ਰੂਸ ਦੇ ਯੂਕਰੇਨ ’ਤੇ ਹਮਲੇ ਦੀ ਤੀਜੀ ਵਰੇਗੰਢ ਮੌਕੇ ਕੀਵ ਪਹੁੰਚੇ ਟਰੂਡੋ

ਪੀ.ਐੱਮ ਜਸਟਿਨ ਟਰੂਡੋ ਰੂਸ ਦੇ ਯੂਕਰੇਨ ’ਤੇ ਹਮਲੇ ਦੀ ਤੀਜੀ ਵਰੇਗੰਢ ਮੌਕੇ ਸੋਮਵਾਰ ਨੂੰ ਅਚਾਨਕ ਰਾਜਧਾਨੀ ਕੀਵ ਪਹੁੰਚੇ, ਜਿੱਥੇ ਉਹ ਹੋਰ ਪੱਛਮੀ ਨੇਤਾਵਾਂ ਨਾਲ ਯੂਕਰੇਨ ਸ਼ਾਂਤੀ ਸੰਮੇਲਨ ਵਿਚ ਸ਼ਾਮਲ ਹੋਏ। ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਮੈਂ ਅੱਜ ਕੀਵ ਵਿਚ ਇਹ ਦਿਖਾਉਣ ਲਈ ਹਾਂ ਕਿ ਕੈਨੇਡਾ ਯੂਕਰੇਨ ਦੇ ਨਾਲ ਹਮੇਸ਼ਾ ਖੜ੍ਹਾ ਹੈ। 2022 ਵਿਚ ਰੂਸ ਦੇ ਹਮਲੇ ਤੋਂ ਬਾਅਦ ਟਰੂਡੋ ਦਾ ਯੂਕਰੇਨ ਵਿਚ ਇਹ ਚੌਥਾ ਸਾਲਾਨਾ ਦੌਰਾ ਹੈ।

ਉਨ੍ਹਾਂ ਯੂਕਰੇਨ ਦੀ ਸ਼ਾਂਤੀ ਅਤੇ ਸੁਰੱਖਿਆ ਸਮਿਟ ਦੌਰਾਨ ਯੂਕਰੇਨ ਨੂੰ 25 ਲਾਈਟ-ਬਖਤਰਬੰਦ ਵਾਹਨ ਦੇਣ ਅਤੇ ਕੈਨੇਡਾ ਵਲੋਂ ਜ਼ਬਤ ਕੀਤੇ ਗਏ ਰੂਸੀ ਜਾਇਦਾਦ ਤੋਂ $5 ਬਿਲੀਅਨ ਦੀ ਪਹਿਲੀ ਪੇਮੈਂਟ ਜਾਰੀ ਕਰਨ ਦਾ ਵੀ ਵਾਅਦਾ ਕੀਤਾ। ਇਸ ਦੇ ਨਾਲ ਹੀ ਪ੍ਰਧਾਨ ਮੰਤਰੀ ਨੇ ਯੂਕਰੇਨ ਦੇ ਪਾਵਰ ਗਰਿੱਡ ’ਤੇ ਕੀਤੇ ਜਾ ਰਹੇ ਹਮਲਿਆਂ ਵਿਚਕਾਰ ਉਸ ਨੂੰ ਊਰਜਾ ਸੁਰੱਖਿਆ ਵਿਚ ਮਦਦ ਕਰਨ ਲਈ ਗ੍ਰਾਂਟ ਦੇਣ ਦੀ ਵੀ ਘੋਸ਼ਣਾ ਕੀਤੀ।

ਇਸ ਤੋਂ ਇਲਾਵਾ ਉਨ੍ਹਾਂ ਰਾਸ਼ਟਪਤੀ ਜ਼ੇਲੇਂਸਕੀ ਨਾਲ ਨਿੱਜੀ ਤੌਰ ’ਤੇ ਵੀ ਮੁਲਾਕਾਤ ਕੀਤੀ। ਟਰੂਡੋ ਨੇ ਇਸ ਦੇ ਨਾਲ ਹੀ ਟਰੰਪ ਦੀ ਉਸ ਟਿੱਪਣੀ ਦਾ ਵੀ ਖੰਡਨ ਕੀਤਾ, ਜਿਸ ਵਿਚ ਉਨ੍ਹਾਂ ਯੁੱਧ ਲਈ ਯੂਕਰੇਨ ਨੂੰ ਜ਼ਿੰਮੇਵਾਰ ਠਹਿਰਾਇਆ ਸੀ।

ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਨਾ ਤਾਂ ਯੂਕਰੇਨ ਯੁੱਧ ਚਾਹੁੰਦਾ ਸੀ ਅਤੇ ਨਾ ਹੀ ਉਸ ਨੇ ਉਕਸਾਇਆ ਸੀ। ਟਰੂਡੋ ਨੇ ਕਿਹਾ ਕਿ ਰੂਸ ਦੇ ਯੁੱਧ ਪਿੱਛੇ ਇੱਕ ਮਕਸਦ ਯੂਕਰੇਨ ਦੇ ਇਤਿਹਾਸ ਨੂੰ ਖ਼ਤਮ ਕਰਨਾ ਅਤੇ ਆਪਣੇ ਸਾਮਰਾਜ ਦਾ ਵਿਸਥਾਰ ਕਰਨਾ ਹੈ।