15.04C Vancouver 15.04C VancouverJul 22, 2024 7:00 PM - The Canadian Press
ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਆਪਣੇ ਪਰਿਵਾਰ ਨਾਲ ਛੁੱਟੀਆਂ ਮਨਾਉਣ ਲਈ ਐਤਵਾਰ ਤੋਂ ਬ੍ਰਿਟਿਸ਼ ਕੋਲੰਬੀਆ ਵਿਚ ਹਨ। ਹਾਲਾਂਕਿ, ਸਕਿਰਿਓਟੀ ਕਾਰਨਾਂ ਕਰਕੇ ਉਨ੍ਹਾਂ ਦੀ ਲੋਕੇਸ਼ਨ ਬਾਰੇ ਖੁਲਾਸਾ ਨਹੀਂ ਕੀਤਾ ਗਿਆ ਪਰ ਪ੍ਰਧਾਨ ਮੰਤਰੀ ਦਫ਼ਤਰ ਦਾ ਕਹਿਣਾ ਹੈ ਕਿ ਟਰੂਡੋ ਅਤੇ ਉਨ੍ਹਾਂ ਦਾ ਪਰਿਵਾਰ 1 ਅਗਸਤ ਤੱਕ ਬੀ. ਸੀ. ਵਿਚ ਰਹੇਗਾ।
ਪੀ. ਐੱਮ. ਓ. ਦੇ ਬੁਲਾਰੇ ਮੁਹੰਮਦ ਹੁਸੈਨ ਨੇ ਦੱਸਿਆ ਕਿ ਟਰੂਡੋ ਪ੍ਰਧਾਨ ਮੰਤਰੀ ਹੋਣ ਦੇ ਨਾਤੇ ਸਰਕਾਰੀ ਜਹਾਜ਼ ’ਤੇ ਯਾਤਰਾ ਕਰਦੇ ਹਨ, ਹਾਲਾਂਕਿ, ਨਿੱਜੀ ਛੁੱਟੀਆਂ ਲਈ ਉਹ ਆਪਣੇ ਅਤੇ ਆਪਣੇ ਪਰਿਵਾਰ ਲਈ ਵਪਾਰਕ ਏਅਰਲਾਈਨ ਦੀ ਟਿਕਟ ਦੇ ਬਰਾਬਰ ਦੇ ਖ਼ਰਚ ਦੀ ਅਦਾਇਗੀ ਕਰਨਗੇ। ਬੁਲਾਰੇ ਨੇ ਇਹ ਵੀ ਕਿਹਾ ਕਿ ਪੀ. ਐੱਮ. ਟਰੂਡੋ ਆਪਣੇ ਪਰਿਵਾਰ ਦੇ ਰਹਿਣ ਦਾ ਖਰਚਾ ਵੀ ਅਦਾ ਕਰਨਗੇ।
ਟਰੂਡੋ ਅਤੇ ਉਨ੍ਹਾਂ ਦੇ ਪਰਿਵਾਰ ਨੇ ਪਿਛਲੀਆਂ ਗਰਮੀਆਂ ਵਿਚ ਵੀ ਬੀ. ਸੀ. ਵਿਚ ਛੁੱਟੀਆਂ ਮਨਾਈਆਂ ਸਨ ਅਤੇ 2022 ਦੀਆਂ ਗਰਮੀਆਂ ਵਿਚ ਕੋਸਟਾ ਰੀਕਾ ਗਏ ਸਨ। ਉੱਥੇ ਹੀ, ਪਿਛਲੇ ਸਾਲ ਕ੍ਰਿਸਮਸ ਦੌਰਾਨ ਜਮਾਇਕਾ ਵਿਚ ਟਰੂਡੋ ਦੀਆਂ ਪਰਿਵਾਰਕ ਛੁੱਟੀਆਂ ਵਿਵਾਦਾਂ ਵਿਚ ਰਹੀਆਂ ਸਨ।
ਇਸ ਦੌਰਾਨ ਉਹ ਬਿਨਾਂ ਕਿਸੇ ਖ਼ਰਚੇ ਦੇ ਆਪਣੇ ਇੱਕ ਪਰਿਵਾਰਕ ਦੋਸਤ ਦੇ ਰਿਜ਼ਾਰਟ ਵਿਚ ਰੁਕੇ ਸਨ, ਜਦੋਂ ਕਿ ਟ੍ਰਿਪ ਤੋਂ ਪਹਿਲਾਂ ਉਨ੍ਹਾਂ ਨੇ ਖ਼ਰਚ ਦਾ ਭੁਗਤਾਨ ਕਰਨ ਦੀ ਗੱਲ ਆਖੀ ਸੀ।
ਪ੍ਰਧਾਨ ਮੰਤਰੀ ’ਤੇ ਇਲਜ਼ਾਮ ਲੱਗੇ ਸਨ ਕਿ ਇੱਕ ਤਾਂ ਉਨ੍ਹਾਂ ਨੇ ਰਵਾਨਗੀ ਤੋਂ ਪਹਿਲਾਂ ਛੁੱਟੀ ਦੇ ਸਥਾਨ ਦੀ ਪੁਸ਼ਟੀ ਨਹੀਂ ਕੀਤੀ ਅਤੇ ਦੂਜੇ ਆਪਣੇ ਪਰਿਵਾਰ ਨਾਲ ਸਬੰਧਤ ਕਾਰੋਬਾਰੀ ਨੂੰ ਫਾਇਦਾ ਪਹੁੰਚਾਉਣ ਦੇ ਬਦਲੇ ਖ਼ਰਚ ਦਾ ਭੁਗਤਾਨ ਨਹੀਂ ਕੀਤਾ। ਹਾਲਾਂਕਿ, ਫੈਡਰਲ ਨੈਤਿਕਤਾ ਕਮਿਸ਼ਨਰ ਵਲੋਂ ਪੀ. ਐੱਮ. ਟਰੂਡੋ ਨੂੰ ਕਲੀਨ ਚਿੱਟ ਦੇ ਦਿੱਤੀ ਗਈ ਸੀ।
