ਟਰੂਡੋ ਨੇ ਔਫਿਸ ਦੇ ਆਖਰੀ ਦਿਨ ਜਾਰੀ ਕੀਤਾ ਕੈਨੇਡੀਅਨਜ਼ ਦੇ ਨਾਮ ਸੰਦੇਸ਼

ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਦਾ ਅੱਜ ਪ੍ਰਧਾਨ ਮੰਤਰੀ ਵਜੋਂ ਆਖਰੀ ਦਿਨ ਹੈ ਅਤੇ ਇਸ ਮੌਕੇ ਉਨ੍ਹਾਂ ਕੈਨੇਡੀਅਨ ਦੇ ਨਾਮ ਇੱਕ ਸੰਦੇਸ਼ ਜਾਰੀ ਕੀਤਾ ਹੈ, ਜਿਸ ਵਿਚ ਉਨ੍ਹਾਂ ਕਿਹਾ ਕਿ ਮੈਨੂੰ ਅਜਿਹੇ ਦੇਸ਼ ਦੀ ਸੇਵਾ ਕਰਨ 'ਤੇ ਮਾਣ ਹੈ, ਜੋ ਅਜਿਹੇ ਲੋਕਾਂ ਨਾਲ ਭਰਿਆ ਹੈ ਜੋ ਸਹੀ ਲਈ ਖੜ੍ਹੇ ਹੁੰਦੇ ਹਨ, ਹਰ ਮੌਕੇ 'ਤੇ ਅੱਗੇ ਆਉਂਦੇ ਹਨ ਅਤੇ ਜਦੋਂ ਸਭ ਤੋਂ ਜ਼ਿਆਦਾ ਜ਼ਰੂਰਤ ਹੁੰਦੀ ਹੈ ਤਾਂ ਹਮੇਸ਼ਾ ਇੱਕ-ਦੂਜੇ ਦਾ ਸਾਥ ਦਿੰਦੇ ਹਨ।

ਟਰੂਡੋ ਨੇ ਅੱਗੇ ਕਿਹਾ ਕਿ ਪ੍ਰਧਾਨ ਮੰਤਰੀ ਦਫ਼ਤਰ ਵਿਚ ਬੇਸ਼ੱਕ ਇਹ ਮੇਰਾ ਆਖਰੀ ਦਿਨ ਹੈ ਪਰ ਮੈਂ ਹਮੇਸ਼ਾ ਇੱਕ ਕੈਨੇਡੀਅਨ ਰਹਾਂਗਾ ਅਤੇ ਮੇਰੀ ਇੱਕੋ ਬੇਨਤੀ ਹੈ ਕਿ ਦੁਨੀਆ ਸਾਡੇ 'ਤੇ ਜੋ ਵੀ ਹਮਲਾ ਕਰੇ, ਤੁਸੀਂ ਹਮੇਸ਼ਾ ਇਕਜੁੱਟ ਰਹਿਣਾ।

ਗੌਰਤਲਬ ਹੈ ਕਿ ਟਰੂਡੋ ਭਲਕੇ ਸਾਬਕਾ ਬੈਂਕਰ ਮਾਰਕ ਕਾਰਨੀ ਨੂੰ ਸੱਤਾ ਸੌਂਪ ਦੇਣਗੇ। ਉਹ ਗਵਰਨਰ ਜਨਰਲ ਮੈਰੀ ਸਾਈਮਨ ਨੂੰ ਨਿੱਜੀ ਤੌਰ 'ਤੇ ਮਿਲਕੇ ਅਸਤੀਫਾ ਦੇਣਗੇ।