ਬਰਨਬੀ ਵਿਚ ਕੈਟਾਲਿਟਿਕ ਕਨਵਰਟਰ ਦੀ ਚੋਰੀ ਵਿਚ ਸਰੀ ਦੀ ਇੱਕ ਔਰਤ ਸਣੇ ਦੋ ਗ੍ਰਿਫਤਾਰ

ਬਰਨਬੀ ਪੁਲਿਸ ਨੇ ਦੋ ਔਰਤਾਂ ਨੂੰ ਪਿਛਲੇ ਮਹੀਨੇ ਵਾਪਰੀਆਂ ਕੈਟਾਲਿਟਿਕ ਕਨਵਰਟਰ ਦੀ ਚੋਰੀ ਦੀਆਂ ਘਟਨਾਵਾਂ ਦੇ ਸਬੰਧ ਵਿਚ ਗ੍ਰਿਫਤਾਰ ਕੀਤਾ ਹੈ। ਇਨ੍ਹਾਂ ਵਿਚ ਇੱਕ ਸਰੀ ਦੀ 38 ਸਾਲਾ ਔਰਤ ਅਤੇ ਦੂਜੀ ਐਬਟਸਫੋਰਡ ਦੀ 39 ਸਾਲਾ ਔਰਤ ਸ਼ਾਮਲ ਹੈ।

ਪੁਲਿਸ ਨੇ ਕਿਹਾ ਕਿ ਜਾਂਚ ਅਜੇ ਵੀ ਜਾਰੀ ਹੈ।ਬਰਨਬੀ ਆਰਸੀਐਮਪੀ ਨੇ ਬੁੱਧਵਾਰ ਨੂੰ ਜਾਰੀ ਇੱਕ ਪ੍ਰੈੱਸ ਰਿਲੀਜ਼ ਵਿਚ ਕਿਹਾ ਕਿ 22 ਜਨਵਰੀ ਨੂੰ ਸਵੇਰ ਕੋਈ 4.30 ਵਜੇ ਉਨ੍ਹਾਂ ਨੂੰ ਯੂਨੀਵਰਸਿਟੀ-ਪ੍ਰੋਡਕਸ਼ਨ ਅਵੇ ਸਕਾਈ ਟ੍ਰੇਨ ਸਟੇਸ਼ਨ ਨੇੜੇ ਬ੍ਰਾਈਟਨ ਐਵੇਨਿਊ ਅਤੇ ਲੌਹੀਡ ਹਾਈਵੇ ਦੇ ਖੇਤਰ ਦੇ ਇੱਕ ਪਾਰਕਿੰਗ ਵਾਲੀ ਥਾਂ ਵਿਚ ਵੈਨ ਦੇ ਥੱਲ੍ਹੇ ਦੋ ਸ਼ੱਕੀਆਂ ਦੀ ਰਿਪੋਰਟ ਮਿਲੀ, ਜਦੋਂ ਤੱਕ ਅਧਿਕਾਰੀ ਪਹੁੰਚੇ, ਸ਼ੱਕੀ ਵੈਨ ਦੇ ਕੈਟਾਲਿਟਿਕ ਕਨਵਰਟਰ ਨਾਲ ਮੌਕੇ ਤੋਂ ਭੱਜ ਚੁੱਕੇ ਸਨ,

ਇਸ ਮਗਰੋਂ ਪੁਲਿਸ ਨੇ ਇਲਾਕੇ ਦੀ ਗਸ਼ਤ ਕੀਤੀ ਅਤੇ ਦੋਵੇਂ ਸ਼ੱਕੀਆਂ ਨੂੰ ਕਈ ਕੈਟਾਲਿਟਿਕ ਕਨਵਰਟਰ ਅਤੇ ਔਜ਼ਾਰ ਸਮੇਤ ਕਾਬੂ ਕੀਤਾ, ਜੋ ਹੁਣ ਕਈ ਚਾਰਜਸ ਦਾ ਸਾਹਮਣਾ ਕਰ ਰਹੀਆਂ ਹਨ। ਫਿਲਹਾਲ ਪੁਲਿਸ ਨੇ ਇਨ੍ਹਾਂ ਦੀ ਪਛਾਣ ਸਾਂਝੀ ਨਹੀਂ ਕੀਤੀ।