ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਕਾਰਬਨ ਟੈਕਸ ’ਤੇ ਜਗਮੀਤ ਸਿੰਘ ਦੇ ਬਦਲੇ ਰੁਖ਼ ’ਤੇ ਜਤਾਈ ਹੈਰਾਨੀ

ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਕਾਰਬਨ ਟੈਕਸ ’ਤੇ ਜਗਮੀਤ ਸਿੰਘ ਦੇ ਬਦਲੇ ਰੁਖ਼ ’ਤੇ ਹੈਰਾਨੀ ਜਤਾਈ। ਟਰੂਡੋ ਨੇ ਕਿਹਾ ਕਿ ਇਹ ਸਮਝ ਤੋਂ ਪਰੇ ਹੈ ਕਿ ਫੈਡਰਲ ਨਿਊ ਡੈਮੋਕਰੇਟਸ ਕਾਰਬਨ ਦੀ ਕੀਮਤ ਲਈ ਆਪਣਾ ਸਮਰਥਨ ਵਾਪਸ ਕਿਉਂ ਲੈ ਰਹੇ ਹਨ। ਉਨ੍ਹਾਂ ਇਹ ਵੀ ਮੰਨਿਆ ਕਿ ਇਸ ਮੁੱਦੇ ’ਤੇ ਉਨ੍ਹਾਂ ਨੂੰ ਰਾਜਨੀਤਕ ਰੁਕਾਵਾਟਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ।

ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਇਸ ਸਭ ਦੇ ਬਾਵਜੂਦ ਸਰਕਾਰ ਕਲਾਈਮੇਟ ਚੇਂਜ ਖਿਲਾਫ ਲੜਾਈ ਜਾਰੀ ਰੱਖੇਗੀ। ਉਨ੍ਹਾਂ ਕਿਹਾ ਕਿ ਕਾਰਬਨ ਰਿਬੇਟ ਪ੍ਰੋਗਰਾਮ ਜ਼ਰੀਏ ਪਰਿਵਾਰਾਂ ਨੂੰ ਵਧੇਰੇ ਪੈਸਾ ਦਿੱਤਾ ਜਾ ਰਿਹਾ ਹੈ ਅਤੇ ਇਸ 15 ਅਪ੍ਰੈਲ ਨੂੰ ਕੈਨੇਡੀਅਨਾਂ ਦੇ ਬੈਂਕ ਅਕਾਊਂਟਸ ਵਿਚ ਇਹ ਰਿਬੇਟ ਕ੍ਰੈਡਿਟ ਹੋਣ ਜਾ ਰਹੀ ਹੈ।

ਗੌਰਤਲਬ ਹੈ ਕਿ ਟਰੂਡੋ ਓਨਟਾਰੀਓ ਦੇ ਵਾਨ ਵਿਚ ਪ੍ਰੀ-ਬਜਟ ਹਾਊਸਿੰਗ ਘੋਸ਼ਣਾ ਤੋਂ ਬਾਅਦ ਪੱਤਰਕਾਰਾਂ ਦੇ ਸਵਾਲਾਂ ਦੇ ਜਵਾਬ ਦੇ ਰਹੇ ਸਨ। ਪੱਤਰਕਾਰਾਂ ਵਲੋਂ ਉਨ੍ਹਾਂ ਤੋਂ ਪੁੱਛਿਆ ਗਿਆ ਸੀ ਕਿ ਪ੍ਰੀਮੀਅਰ ਤੋਂ ਬਾਅਦ ਹੁਣ ਐੱਨ. ਡੀ. ਪੀ. ਨੇ ਵੀ ਕਾਰਬਨ ਟੈਕਸ ’ਤੇ ਸਪੋਰਟ ਤੋਂ ਪੈਰ ਪਿਛਾਂਹ ਖਿੱਚ ਲਏ ਹਨ ਇਸ ’ਤੇ ਸਰਕਾਰ ਦਾ ਕੀ ਸਟੈਂਡ ਹੈ।

ਗੌਰਤਲਬ ਹੈ ਕਿ ਨਿਊ ਡੈਮੋਕਰੇਟਸ ਲੰਬੇ ਸਮੇਂ ਤੋਂ ਜਲਵਾਯੂ ਨੀਤੀ ਦੇ ਸਮਰਥਕ ਰਹੇ ਹਨ ਅਤੇ ਇੱਥੋਂ ਤੱਕ ਕਿ 2019 ਦੀਆਂ ਚੋਣਾਂ ਵਿਚ ਉਨ੍ਹਾਂ ਵਲੋਂ ਇਸ ’ਤੇ ਪ੍ਰਚਾਰ ਵੀ ਕੀਤਾ ਗਿਆ ਸੀ।