21.3C Vancouver 21.3C VancouverJul 9, 2026 5:35 PM - Connect Newsroom - Jasmine Singh
ਓਨਟਾਰੀਓ ਦੀ ਵਿੰਡਸਰ ਪੁਲਿਸ ਨੇ ਦੋ ਭਾਰਤੀ ਮੂਲ ਦੇ ਨੌਜਵਾਨਾਂ ਨੂੰ ਦੋ ਨਾਬਾਲਗ ਲੜਕੀਆਂ ਨੂੰ ਆਪਣੇ ਜਾਲ ਵਿਚ ਫਸਾਉਣ, ਉਨ੍ਹਾਂ ਦਾ ਜਿਨਸੀ ਸ਼ੋਸ਼ਣ ਕਰਨ ਅਤੇ ਮਨੁੱਖੀ ਤਸਕਰੀ ਦੇ ਮਾਮਲੇ ਵਿਚ ਗ੍ਰਿਫਤਾਰ ਕੀਤਾ ਹੈ, ਜਿਨ੍ਹਾਂ ਦੀ ਪਛਾਣ 27 ਸਾਲਾ ਸਿਮਰਨਜੀਤ ਸਿੰਘ ਅਤੇ 26 ਸਾਲਾ ਹਰੀਓਮ ਯਾਦਵ ਵਜੋਂ ਸਾਹਮਣੇ ਆਈ ਹੈ। ਪੁਲਿਸ ਨੇ ਇਨ੍ਹਾਂ ਖ਼ਿਲਾਫ਼ 17 ਚਾਰਜ਼ਿਜ਼ ਦਾਇਰ ਕੀਤੇ ਹਨ ਅਤੇ ਇਸੇ ਮਾਮਲੇ ਵਿਚ ਦੋ ਹੋਰ ਸ਼ੱਕੀ ਮੁਲਜ਼ਮਾਂ ਦੀ ਭਾਲ ਕੀਤੀ ਜਾ ਰਹੀ ਹੈ।
ਵਿੰਡਸਰ ਪੁਲਿਸ ਮੁਤਾਬਕ, ਸਿਮਰਨਜੀਤ ਸਨੈਪਚੈਟ 'ਤੇ ਸੈਮ ਨਾਮ ਦੇ ਜਾਅਲੀ ਅਕਾਊਂਟ ਦੀ ਵਰਤੋਂ ਕਰਦਾ ਸੀ। ਉਥੇ ਹੀ, ਯਾਦਵ ਵਲੋਂ ਜੈਕ ਨਾਮ ਵਰਤਿਆ ਜਾ ਰਿਹਾ ਸੀ। ਜਾਂਚਕਰਤਾ ਮੁਤਾਬਕ, ਇਹ ਮੁਲਜ਼ਮ ਸੋਸ਼ਲ ਮੀਡੀਓ ਜ਼ਰੀਏ ਪਹਿਲਾਂ ਪੀੜਤਾਂ ਨਾਲ ਨਜ਼ਦੀਕੀਆਂ ਵਧਾਉਂਦੇ ਸਨ ਅਤੇ ਫਿਰ ਮੁਲਾਕਾਤ ਦੌਰਾਨ ਖੁਆ-ਪੁਆ ਕੇ ਉਨ੍ਹਾਂ ਨੂੰ ਸਬੰਧ ਬਣਾਉਣ ਲਈ ਮਜ਼ਬੂਰ ਕੀਤਾ ਜਾਂਦਾ ਸੀ।
ਪੁਲਿਸ ਵਲੋਂ ਯਾਦਵ ਦੀ ਗ੍ਰਿਫਤਾਰੀ 10 ਅਪ੍ਰੈਲ ਨੂੰ ਵਿੰਡਸਰ ਦੇ ਵੈਸਟ ਐਂਡ ਦੇ ਇੱਕ ਕਾਰੋਬਾਰ ਤੋਂ ਕਰ ਲਈ ਗਈ ਸੀ, ਜਦੋਂ ਕਿ ਸਿਮਰਨਜੀਤ ਦੀ ਗ੍ਰਿਫਤਾਰ ਤਿੰਨ ਜੁਲਾਈ ਨੂੰ ਇਸੇ ਇਲਾਕੇ ਵਿਚ ਉਸ ਦੀ ਰਿਹਾਇਸ਼ ਤੋਂ ਕੀਤੀ ਗਈ। ਫਿਲਹਾਲ ਪੁਲਿਸ ਦੋ ਹੋਰ ਸ਼ੱਕੀ ਵਿਅਕਤੀਆਂ ਦੀ ਭਾਲ ਕਰ ਰਹੀ ਹੈ ਜਿਨ੍ਹਾਂ ਨੇ ਨਾਬਾਲਗਾਂ ਤੋਂ ਜਿਨਸੀ ਸੇਵਾਵਾਂ ਲਈਆਂ ਸਨ ਅਤੇ ਜਾਂਚਕਰਤਾ ਦਾ ਮੰਨਣਾ ਹੈ ਕਿ ਇਸ ਮਾਮਲੇ ਵਿਚ ਕੁਝ ਹੋਰ ਪੀੜਤ ਵੀ ਹੋ ਸਕਦੇ ਹਨ।
