11.53C Vancouver 11.53C VancouverNov 20, 2020 4:40 PM -
ਕੋਵਿਡ-19 ਦੀ ਪਹਿਲੀ ਲਹਿਰ ਦੇ ਮੁਕਾਬਲੇ ਦੂਜੀ ਲਹਿਰ ਦੌਰਾਨ ਨਵੇਂ ਮਾਮਲਿਆਂ ਦੀ ਗਿਣਤੀ ਵਿੱਚ ਲਗਾਤਾਰ ਜਾਰੀ ਵਾਧੇ ਨੂੰ ਦੇਖਦਿਆਂ ਕੈਨੇਡਾ ਦੀ ਪ੍ਰਮੁੱਖ ਸਿਹਤ ਅਧਿਕਾਰੀ ਨੇ ਮਾਮਲਿਆਂ ਦੀ ਗਿਣਤੀ ਨੂੰ ਤੁਰੰਤ ਘਟਾਉਣ ਦੀ ਲੋੜ ਉਤੇ ਜ਼ੋਰ ਦਿੱਤਾ ਹੈ।
ਡਾਕਟਰ ਟੈਰੇਸਾ ਟੈਮ ਦਾ ਕਹਿਣਾ ਹੈ ਕਿ ਜੇ ਕੈਨੇਡਾ ਵਿਚ ਲੋਕਾਂ ਨੇ ਹਰ ਰੋਜ਼ ਆਪਣੇ ਸੰਪਰਕ ਵਿੱਚ ਆਉਣ ਵਾਲੇ ਵਿਅਕਤੀਆਂ ਦੀ ਗਿਣਤੀ ਨਹੀਂ ਘਟਾਈ ਤਾਂ ਇਸ ਸਾਲ ਦੇ ਅੰਤ ਤੱਕ ਇੱਕ ਦਿਨ ਵਿਚ 60,000 ਮਾਮਲੇ ਸਾਹਮਣੇ ਆਉਣ ਦਾ ਅਨੁਮਾਨ ਹੈ।
ਮਾਡਲਿੰਗ ਦੇ ਅੰਦਾਜ਼ੇ ਮੁਤਾਬਕ ਜੇ ਸਥਿਤੀ ਮੌਜੂਦਾ ਹਾਲਾਤ ਵਾਂਗ ਕਾਇਮ ਰਹਿੰਦੀ ਹੈ ਤਾਂ ਵੀ ਦਸੰਬਰ ਦੇ ਅਖੀਰ ਤਕ ਦੇਸ਼ ਵਿੱਚ ਇੱਕ ਦਿਨ ਵਿੱਚ 20,000 ਮਾਮਲੇ ਸਾਹਮਣੇ ਆਉਣ ਦਾ ਅੰਦਾਜ਼ਾ ਹੈ।
ਜੇ ਲੋਕਾਂ ਦਾ ਆਪਸ ਵਿੱਚ ਮਿਲਣਾ ਜੁਲਣਾ ਜਾਰੀ ਰਿਹਾ ਤਾਂ ਹੁਣ ਇੱਕ ਦਿਨ ਵਿੱਚ ਜਿਥੇ 5,000 ਮਾਮਲੇ ਸਾਮਣੇ ਆ ਰਹੇ ਹਨ, ਓਥੇ ਉਸ ਦੀ ਤੁਲਨਾ ਵਿੱਚ ਇਸ ਸਾਲ ਦੇ ਅਖੀਰ ਤੱਕ ਇਨ੍ਹਾਂ ਵਿੱਚ 12 ਗੁਣਾ ਵਾਧਾ ਹੋਣ ਦਾ ਅਨੁਮਾਨ ਹੈ।
ਸਿਹਤ ਅਧਿਕਾਰੀਆਂ ਦੇ ਅੰਦਾਜ਼ੇ ਮੁਤਾਬਕ ਕੈਨੇਡਾ ਵਿਚ ਇਸ ਮਹੀਨੇ ਦੇ ਅਖੀਰ ਤਕ ਕੁਲ ਮਾਮਲਿਆਂ ਦੀ ਗਿਣਤੀ 366,500 ਤੋਂ 378,600 ਵਿਚਕਾਰ ਹੋਵੇਗੀ ਅਤੇ ਵਾਇਰਸ ਕਾਰਨ ਹੋਣ ਵਾਲੀਆਂ ਮੌਤਾਂ ਦੀ ਗਿਣਤੀ 11,870 ਤੋਂ 12,120 ਵਿਚਕਾਰ ਪਹੁੰਚ ਜਾਵੇਗੀ।
ਟੈਮ ਅਨੁਸਾਰ ਹਾਲ ਦੀ ਘੜੀ ਹਰ ਰੋਜ਼ ਔਸਤਨ 4,800 ਮਾਮਲੇ ਸਾਮਣੇ ਆ ਰਹੇ ਹਨ ਜੋ ਕੇ ਪਿਛਲੇ ਹਫਤੇ ਦੇ ਮੁਕਾਬਲੇ ਤਕਰੀਬਨ 15 ਫ਼ੀਸਦੀ ਵੱਧ ਹੈ।
