ਕੈਨੇਡੀਅਨ ਸਾਫਟਵੁੱਡ ਲੱਕੜ ’ਤੇ ਅਮਰੀਕਾ ਨੇ ਇੰਪੋਰਟ ਡਿਊਟੀ ਵਧਾ ਕੇ ਕੀਤੀ ਦੁੱਗਣੀ

ਕੈਨੇਡੀਅਨ ਸਾਫਟਵੁੱਡ ਲੱਕੜ ’ਤੇ ਅਮਰੀਕਾ ਨੇ ਇੰਪੋਰਟ ਡਿਊਟੀ ਵਧਾ ਕੇ ਲਗਭਗ ਦੁੱਗਣੀ ਕਰ ਦਿੱਤੀ ਹੈ, ਜਿਸ ਨਾਲ ਸਾਫਟਵੁੱਡ ਇੰਡਸਟਰੀ ਨੂੰ ਵੱਡਾ ਝਟਕਾ ਲੱਗਣ ਦੇ ਆਸਾਰ ਹਨ। ਅਮਰੀਕਾ ਨੇ ਕੈਨੇਡੀਅਨ ਸਾਫਵੁੱਡ ਲੰਬਰ ’ਤੇ ਟੈਰਿਫ 14.54 ਫੀਸਦੀ ਕਰ ਦਿੱਤਾ ਹੈ, ਪਹਿਲਾਂ ਇਹ 8.05 ਫੀਸਦੀ ਸੀ। ਕੈਨੇਡਾ ਦੀ ਨਿਰਯਾਤ ਤਰੱਕੀ ਤੇ ਅੰਤਰਰਾਸ਼ਟਰੀ ਵਪਾਰ ਮੰਤਰੀ ਮੈਰੀ ਐਨ.ਜੀ ਨੇ ਇਸ ਨੂੰ ਨਿਰਾਸ਼ਾਜਨਕ ਤੇ ਬੇਇਨਸਾਫ਼ੀ ਕਦਮ ਕਰਾਰ ਦਿੱਤਾ।

ਐਨ.ਜੀ. ਨੇ ਕਿਹਾ ਕਿ ਇਸ ਨਾਲ ਦੋਵੇਂ ਪਾਸੇ ਦੇ ਖ਼ਪਤਕਾਰ ਅਤੇ ਉਤਪਾਦਕ ਨੁਕਸਾਨ ਪਹੁੰਚੇਗਾ ਤੇ ਨਾਲ ਹੀ ਇਹ ਵਰਕਰ ’ਤੇ ਨਾਕਾਰਤਮਕ ਪ੍ਰਭਾਵ ਪਾਵੇਗਾ। ਬਿ੍ਰਟਿਸ਼ ਕੋਲੰਬੀਆ ਦੇ ਜੰਗਲਾਤ ਮੰਤਰੀ ਬਰੂਸ ਰਾਲਸਟਨ ਨੇ ਵੀ ਅਮਰੀਕਾ ਦੇ ਵਣਜ ਵਿਭਾਗ ਦੇ ਫੈਸਲੇ ਦੀ ਆਲੋਚਨਾ ਕੀਤੀ। ਉਥੇ ਹੀ, ਬੀ.ਸੀ. ਲੰਬਰ ਟਰੇਡ ਕੌਂਸਲ ਨੇ ਕਿਹਾ ਕਿ ਇਸ ਤੋਂ ਬੁਰਾ ਸਮਾਂ ਹੋਰ ਨਹੀਂ ਹੋ ਸਕਦਾ ਕਿਉਂਕਿ ਇੰਡਸਟਰੀ ਪਹਿਲਾਂ ਹੀ ਚੁਣੌਤੀਪੂਰਨ ਸਥਿਤੀਆਂ ਦਾ ਸਾਹਮਣਾ ਕਰ ਰਹੀ ਹੈ।

ਕੌਂਸਲ ਮੁਤਾਬਕ, ਅਮਰੀਕਾ ਦੇ ਇੰਪੋਰਟ ਡਿਊਟੀ ਵਧਾਉਣ ਨਾਲ ਨਿਰਮਾਣ ਕਾਰਜ, ਨੌਕਰੀਆਂ ਅਤੇ ਸੂਬੇ ਦੀਆਂ ਆਸਪਾਸ ਦੀਆਂ ਕਮਿਊਨਿਟੀ ’ਤੇ ਨੈਗੇਟਿਵ ਇੰਪੈਕਟ ਪਵੇਗਾ। ਮੰਤਰੀ ਮੈਰੀ ਐਨ.ਜੀ. ਨੇ ਕਿਹਾ ਕਿ ਸਾਫਵੁੱਡ ਲੰਬਰ ਨੂੰ ਲੈ ਕੇ ਲੰਬੇ ਸਮੇਂ ਤੋਂ ਚੱਲ ਰਹੇ ਵਿਵਾਦ ਦਾ ਸਥਾਈ ਹੱਲ ਲੱਭਣਾ ਕੈਨੇਡਾ ਅਤੇ ਅਮਰੀਕਾ ਦੋਵਾਂ ਦੇ ਹਿੱਤ ਵਿਚ ਹੋਵੇਗਾ।