤਾਬਕ, ਜੂਨ 2025 ਵਿਚ ਲੌਂਚ ਹੋਈ ਇਹ ਪਹਿਲ ਹੁਣ ਤੱਕ ਪਹਿਲਾਂ ਹੀ 4,500 ਤੋਂ ਵੱਧ ਨੌਜਵਾਨਾਂ ਤੱਕ ਪਹੁੰਚ ਚੁੱਕੀ ਹੈ। ਇਸ ਪ੍ਰੋਗਰਾਮ ਰਾਹੀਂ ਸਟੂਡੈਂਟਸ ਨੂੰ ਅਸਲ ਜ਼ਿੰਦਗੀ ਦੀਆਂ ਉਦਾਹਰਣਾਂ ਰਾਹੀਂ ਸੁਰੱਖਿਅਤ ਰਹਿਣ ਅਤੇ ਸਹੀ ਫੈਸਲੇ ਲੈਣ ਦੇ ਤਰੀਕੇ ਸਿਖਾਏ ਜਾਂਦੇ ਹਨ। ਐਸ.ਪੀ.ਐਸ. ਦੇ ਇੰਸਪੈਕਟਰ ਸਟੀਫਨ ਹਰਸਟ ਨੇ ਕਿਹਾ ਕਿ S.O.A.R. ਨੂੰ ਅੱਜ ਦੇ ਨੌਜਵਾਨਾਂ ਨੂੰ ਔਨਲਾਈਨ ਸੁਰੱਖਿਆ, ਨਸ਼ਿਆਂ ਦੀ ਵਰਤੋਂ, ਮਾਨਸਿਕ ਸਿਹਤ ਵਰਗੀਆਂ ਚੁਣੌਤੀਆਂ ਦਾ ਸਾਹਮਣਾ ਕਰਨ ਲਈ ਤਿਆਰ ਕਰਨ ਵਾਸਤੇ ਬਣਾਇਆ ਗਿਆ ਹੈ।

ਇਸ ਟੀਮ ਵਿਚ ਸਰੀ ਪੁਲਿਸ ਦਾ ਇੱਕ ਸਮਰਪਿਤ ਯੁਵਾ ਸ਼ੋਸ਼ਣ ਸੰਪਰਕ ਅਧਿਕਾਰੀ, ਸਰੀ ਵੂਮੈਨ ਸੈਂਟਰ ਦਾ ਇੱਕ ਕਰਮਚਾਰੀ ਸ਼ਾਮਲ ਹਨ ਜੋ ਸਕੂਲ ਜ਼ਿਲ੍ਹਾ ਅਤੇ ਕਮਿਊਨਿਟੀ ਦੇ ਸਹਿਯੋਗ ਨਾਲ ਕੰਮ ਕਰਦੇ ਹਨ। ਇਹ ਟੀਮ ਮਨੁੱਖੀ ਤਸਕਰੀ ਅਤੇ ਸ਼ੋਸ਼ਣ ਦੇ ਖਤਰੇ ਦਾ ਸਾਹਮਣਾ ਕਰ ਰਹੇ ਨੌਜਵਾਨਾਂ ਨੂੰ ਤੁਰੰਤ ਮਦਦ ਪ੍ਰਦਾਨ ਕਰਦੀ ਹੈ।