ਕਾਰਬਨ ਟੈਕਸ ਦਾ ਵਿਰੋਧ ਕਰ ਰਹੇ ਪ੍ਰੀਮੀਅਰ ਖਿਲਾਫ਼ ਜਸਟਿਨ ਟਰੂਡੋ ਵੀ ਮੈਦਾਨ ਵਿਚ ਆਏ

ਕੈਨੇਡਾ ਵਿਚ 1 ਅਪ੍ਰੈਲ ਨੂੰ ਵਧਣ ਵਾਲੇ ਕਾਰਬਨ ਟੈਕਸ ਦਾ ਵਿਰੋਧ ਕਰ ਰਹੇ ਪ੍ਰੀਮੀਅਰ ਖਿਲਾਫ਼ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਵੀ ਖੁੱਲ੍ਹ ਕੇ ਮੈਦਾਨ ਵਿਚ ਆ ਗਏ ਹਨ। ਪ੍ਰੀਮੀਅਰ ਨੂੰ ਲਿਖੇ ਪੱਤਰ ਵਿਚ ਉਨ੍ਹਾਂ ਕਿਹਾ ਹੈ ਕਿ ਜੇ ਤੁਹਾਡੇ ਕੋਲ ਜਲਵਾਯੂ ਤਬਦੀਲੀ ਨਾਲ ਨਜਿੱਠਣ ਲਈ ਕੋਈ ਬਦਲਵਾਂ ਕਾਰਗਰ ਤਰੀਕਾ ਹੈ ਤਾਂ ਉਸ ਨੂੰ ਪੇਸ਼ ਕਰੋ।

ਟਰੂਡੋ ਨੇ ਇਹ ਪੱਤਰ ਸੱਤ ਪ੍ਰੀਮੀਅਰ ਨੂੰ ਭੇਜਿਆ ਹੈ ਜੋ ਕਾਰਬਨ ਟੈਕਸ ਵਿਚ ਵਾਧੇ ਨੂੰ ਰੋਕਣ ਦੀ ਮੰਗ ਕਰ ਰਹੇ ਹਨ, ਇਨ੍ਹਾਂ ਵਿਚ ਨਿਊਫਾਊਂਡਲੈਂਡ ਅਤੇ ਲੈਬਰਾਡੋਰ ਦੇ ਲਿਬਰਲ ਪ੍ਰੀਮੀਅਰ ਐਂਡਰਿਊ ਫਰੀ ਵੀ ਸ਼ਾਮਲ ਹਨ। ਟਰੂਡੋ ਨੇ ਕਾਰਬਨ ਟੈਕਸ ਨੂੰ ਸਹੀ ਦੱਸਦੇ ਹੋਏ ਕਿਹਾ ਕਿ ਇਕੱਲੇ ਇਸ ਨਾਲ 2030 ਤੱਕ ਪ੍ਰਦੂਸ਼ਣ ਵਿਚ ਇੱਕ ਤਿਹਾਈ ਦੀ ਕਮੀ ਹੋਣ ਵਾਲੀ ਹੈ।

ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਫੈਡਰਲ ਸਰਕਾਰ ਆਪਣੀ ਯੋਜਨਾ ਨੂੰ ਉਨ੍ਹਾਂ ਸੂਬਿਆਂ ਵਿਚੋਂ ਬਾਹਰ ਕੱਢਣ ਲਈ ਤਿਆਰ ਹੈ ਜਿੱਥੇ ਇਸ ਦਾ ਵਿਰੋਧ ਕੀਤਾ ਗਿਆ ਹੈ, ਬਸ਼ਰਤੇ ਉਹ ਸੂਬੇ ਜਲਵਾਯੂ ਤਬਦੀਲੀ ਖਿਲਾਫ ਆਪਣੇ ਭਰੋਸੇਯੋਗ ਪਲੈਨ ਪੇਸ਼ ਕਰਨ।

ਗੌਰਤਲਬ ਹੈ ਕਿ ਫੈਡਰਲ ਸਰਕਾਰ ਦੇ ਕਾਰਬਨ ਟੈਕਸ ਤੇ ਰਿਬੇਟ ਪ੍ਰੋਗਰਾਮ ਖਿਲਾਫ ਸਸਕੈਚਵਨ ਦੇ ਪ੍ਰੀਮੀਅਰ ਸਕਾਟ ਮੋਅ ਨੇ ਅੱਜ ਹਾਊਸ ਆਫ਼ ਕਾਮਨ ਦੀ ਵਿੱਤੀ ਕਮੇਟੀ ਕੋਲ ਵਿਰੋਧ ਦਰਜ ਕਰਵਾਇਆ ਹੈ। ਇਸੇ ਤਰ੍ਹਾਂ ਅਲਬਰਟਾ ਦੀ ਪ੍ਰੀਮੀਅਰ ਡੈਨੀਅਲ ਸਮਿਥ, ਨਿਊ ਬਰੰਜ਼ਵਿਕ ਦੇ ਬਲੇਨ ਹਿਗਸ ਅਤੇ ਨੋਵਾ ਸਕੋਸ਼ੀਆ ਦੇ ਟਿਮ ਹਿਊਸਟਨ ਵੀ ਵੀਰਵਾਰ ਨੂੰ ਵੀਡੀਓ ਕਾਨਫਰੰਸ ਜ਼ਰੀਏ ਕਮੇਟੀ ਸਾਹਮਣੇ ਆਪਣਾ ਪੱਖ ਰੱਖਣਗੇ।