20.97C Vancouver 20.97C VancouverJul 22, 2020 3:36 PM -
ਐਨ.ਡੀ.ਪੀ. ਲੀਡਰ ਜਗਮੀਤ ਸਿੰਘ ਮੁਤਾਬਕ ਗਵਰਨਰ ਜਨਰਲ ਜੂਲੀ ਪਾਯੈਟ ਉੱਤੇ ਲੱਗੇ ਆਪਣੇ ਸਟਾਫ ਨਾਲ ਬਦਸਲੂਕੀ ਕਰਨ ਦੇ ਇਲਜ਼ਾਮਾਂ ਦੀ ਜਾਂਚ ਕਰਨਾ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਦੀ ਜ਼ਿੰਮੇਵਾਰੀ ਹੈ।
ਸਿੰਘ ਮੁਤਾਬਕ ਕੰਮ ਕਰਨ ਦੀਆਂ ਥਾਵਾਂ ਸੁਰੱਖਿਅਤ ਹੋਣੀਆਂ ਚਾਹੀਦੀਆਂ ਹਨ ਜਿੱਥੇ ਮੁਲਾਜ਼ਮ ਖੁੱਲ੍ਹ ਕੇ ਚਿੰਤਾ ਜ਼ਾਹਰ ਕਰ ਸਕਣ।
ਸਿੰਘ ਸੀ.ਬੀ.ਸੀ. ਨਿਊਜ਼ ਦੀ ਰਿਪੋਰਟ ਦੇ ਸੰਬੰਧ ਵਿੱਚ ਸਵਾਲਾਂ ਦੇ ਜਵਾਬ ਦੇ ਰਹੇ ਸਨ ਜਿਸ ਵਿੱਚ ਪਾਯੈਟ ਉੱਤੇ ਅਗਿਆਤ ਸਰੋਤਾਂ ਨੇ ਰੀਡੋ ਹਾਲ ਵਿਖੇ ਖਰਾਬ ਮਾਹੌਲ ਬਣਾਉਣ ਦੇ ਇਲਜ਼ਾਮ ਲਾਏ ਹਨ।
ਰਿਪੋਰਟ ਅਨੁਸਾਰ ਪਾਯੈਟ ਆਪਣੇ ਮੁਲਾਜ਼ਮਾਂ ਨਾਲ ਬਦਸਲੂਕੀ, ਉੱਚੀ ਆਵਾਜ਼ ਵਿੱਚ ਗੱਲ ਅਤੇ ਉਨ੍ਹਾਂ ਦੀ ਬੇਇੱਜ਼ਤੀ ਕਰਦੇ ਆਏ ਹਨ ਜਿਸ ਕਾਰਨ ਉਨ੍ਹਾਂ ਨੂੰ ਮਜਬੂਰ ਹੋਕੇ ਕੰਮ ਛੱਡਣਾ ਪਿਆ।
ਮੰਗਲਵਾਰ ਨੂੰ ਗਵਰਨਰ ਜਨਰਲ ਦੇ ਪ੍ਰੈੱਸ ਸੈਕਟਰੀ ਵੱਲੋਂ ਜਾਰੀ ਕੀਤੇ ਗਏ ਬਿਆਨ ਦੇ ਵਿੱਚ ਕਿਹਾ ਗਿਆ ਕਿ ਰੀਡੋ ਹਾਲ ਇੱਕ ਵਧੀਆ ਕੰਮ ਦੇ ਮਾਹੌਲ ਵਿੱਚ ਯਕੀਨ ਰੱਖਦਾ ਹੈ ਅਤੇ ਗਵਰਨਰ ਜਨਰਲ ਦੇ ਦਫਤਰ ਦਾ ਮਾਹੌਲ ਸੀ.ਬੀ.ਸੀ. ਦੀ ਰਿਪੋਰਟ ਤੋਂ ਬਿਲਕੁਲ ਉਲਟ ਹੈ।
ਮੰਗਲਵਾਰ ਨੂੰ ਪ੍ਰਧਾਨ ਮੰਤਰੀ ਦੇ ਦਫਤਰ ਨੇ ਇਸ ਸੰਬੰਧ ਵਿੱਚ ਸਵਾਲਾਂ ਦੇ ਜਵਾਬ ਦੇਣ ਤੋਂ ਇਨਕਾਰ ਕਰ ਦਿੱਤਾ ਪਰ ਕਿਹਾ ਕਿ ਹਰ ਕਨੇਡੀਅਨ ਨੂੰ ਇੱਕ ਸਤਿਕਾਰਯੋਗ ਅਤੇ ਸੁਰੱਖਿਅਤ ਵਾਤਾਵਰਣ ਵਿੱਚ ਕੰਮ ਕਰਨ ਦਾ ਅਧਿਕਾਰ ਹੈ।
