ਭਾਰਤ 'ਚ ਮੰਕੀਪੌਕਸ ਦੇ ਦੋ ਮਾਮਲੇ ਹੋਏ ਰਿਪੋਰਟ, ਸੀਨੀਅਰ ਵਿਗਿਆਨੀ ਨੇ ਕਿਹਾ- 'ਚਿੰਤਾ ਦੀ ਗੱਲ ਨਹੀਂ'

ਭਾਰਤ ਵਿਚ ਹੁਣ ਤੱਕ ਮੰਕੀਪੌਕਸ ਦੇ ਮਾਮਲੇ ਰਿਪੋਰਟ ਹੋ ਚੁੱਕੇ ਹਨ। ਇਹ ਦੋਵੇਂ ਮਾਮਲੇ ਕੇਰਲ ਵਿਚ ਦਰਜ ਹੋਏ ਹਨ। ਹਾਲਾਂਕਿ, ਇਸ ਵਿਚਕਾਰ ਇੱਕ ਸੀਨੀਅਰ ਵਿਗਿਆਨੀ ਨੇ ਕਿਹਾ ਹੈ ਕਿ ਘਬਰਾਉਣ ਦੀ ਜ਼ਰੂਰਤ ਨਹੀਂ ਹੈ ਕਿਉਂਕਿ ਇਸ ਸਟੇਜ 'ਤੇ ਸਥਿਤੀ ਕਾਫ਼ੀ ਹੱਦ ਤੱਕ ਕਾਬੂ ਵਿਚ ਹੈ।

ਭਾਰਤ ਵਿਚ ਸੋਮਵਾਰ ਨੂੰ ਕੰਨੂਰ ਜ਼ਿਲ੍ਹੇ ਤੋਂ ਮੰਕੀਪੌਕਸ ਦੇ ਦੂਜੇ ਮਾਮਲੇ ਦੀ ਰਿਪੋਰਟ ਸਾਹਮਣੇ ਆਈ ਸੀ। ਇੱਕ 31 ਸਾਲਾ ਪੁਰਸ਼ ਵਾਇਰਸ ਨਾਲ ਸੰਕ੍ਰਮਿਤ ਹੋਇਆ ਹੈ।

ਭਾਰਤ ਦਾ ਪਹਿਲਾ ਮੰਕੀਪੌਕਸ ਦਾ ਕੇਸ ਵੀ ਕੇਰਲ ਤੋਂ ਸਾਹਮਣੇ ਆਇਆ ਸੀ।

ਪੁਣੇ ਦੇ ਆਈ. ਸੀ. ਐੱਮ. ਆਰ.- ਨੈਸ਼ਨਲ ਇੰਸਟੀਚਿਊਟ ਆਫ਼ ਵਾਇਰੋਲੋਜੀ ਦੀ ਸੀਨੀਅਰ ਵਿਗਿਆਨੀ ਡਾ. ਪ੍ਰਗਿਆ ਯਾਦਵ ਨੇ ਕਿਹਾ, "ਸਥਿਤੀ ਬਹੁਤ ਜ਼ਿਆਦਾ ਕੰਟਰੋਲ ਵਿਚ ਹੈ ਅਤੇ ਇਸ ਪੜਾਅ 'ਤੇ ਘਬਰਾਉਣ ਦੀ ਕੋਈ ਗੱਲ ਨਹੀਂ ਹੈ। ਅਸੀਂ ਬਹੁਤ ਨਿਯੰਤਰਿਤ ਸਥਿਤੀ ਵਿਚ ਹਾਂ।" ਕੇਰਲ ਸਰਕਾਰ ਅਤੇ ਕੇਂਦਰੀ ਟੀਮਾਂ ਦੇ ਯਤਨਾਂ ਦੀ ਸ਼ਲਾਘਾ ਕਰਦੇ ਹੋਏ ਉਨ੍ਹਾਂ ਕਿਹਾ ਕਿ ਉਹ ਸੈਂਪਲ ਇਕੱਠਾ ਕਰਨ ਲਈ ਪਹਿਲਾਂ ਤੋਂ ਤਿਆਰ ਸਨ, ਜਿਸ ਨਾਲ ਸੂਬੇ ਵਿਚ ਪਹਿਲੇ ਕੇਸ ਦਾ ਜਲਦ ਪਤਾ ਲੱਗਾ।

ਡਾ. ਪ੍ਰਗਿਆ ਨੇ ਦੱਸਿਆ ਕਿ ਸੂਬੇ ਨੇ ਮੰਕੀਪੌਕਸ ਦੇ ਫੈਲਣ ਨੂੰ ਰੋਕਣ ਲਈ ਚੌਕਸੀ ਵਧਾਈ ਹੈ ਅਤੇ ਆਪਣੇ ਵੱਖ-ਵੱਖ ਜ਼ਿਲ੍ਹਿਆਂ ਵਿਚ ਅਲਰਟ ਜਾਰੀ ਕੀਤਾ ਹੈ।